¹ ۱۔ الف ۔ اے میرے خدا بادشاہ ۔ میں تیری تعریف کراں گا ۔ میں ابد الآباد تیکر تیرے ناں نوں مبارک آکھدا رہواں گا ۔ ² ۲۔ ب ۔ میں ہر روز تینوں مبارک آکھاں گا ۔ تے ابد الآباد تیکر تیرے ناں دی حمد کردا رہواں گا ۔ ³ ۳۔ ج ۔ خدا وند عظیم تے نہایت حمد دے قابل اے ۔ تے اوہدی وڈیائی لبھی نہیں جا سکدی ۔ ⁴ ۴۔ د ۔ پُشت توں پُشت تیرے کماں دی تعریف کردی اے ۔ تے تیری قدرت دا بیان کردی اے ۔ ⁵ ۵۔ ہ ۔ اوہ تیری حشمت دے وڈے جلال دا ذکر کردے نیں ۔ تے تیرے عجائبات نوں مشہور کردے نیں ۔ ⁶ ۶۔ و۔ تے تیرے گہرے کماں دی قدرت دیاں گلاں کردے نیں ۔ تے تیری وڈیائی بیان کردے نیں ۔ ⁷ ۷۔ ز ۔ اوہ تیرے وڈے احسان دی وڈیائی ۔ تے تیرے نیاں بارے مٹھے بول گاندے نیں ۔ ⁸ ۸۔ ح ۔ خدا وند رحم کرن اآلا تے مہربان اے ۔ اوہ دور تک ویکھن آلا تے بہت لاڈ کرن آلا اے ۔ ⁹ ۹۔ ط ۔ خدا وند ساریاں تے کرم کرن آلا اے ۔ تے اپنیاں بنایاں ساریاں شیواں تے مہربان اے ۔ ¹⁰ ۱۰۔ ی ۔ اے خدا وند تیریاں ساریاں بنائیاں شیواں تیرا شکر کرن ۔ تے تیرے پاکیزہ لوک تینوں مبارک آکھن ۔ ¹¹ ۱۱۔ ک ۔ اوہ تیری بادشاہی دی شان دی گل کرن ۔ تے تیری قدرت دا ذکر کرن ۔ ¹² ۱۲۔ ل ۔ تاں جو تیری قدرت تے تیری وڈی بادشاہی دی ٹھاٹھ ۔ بنی آدم تے ظاہر کرئیے ۔ ¹³ ۱۳۔ م ۔ تیری بادشاہی سارے زمانیاں دی بادشاہی اے ۔ تے تیری حکومت ساریاں پشتاں تے قائم رہوے گی ۔ ن ۔ خدا وند اپنے ساریاں قولاں دا سچا اے ۔ تے اپنے سارے عملاں وچ نیک اے ۔ ¹⁴ ۱۴۔ س ۔ خدا وند سارے ڈگن آلیاں نوں سہارا دیندا اے ۔ تے سارے نیویں ہون آلیاں نوں سدھا کردا اے ۔ ¹⁵ ۱۵۔ ع ۔ ساریاں دیاں اکھاں تینوں اڈیکدیاں نیں ۔ تے توں اوہناں نوں ویلے سر روزی دیندا ایں ۔ ¹⁶ ۱۶۔ ف ۔ توں اپنے ہتھ نوں کھولدا ایں ۔ تے ہر جان رکھن آلے دی سدھر پوری کردا ایں ۔ ¹⁷ ۱۷۔ ص ۔ خدا وند اپنی ساریاں راہواں تے سچا اے ۔ تے اپنے ساریاں کماں وچ نیک اے ۔ ¹⁸ ۱۸۔ ق۔ خدا وند اوہناں ساریاں دے نیڑے اے ۔ جیہڑے اوہنوں بلاندے نیں ۔ یعنی جیہڑے اوہنوں سچے دل نال بلاندے نیں ۔ ¹⁹ ۱۹۔ ر ۔ اوہ اپنے ڈرن آلیاں دی سدھر پوری کرے گا ۔ تے اوہناں دی فریاد سن کے اوہناں نوں بچائے گا ۔ ²⁰ ۲۰۔ ش ۔ خدا وند اوہناں ساریاں دی راکھی کردا اے جیہڑے اوہدے نال محبت کردے نیں ۔ پر سارے بے دیناں نوں فنا کرے گا ۔ ²¹ ۲۱۔ ت میرا منہ خدا وند دی حمد دی گلاں کرے ۔ تے ہر بندہ ابد الآباد تیکر اوہدے پاک ناں نوں مبارک آکھے ۔