1
. فیر خُداوند نے سیِنا دے پہاڑ تے مُوسیٰؔ نال ااوہدے مِصر ؔ دے دیس چوں نِکلن دے دوُسرے ورھے دے پہلے مہیِنے چہ کلام کرکے آکھیا۔
2
. پئی بنی اسرائیلؔ فسح اوہدے مِتھے ہوئے ویلے چہ ای کرن ۔
3
. اوس مہیِنے دے چودھویں دیہاڑے دے شام دے ویلے اوہدے مِتھے ہوئے ویلے چہ ای تُسیں ایہنوں کرو ۔ اوہدے سارے قانون تے حُکماں دے نال ؑمل چہ لیاؤ ۔
4
. تَد مُوسیٰؔ نے بنی اسرائیلؔ نُوں فسحؔ دے بارے اوہنوں دسیا ۔
5
. تے اوہ پہلے مہینِے دی چودھویں تاریخ دی شام نُوں سیِنا ؔ دے پہاڑ تے اوہنوں پُورا کرے ۔ جِس طراں پئی خُداوند نے مُوُسیٰؔ نُوں حُکم کیِتا سی ۔ بنی اسرائیل ؔ نے اوینج ای کِتا ۔
6
. تے کئی لوکی سِن جیہڑے مُردے دے سببوں پلیِت سَن ۔ تے اوہناں دے لئی اوس دیہاڑے فسح ؔ کرن دی اجازت نئیں سی ۔اوہ اوسے دیہاڑے مُوسیٰؔ تے ہارون ؔ دے کول آئے۔
7
. تے آکھیا پئی اسیں اِک بندے دی لاش دے سببوں پلیِت آں پَر بنی اسرائیلؔ دے وِچکار مِتھے ہوئے ویلے چہ خُداوند دی قُربانی چڑھان توں اسیں کیوں روکے جانے آں ۔
8
. تے مُوسیٰ ؔ نے اوہناں نُوں آکھیا ۔ کھلوجاؤ۔ جیِہدوں تیِکر میں ناں سُناں پئی خُدوند تُہاڈی بارے کیہ حُکم دیندا اے ۔
9
. تَد خُداوند نے مُوسیٰ ؔ نال کلام کر کے آکھیا ۔
10
. پئی بنی اسرائیلؔ نال کلام کر تے اوہناں نُوں آکھ پئی تُہاڈے چوں یاں تُہاڈیاں پُشتاں چوں کوئی اِنسان جیہڑا مُردے دے سببوں پلیِت ہووے یاں دُور دے سفر چہ ہووے تے اوہ خُداوَند دے لئی فسح کرے ۔
11
. دوُسرے مہیِنے دے چودھویں دیہاڑے دی شام نُوں اوہنوں کرے ۔ تے تازہ روٹی تے کوڑی سبزی دے نال اوہنوں کھان ۔
12
. اوہدے چوں صبُح تیِکر کُجھ بچیا ناں رہن دین ۔ تے اوہدی کوئی ہڈی ناں پنن ۔ فسح دی سارے حُکماں دے حِساب نال اوہنوں کرن ۔
13
. جیکر کوئی بندہ پاک ہووے تے سفر چہ ناں ہووے تے فسھ کرن توں رُک جاوے۔ تے اوہ بندہ اَپنے لوکاں چوں کڈھ دِتا جاوے گا۔ کیوں جو اوہنے خُداوند دی قُربانی اوہدے مِتھے ہوئے ویلے تے ناں چڑھائی ۔ اوس بندے دا پاپ اوہدے سِے ہووے گا ۔
14
. تے اوپرا جیہڑے تُہاڈے نال رہندا اے ۔ اوہ وی اوہنان قانوناں تے حُکماں دے حساب نال فسح کرے ۔ دوُر دا بند ے واسطے جیہڑا دیس چہ جمیا اے ۔ اِک ای قانون ہووے گا۔
15
. تے جِس دیہاڑے مَسکِن کھلاریا گیا ۔ بدل نے مَسکِن جیویں شہادت نُوں لُکایا ۔ تے رات دے ویلے ۔ صبح تیِکر اوہدے اُٗتے اَگ وَرگا حال سی ۔
16
. تے سدا تیِکر اینج ای سی ۔ بدّل اوہناں لُکائی رکھد اتے رات دے ویلے اَگ ورگا نظر آؤندا سی ۔
17
. تے جیِہدوں بدّل خیمے چوں چُکیا جاند اتے بنی اسرائیلؔ ٹُردے تے جِتھے بدّل کھلو جاندا بنی اسرائیل ؔ ڈیرا لا لیندے سَن۔
18
. خُد ا دے حُکم دے حساب نال بنی اسرائیلؔ ٹُردے سَن ۔ تے اوہدے حُکم دے حساب نال ڈیرہ لاندے سَن ۔ تے جیہنے دیہاڑیاں تیِکر بدّل مَسکِن تے کھلوتا رِہندا تے اوہ اوسے ای تھاں تے کھلوتے رہندے سَن ۔
19
. جیہدوں بدّل مَسکِن تے بوہت دیہاڑیاں تیِکر کھلوندا تے ۔ بنی اسرائیل ؔ خُداوند دی مرضی دے ظاہر ہن نُوں اُڈیکدے سَن۔ تے اَگے ناں وددھے سَن ۔
20
. تے جیہِدوں بدّل مَسکِن تے تھوڈے دیہاڑے کھلوندا تے اوہ خُداوند دے حُکم دے حساب نال ڈیرہ لاندے ۔ تے اوہدتے حُکم دے حساب نال اَگے وددھے سَن ۔
21
. جیِہدوں شام توں صبح تیِکر بدّل کھلوتا رہندا تے صبح دے ویلے اُٹھ جاندا تے اوہ ٹُر پیندے سَن ۔ تےجیِہدوں دِن دے ویلے یا رات نُوں اُٹھ جاندا تے اوہ اَپنا تنبُو بند کر لیندے سَن ۔
22
. تے جیہدوں بدّل دو دیہاڑے یا اِک مہینہ یاں اوہدے توں بوہتا مَسکِن تے کھلوتا رہندا تے بنی اسرائیلؔ اوسے ای تھاں تے رہندے ۔ تے نئیں ٹُردے سَن ۔ پَر اوہدے اُچا ہون تے ٹُر پیندے سَن ۔
23
. خُداوند دے حُکم دے حِساب نال اوہ ڈیرہ لاندے سَن ۔ تے اوہدے حُکم دے حِساب نال ٹُردے سَن ۔ اوہ خُداوند دا حُکم مندے سَن ۔ جِس طراں پئی خُداوند نے مُوسیٰ ؔ دی زبانیں آکھیا سی۔