یادگاری لئی داؤدؔ دا گیت ¹ ۱۔ یا ربّا! مینوں اپنے غُصے نال ناں جھِڑک تے اَپنے قَہر نال مینوں ناں تراہ ۔ ² ۲۔ کیوں جو تیرے تِیر مینو ں کھُبے نیں۔ تیرا ہَتھ میرے تے بھارا اے ۔ ³ ۳۔ تیرےغُصے دے سببوں میرے جُسے دی صِحت نئیں رہی تے میرے پاپ دے سببوں میری کوئی ہڈی ثبوتی نئیں رہی۔ ⁴ ۴۔ میریاں بھُلاں تے میرے سِر توں لنگھ گئیاں نیں ۔ تے بوہتے بھار وانگ بھاریاں نیں ۔ ⁵ ۵۔ میری نادانی دے سببوں میرے پھَٹ سَڑ گئے نیں ۔ اوہناں وِچوں بُو آؤندی اے ۔ ⁶ ۶۔ میں کُبا تے بڑا وِنگا ہو گیا واں۔ میں سارا سارا دِن رونا رہنا واں ۔ ⁷ ۷۔ میر کَنڈ سُجھی ہوئی اے ۔ تے میرے پِنڈے وِچ یریہہ وی صحت نئیں۔ ⁸ ۸۔ میں کُٹ کُٹ کے میِن کیتا ہویا آں ۔ پَر دِل دی بے چینی دے سببوں کُرلانا واں ۔ ⁹ ۹۔ یا ربا! میری کُل آس تیرے اَگے وے ۔ تے میرا ورلاپ تیتھوں لُکیا نئیں ۔ ¹⁰ ۱۰۔ میرا دِل دھڑکدا اے ۔ تیرا ٹِل میتھوں لے لیا گیا اے ۔ ایتھوں تیِک میریاں اَکھاں دا چانن وی نئیں رہیا۔ ¹¹ ۱۱۔ میری مُصیبت وِچ میتھوں میرے سب یار بیلی وَکھ ہو گئے تے اَنگ ساک پَراں جا کھلوتے ۔ ¹² ۱۲۔ میری جان دے ویری میرے لئی پھاہی لاؤندے نیں ۔ تے میری بربادی دے طالب میری موت دیاں گلاں کردے تے دھوکے دے مُڈھ بنھ دے نیں ۔ ¹³ ۱۳۔ پر میں بولے وانگ سُندا ای نئیں میں گُنگے وانگ مُونہہ ای نئیں کھولدا ۔ ¹⁴ ۱۴۔ میں اِک اجیہے بندے وانگ آں جیہڑا سُن دا ای نئیں۔ تے جیہدے مُونہہ وِچ جواب ای نئیں۔ ¹⁵ ۱۵۔ کیوں جو یا ربا ! مینوں تیری ای آس اے ۔ تے یا میرے رَبا ! میرے خُدا ! تُوں جواب دیویں گا ۔ ¹⁶ ۱۶۔ کیوں جو میں آکھنا واں ۔ پئی کِتے اوہ میرے تے خُوش ناں ہون ۔ تے جَد میرا پیر تِلکے تے میرے خِلاف گھُمنڈ ناں کَرن ۔ ¹⁷ ۱۷۔ کیوں جو میں تلِکن ای والا واں ۔ تے میرا دُکھ ہَر ویلے میرے اَگے وے۔ ¹⁸ ۱۸۔ کیوں جو میں اَپنا پاپ مننا واں تے اَپنے گُناہ ہَتھوں دُکھی آں ۔ ¹⁹ ۱۹۔ تے جیہڑے ایویں ای میرے وَیری نیں اوہ ڈاہڈے نیں تے پَرجیہڑے اویں ای میرے نال وَیر رَکھ دے نیں چوکھے نیں ۔ ²⁰ ۲۰۔ تے جیہڑے نیکی دے بدلے بدی کردے نیں مینوں ایس لئی ستاندے نیں پئی میں نیکی مگر جانا واں۔ ²¹ ۲۱۔ یا رَبا ! مینوں ناں چھَڈ ۔ میریارَبا ! میتھوں پراں ناں رہ ۔ ²² ۲۲۔ یا ربّا تُوں میری نجات ایں میری مدد لئی چھیتی کَر ۔