داؤد و َلوں آگو گویئے لئی گیت ¹ ۱۔ یا رَبا بادشاہ تیرے زور توں خوش اے تے تیری مدد تؤں اوہ کِناں شاد اے ² ۲۔ توں اوہنوں اوہدے دِل دی منشا بخشی اے توں اوہنوں اوہدے منہ دی فریاد توں ڈَکیا نئیں ³ ۳۔ (صِلاح)کیوں جو توں ودیریاں برکتاں نال اوہنوں اَگاں ودھایا تُوں اوہدے سِر تے پاسے دے سونے دا تاج دھریااے ⁴ ۴۔ اوہنے تیتھوں حیاتی منگی تے توں اوہنوں سدا دی حیاتی تے لمی عمر دِتی ⁵ ۵۔ تیری مدد دے سببوں تُوں اوہدی شان ودھائی اےتُوں اوہنوںوڈیائی تے جلال نال شنگاریا اے ⁶ ۶۔ کیوں جو تُوں اوہنوں سدالئی برکت دا سبب بنایا تے نالے اوہنوں اپنے اَگے خوشی نال شاد کِیتا ⁷ ۷۔ بادشاہ دا بھروسہ رَب تے کیوں ایں تے سچے رَب دی رحمت دے سببوں اوہنوں ہُلارا نہ آوے گا ⁸ ۸۔ تیرا ہتھ تیرے کُل ویریاں نوں پَوے تیر اسجا ہتھ تیرے ویریاں نوں لبھ لیاوے ⁹ ۹۔ جد تو ں منہ درونہہ ہوویں تے اوہناں اینج ساڑ دے جیویں بھٹی ساڑی دا اے رَب اپنے اوہناں نوں اپنےغُصے وچ فنا کرے۔ تے اَگ اوہناں نوں ساڑ کے سوا کر دوے۔ ¹⁰ ۱۰۔ تُوں اوہناں دی نسل دھرتی توں تے اوہناں دی آل آدم دی جد وچوں فنا کر دے۔ ¹¹ ۱۱۔ بھاویں اوہناں تیرے خِلاف بدی دا منصوبہ گنڈھیا تے فریب دِیاں تدبیراں کِتیاں نیں پر اوہ توڑ نہ چڑھن گِیاں ¹² ۱۲۔ کیوں جو توں اوہناں نوں نسا دین گا توں اوہناں نال لڑن لئی اپنی کمان چڑھاویں گا ¹³ ۱۳۔ یا رَبا تؤں اپنے زور وچ اُچا ہو اسی گاؤندے ہوئے تیری قُدرت دی وڈیائی کراں گے