¹ ۱۔ اے خدا وند توں مینوں پرکھدا ایں ۔ تے توں جاندا ایں ۔ ² ۲۔ توں میرا اٹھنا بہنا جاندا ایں ۔ توں میریاں سوچاں نوں دوروں سمجھ لیندا ایں ۔ ³ ۳۔ توں میرا تُرنا تے لیٹنا پرکھدا ایں ۔ تے میریاں ساریاں راہواں توں واقف ایں ۔ ⁴ ۴۔ ایس توں پہلاں پئی کوئی گل میری زبان تے آئے۔ ویکھ اے خدا وند تینوں پوری طرح پتا اے ۔ ⁵ ۵۔ پچھوں تے اگوں توں مینوں گھیریا ہویا اے۔ تے توں اپنا ہتھ میرے اُتے رکھدا ایں ۔ ⁶ ۶۔ ایہہ معرفت میرے لئی بڑی عجیب اے ۔ ایہہ بہت اُچا اے ۔ ایہہ میری سمجھ توں باہر اے ۔ ⁷ ۷۔ میں تیری روح توں کتھے جاواں ۔ تے تیرے منہ توں کتھے نساں ۔ ⁸ ۸۔ جے میں اسمان تے چڑھ جاواں تاں توں اوتھے ایں ۔ جے میں اُکا تھلے چلا جاواں تاں توں اوتھے وی موجود ایں ۔ ⁹ ۹۔ جے میں سویر دے کھمبھ لاواں ۔ تے سمندر دی اخیر تے جا وساں ۔ ¹⁰ ۱۰۔ تاں اوتھے وی تیرا ہتھ میری ہدایت کرے گا۔ تے تیرا سدھا ہتھ مینوں سانبھے گا ۔ ¹¹ ۱۱۔ جے آکھاں ’’ گھٹ توں گھٹ ہنییرا مینو لکا لوے گا۔ تے نور دی تھاں رات مینوں گھیر لوے گی ۔‘‘ ¹² ۱۲۔ تاں تیرے سامنے ہنیرا وی ہنرا نہیں ۔ تے رات دن وانگوں روشن ہووے گی ۔ ہنیرا تے چاننا تیرے لئی اکو جہے نیں ۔ ¹³ ۱۳۔ توں ای میرے گردے پیدا کیتے نیں ۔ تے میری ماں دی ککھ وچ مینوں بنایا اے ۔ ¹⁴ ۱۴۔ میں ایس لئی تیرا شکر کردا ہاں۔ پئی میں اجہیا عجیب طور دے نال بنایا گیا ۔ تے تیریاں صنعتاں نوں تعجب آلیاں نیں ۔ تے توں میری روح دا چنگا جانو ایں ۔ ¹⁵ ۱۵۔ میری حقیقت تیرے کولوں چھپی نہ رہی۔ جد کہ میں اوہلے وچ بنایا جا رہیا ساں ۔ تے جدوں زمین دے تھلے مینوں ترتیب دتا جا رہیا سی ۔ ¹⁶ ۱۶۔ تیریاں اکھاں نے میرے طور طریقے ویکھے نیں۔ اوہ سارے تیری کتاب وچ لکھے ہوئے نیں ۔ تے اوہناں وچوں کسے اک دے وی وجود وچ آون توں پہلاں ای میرے دن متھے گئے ۔ ¹⁷ ۱۷۔ پر اے خدا میرے لئی تیرے منصوبے کنے ای اوکھے نیں ۔ اوہناں دی گنتری کنی وڈی اے ۔ ¹⁸ ۱۸۔ جدوں اوہناں نوں گناں تاں تورات توں وی زیادہ نیں ۔ جدوں اخیر تیکر پہنچاں تاں وی تیرے کول ای ہاں ۔ ¹⁹ ۱۹۔ اے خدا کاش توں لچے نوں قتل کریں۔ تے خونی مرد میتھوں دور ہٹ جان ۔ ²⁰ ۲۰۔ کیوں جو اوہ فریب نال نافرمانی کردے نیں۔ تے تیرے دشمن دغا بازی نال پیش آندے نیں ۔ ²¹ ۲۱۔ اے خدا وند جیہڑے تیرے نال کینہ رکھدے نیں۔ کیہ میں اوہناں نال کینہ نہیں رکھدا ؟ جیہڑے تیرے خلاف اٹھدے نیں کیہ مینوں اوہناں نال نفرت نہیں ؟ ²² ۲۲۔ میں اوہناں نال پوری طرح کینہ رکھدا ہاں ۔ اوہ میرے نزدیک دشمن بنے ہوئے نیں ۔ ²³ ۲۳۔ اے خدا مینوں پرکھ تے میرے دل نوں جان لے۔ میرے امتحان لے تے میریاں سوچاں نوں پچھان لے ۔ ²⁴ ۲۴۔ تے ویکھ پئی میں برائی دی راہ تے تردا ہاں ۔ تے مینوں پرانی راہ تے لے چل