¹ ۔تے بنی یُوسفؔ دے خانوادیاں چوں منسیؔ دے پُتر مکیر ؔ نُوں بنی جلعادؔ دے گھرانے دے جَدی سردار آئے ۔ تے مُوسیٰؔ تے بنی اسرائیلؔ دے جدی گھرانیاں دے اَگے جیہڑے بنی اسرائیلؔ دے جدی گھرانیاں دے سر دار سَن ۔ کلام کرکے آکھیا ۔ ² ۔ پئی خُداوند نے ساڈے مالک نُوں آکھیا ۔ پئی بنی اسرائیل ؔ نُوں قُرعہ پا کے دیس میراث چہ دِتا جاوے ۔ تے ساڈے آقا نے خُدواند توں حُکم لیا پئی ساڈے بھرا صلافحادؔ دی میراچ اوہناں دھیاں نُوں دِتی جاوے ۔ ³ ۔ تے جے اوہ بنی اسرائیل ؔ دے ہور قبیلیاں چہ وہیائیاں گئیاں تے ساڈی جدی میراث چوں اوہناں دی میراث نِکل جائے گی ۔ تے جہناں نال اوہ وہیایاں جان گئیاں۔ اوہناں کول ٹُر جاوے گی ۔ تے ساڈی میراث دا حِصہ گھٹ ہو جاوے گا۔ ⁴ ۔ تے جِہدوں بنی اسرائیلؔ لئی جُوبلی دا ور ھا آوے گا ۔ تے اوہناں دی میراث اوس قبیلے دی میراث چہ جِہناں نال اوہ وہیایاں جان گئیاں رَل جائے گی ۔ تے ساڈے جدی قبیلے دی میراث چوں اوہناں دی میراث نِک جائے گی ۔ ⁵ ۔ تد موُسیٰ ؔ نے خُدا دے حُکم نال بنی اسرائیلؔ نُوں جواب دِتا۔ پئی بنی یُوسفؔ دا قبیلہ ٹھیک آہندا اے ۔ ⁶ ۔ ایس لئی خُداوند صلافحاد ؔ دیاں دھیاں دے بارے ایہہ حُکم دیندا اے پئی جِہنوں اوہ چنگا سمجھن ۔ اوہناں دے نال ویاہ کرن ۔ پَر چنگا ایہہ اے ای پئی اوہ اوہدے پیو دے قبیلے دے دے ٹبر چوں ہووے۔ ⁷ ۔ تاں جو بنی اسرائیلؔ دی میراث اِک قبیلے چوں دوُجے قبیلے چہ ناں جاوے ۔ سگوں بنی اسرائیلؔ چوں ہر کوئی اَپنے جدی قبیلے دی میراث نُوں سانبھی رکھے ۔ ⁸ ۔ تے ہر اِک کُڑی جیہڑی بنی اسرائیل ؔ دے قبیلیاں چوں میراث لوے ۔ اوہ اَپنے پیو دے قبیلے دے ٹبر چوں کِسے دی گھر والی اے ۔ تاں جو بنی اسرائیل ؔ چوں ہر کوئی اَپنی جدی میراث دا وارِث رہوے ۔ ⁹ ۔ تے اِک قبیلے دی میراچدوُجے قبیلے دی میراث نال رَل ناں جاوے ۔ سگوں بنی اسرائیل ؔ دا ہر قبیلہ اَپنی میراث تے قائم رہوے ۔ ¹⁰ ۔ تد صلا فحاد دیاں دھیاں نے جِسراں خُداوند نے مُوسیٰ ؔ نُوں آکھیا سی اوسراں ای کیِتا ۔ ¹¹ ۔ تے محلاہ ؔ تے تِرضاہ ؔ تے حُجلاہؔ تے مِلکاہ ؔ تے نوعاہؔ جیہڑیاں صلافحاد ؔ دیاں دھیاں سَن ۔ اَپنے چاچیاں دے پُتراں نال وہیایاں گئیاں ۔ ¹² ۔ تے اوہناں دی میراث اوہناں دے پیو دے قبیلے چہ ای رہی ۔ ¹³ ۔ ایہہ اوہ حُکم تے قانون نیں جیہڑے مُوسیٰ ؔ دی زبانی خُداوند نے موآبؔ دیاں پیلیاں چہ یریحوُؔ دے اَگے یردنؔ تے دِتے ۔