1
۔فیر موآبؔ دیاں پیلیاں چہ یریحوُؔ دے سامنے یردنؔ دے کنڈے تے خُداند نے مُوسیٰؔ نال کلام کرکے آکھیا ۔
2
۔ بنی اسرائیلؔ نُوں حُکم دے پئی اوہ اَپنی میراث چوں لاویاں ؔ دے رہن لئی شہر دین تے شہراں دا آلا دوالا وی اوہناں نُوں دین ۔
3
۔ ایہہ شہر اوہناں دے وَسن لئی ہون گئے ۔ تے شہراں دا باہر لا حِصہ اوہناں دے ڈنگراں تے پشواں تے حیواناں لئی ہووے گا ۔
4
۔ تے شہر دا آلا دوالا جو تُسیں لاویاں ؔ نُوں دیو گے ۔ اوہ شہر دی کندھ دے باہروں چواں پاسے ہزار ہزار قدم ہووے گا ۔
5
۔ تے اوہناں دی شہروں باہر دی پیمایش پُورب وَل دو ہزار ہَتھ تے دَکھن وَل دو ہزار ہَتھ تے پَچھم وَل دو ہزار ہَتھ تے اُتر وَل دو ہزار ہَتھ ہووے گی ۔ تے شہر وِچکار ہووے گا ۔ ایہہ ای اوہناں دے شہراں دا باہرلا پاسا ہووے گا۔
6
۔ تے جیہڑے شہر تُسیں لاویاں ؔ نُوں دیو گے ۔ تے اوہناں وِچوں چھے شہر پناہ دے شہر ہون گے۔ اوہناں نُوں تُسیں وکھریاں کرو ۔ تاں جو خُونی اوہناں چہ پناہ لین ۔ تے ایدھےتوں علاوہ تُسیںاوہناں نُوں بیالی شہر ہور دیو ۔
7
۔ تے اوہ سب شہر جیہڑے تُسیں دے آلے دوالے دے نال دیو گے اڑتالی شہر ہون گے ۔
8
۔ ایہہ شہر جیہڑے تُسیں بنی اسرائیل ؔ دی ملکیت چوں دیو گے ۔ جیہناں کول بوہتا اے اوہناں توں بوہتا لوؤ۔ تے جیہناں کول تھوڑا اے تے اوہناں توں تھوڑا لوؤ ۔ ہر اِک پنے شہراں چوں اَپنی میراث دے مُطابق اوہنوں مِلی اے لاویاں ؔ نُوں دے دیو۔
9
۔ تے خُداوند نے مُوسیٰ ؔ نال کلام کرکے آکھیا ۔
10
۔ بنی اسرائیلؔ نُوں حُکم دے تے آکھ۔ پئی جیہدوں تُسیں یردنؔ توں لنگ کے کنعان ؔ دے دیس چہ جاؤ ۔
11
۔ تے اَپنے لئی ایہو جئے شہر بنانا ۔ جیہڑے تُہاڈے لئی پناہ دے شہر ہون ۔ تاں جو خُونی جیہدےکولوں انجانے چہ خُون ہو گیا ہووے ، اوتھے پناہ لوے ۔
12
۔ ایہناں شہراں چہ تہانوں بدلہ لین والیاں توں پناہ مِلے گی ۔ جیدوں تیِکر خُونی جماعت دےاَگے فیصلے لئی ناں کھلوئے ۔ قتل ناں کیِتا جائے۔
13
۔ اوہ شہر جیہناں نُوں تُسیں پناہ لئیوکھرے کرو گے ، چھے شہر ہون گے ۔
14
۔ ایہناں وِچوں تِن شہر یردنؔ دے پار تے تِن شہر کنعان دے دیس چہ ہون گے ۔
15
۔ بنی اسرائیلؔ دے لئی تے پردیسیاں دے لئی تے مُسافراں دے لئی جہڑے تُہاڈے نال وَسدے نیں ۔ ایہہ چھے شہر پناہ دی تھاں ہون گے ۔ تاں جو کِسے کولوں بھُل چُک چہ قتل ہو گیا ہووے تے اوتھے پناہ لوے ۔
16
۔ کِسے نے کِسے نُوں لوہے دے ہتھیا ر نال ماریا تے اوہ مر گیا تے مارن والا خُونی اے ۔ تے اوہ ضرور مار دِتا جاوے ۔
17
۔ یا کوئی ایہو جیہا پتھر ہَتھ چہ لَے کے ماریا ۔ جیہدے نال کوئی مَر جاوے تے اوہ خُونی اے ۔ تے خُونی ضرور مار دِتا جائے ۔
18
۔ یا کِسے نے یہو جیہی لکڑی اَپنے ہَتھ چہ لئی ۔ جِدھے نال کوئی مر سکدا اے تے اوہ مر گیا تے اوہ خُونی اے ۔ تے خُونی ضرور مار دِتا جائے ۔
19
۔ قتل ہون والے دا وارِث خُونی نُوں آپ قتل کر دے ۔ جیہدوں وی اوہ اوہنوں مِلے مار دیوے ۔
20
۔ جے کوئی کِسے نُوں ویر نال دھکا دیوے یا چھئی لائے یا اوہدے تے کوئی شے سُٹے تے اوہ مَر جاوے ۔
21
۔ یا وَیر دے پاروں اوہنوں اَپنے ہَتھ نال ناں مارے ۔ تے اوہ مَر جاوے تے مارن والا قتل کیتا جاوے۔ کیوں جو اوہ خُونی اے ۔ تے قتل ہون والے دا وارِث جِس ویلے خُونی نُوں لبھے اوہنوں مار دیوے ۔
22
۔ تے کوئی بغیر وَیر توں کِسے نُوں دھکا دیوے ۔ تے بغیر مَرضی دے کوئی شے کِسے اُتے سُٹے ۔
23
۔یا کوئی ایہو جیہا پتھر جیہدے نال کوئی مر جاوے اوہ اوہدے نال وَیر نئیں سی رکھدا تے ناں اوہدا بُرا چاہندا سی ۔
24
۔ تے جامعت اوہناں حُکماں دے مُطابق خُونی تے قتل ہون والے دے وارث دے وِچکار فیصلہ کرے ۔
25
۔ تے جماعت خُونی نُوں قتل ہون والے دے وارِث دے ہَتھوں چھُڈا لے ۔ تے اوہنوں پناہ دے شہر چہ جِتھے اوہنے پناہ لئی سی ۔ فیر گھل دیوے ۔ تے اوہ اوتھے رہوے ۔ جیہدوں تیِک پئی سردار کاہن جیہڑا مُقدس تیل نال مَسح کیتا گیااے مَر ناں جاوے ۔
26
۔ جے خُونی پناہ دے شہر دی حَد چوں جِتھے اوہ پناہ لین گیا، باہر نِکلیا۔
27
۔ تے قتل ہون والے دا وارِث اوہنوں پناہ دے شہر دی حد توں باہر ویکھے تے قتل ہون والے دا وارِث خُونی نُوں مار دیوے ۔ تے اوہ خُون کرن دا مُجرم ناں ہووے گا۔
28
۔ تاں جو لازمی سی پئی اوہ خُونی اَپنے پناہ دے شہر چہ سردار کاہن دے فوت ہون تیِکر رہندا۔ تے سردار کاہن تے فوت ہون توں مگروں خُونی اَپنی دھرتی تے جیہدا اوہ وارثاے ، پَرت آوے ۔
29
۔ تے تُہاڈے سارے ڈیریاں چہ نسل دَر نسل ایہہ قانونی فیصلہ ہووے گا۔
30
۔ جے کوئی کسے نُوں مار چھڈے ۔ تے گواہاں دی گواہی نال خُونی مار دِتا جاوے ۔ پَر جے اِکو ای گواہ ہووے تے اوہدی گواہی نال کوئی ماریا ناں جاوے ۔
31
۔ تے جیہڑے خُونی تے خُون کرن دا فتویٰدِتا گیا اے ۔ تُسیں اوہدے کولوں خُون دا جُرمانہ ناں لوؤ۔ اوہ قتل کیتا جاوے ۔
32
۔ تے تُسیں اوس خُونی نُوں جیہنے شہر چہ پناہ لئی ہووے ۔ ایس لئی خُون دا جُرمانہ ناں لوؤ ۔ پئی اوہ سردار کاہن دے فوت ہوون توں پہلاں اَپنی دھرتی تے فیر رہن لئی پَرت آوے ۔
33
۔ تُسیں جیہڑے دیس چہ ہے او، ناپاک ناں کرو ۔ کیوں جو خُون دھرتی نُوں ناپاک کردا اے ۔ تے جیہڑا خُون اوہدے تے وگایا گیا ہووے ۔ اووہدا کفارہ نئیں ہو سکدا ۔ سوائے ا یدھے پئی خُون کرن والے دا خُون کیِتا جاوے ۔
34
۔ ایس لئی جیہڑے دیس چہ تُسیں رہندے او۔ اوہنوں ناپاک ناں کرو ۔ تے میں اوہدے چہ رہنا واں ۔ کیوں جو میں خُداوند بنی اسرائیلؔ چہ رہنا واں ۔