¹ ۔ تے خُداوند نی مُوسیٰ ؔ نال کلام کردیاں ہوئیاں آکھیا ۔ ² ۔ تُوں بنی اسرائیل ؔ نال خطاب کر تے اوہناں نُوں آکھ ۔پئی میراچڑھاوا یعنی نیری اوہو غذا جیہڑی سوختنی قُربانی دی دِل نوش کرن والی ۔خوشبُو اے ۔ تُسیں چنگی طرحاں یاد رکھو ۔ تے بنھّے ہوئے ویلے دے مُطابق اوہناں نُوں گُزارنو ۔ ³ ۔ تے تُوں اوہناں نُوں آکھ پئی سوختنی قُربانی جیہڑی تُسی خُداوند دے اَگے نذر کرو ۔ اوہ ایس طرحاں اے پئی ہر روز اِک ورھے دے دو بے عیب لیلے دائمی سوختنی قُربانی دے لئی ۔ ⁴ ۔ اِک لیلا سویر دے ویلے تے اِک لیلا دُجا شام دے ویلے ۔ ⁵ ۔ تے اوہدے نال ایفہ دے دسویں حصے دے برابر ، چنگی طرحاں دلیا ہوئیا میدہ ۔ تے ہین دا چوتھا حصہ چنگی طرحاں صاف کیتے ہوئے تیل چہ رَلا کے قُربانی دے تیل دے طور تے نذر کرن ۔ ⁶ ۔ ایہہ سوختنی قُربانی اے ۔ جِس طرحاں تُوں سیناؔ دے پہاڑ تے خُدواند دے لئی ودھیا خُوشبو دے لئی سوختنی قُربانی نذر کیِتی ۔ ⁷ ۔ تے ہیِن دے چوتھے حصے دے برابر مے وی اِک لیلے لئی لیاویں ۔ تےمُقدس دے وِچ ای خُداوند دے اَگے ایہہ قُربانی چڑھاویں ۔ ⁸ ۔ تے ودُجا لیلا شام نُوں نذر کرئیں ۔ سویر دے ویلے وانگوں قُربانی تے مے بلدی ہوئی خُداوند دے لئی ودھیا خُوشبو دی سوختنی قُربانی نذر کرئیں ۔ ⁹ ۔ تے سبّت دے دِن لئی دو بے عیب لیلے اِک سال دے تے اوہدے نال ایفہ دے پنجویں حصے دے برابر میدہ جیہدے چہ دلیا ہووے ، بلدی اَگ چہ نذر کرئیں ۔ ¹⁰ ۔ دائمی سوختنی قُربانی تے بلدی اَگ دے علاوہ ایہہ ہر سبّت دی سوختنی قُربانی اے ۔ ¹¹ ۔ تے اَپنے مہینیاں دے شروع چہ ایہہ سوختنی قُربانی خُداوند دے لئی نذر کرو ۔ دو وچھے اِک بھیڈو تے ۔ اِک اِک سال دے سَت بے عیب لیلے۔ ¹² ۔ تے ایفہ دسویں حصے دا تیسرا حصہ میدہ جیہدے چہ تیل رَلیا ہووے ۔ ہر اِک وَچھے دے نال نذر دی قُربانی دے لئی ۔ فیر ایفہ دے پنجویں حِصے دے برابر میدہ تیل چہ رَلیا ہوئیا ۔ ہر اِک بھیڈو دے نال نذر دی قُربانی دے لئی ۔ ¹³ ۔تے ایفہ دا دسواں حصہ میدہ تیل چہ رَلیا ہوئیا ہر اِک لیلے دے نال نذر دی قُربانی لئی ۔ ایہہ سوختنے قُربانی دے لئی ودھیا خُوشبو والی بلدی ہوئی قُربانی ہووے گی ۔ ¹⁴ ۔ تے اوہدے ساڑن لئی ادھا ہین مے ہر اِک وَچھے دے لئی تے تیِجا ہین بھیڈو دے لئی تے چوتھا ہین ہر اِک لیلے دے لئی ورھے دے ہر مہینے دے لئی ایہہ سوختنی قُربانی ایں ۔ ¹⁵ ۔ تتے دائمی سوختنی قُربانی دے علاو ہ خطا دی قُربانی دے لئی اِک بکرا نال ای بلدی اَگ دے نال خُداوند دے اَگے نذر کیِتا جاوے ۔ ¹⁶ ۔ تے پہلے مہینےدی چودھویں نُوں خُدا دی فسح ہووے گی ۔ ¹⁷ ۔ تے اوہدی پندرھویں نُوں عید ہووے گی ۔ تے تُسیں سَت دِن کھمیری روٹی ناں کھیا جے ¹⁸ ۔ تے اوہناں چوں پہلے دِن وِچ پوتر محفل اے ۔ تے تُسیں غُلامی والے کم ناں کرو ۔ ¹⁹ ۔ تے تُسیں خُداوند دے لئی سوختنی قُربانی یعنی سڑدی ہوئی قُربانی نذر کریا جے ۔ دو وَچھے تے اِک بھیڈو تے سَت اِک اِک سال دے بے عیب لیلے ۔ ²⁰ ۔ تے ااہناں دی نذر دی قُربانی ایفہ دے دسویں حِصے دا تیِجا حصہ میدہ تیل چہ رَلیا ہوئیا ۔ ہر وَچھے دے لئی ۔ تے ایفہ دا پنجواں حصہ بھیڈو دے لئی نذر کرو ۔ ²¹ ۔ تے ستاں لیلاں چوں ہر اِک لیلے دے لئی ایفہ دا دسواں حِصہ ۔ ²² ۔ تے خطادی قُربانی دے لئی اِک بکرا تاں جو تُہاڈا کفارہ دِتا جاوے ²³ ۔ سویر دی سوختنی قُربانی دائمی سوختنی قُربانی دے علاوہ تُسیں ایہہ نذر کریا جے ۔ ²⁴ ۔ تے ایس طرحاں ای ستاں دِناں چہ ہر اِک دِن تُسیں خُداوند دے لئی سوختنے قُربانی دی ایہہ غذا ودھیا خُوشبُو نذر کرو ۔ ایہہ دائمی سوختنی قُربانی قُربانی دے علاوہ ہووے گا ۔ ²⁵ ۔ تے ستویں دِن تُہاڈے لئی مُقدس محفل ہووے گی ۔ تُسیں کوئی غُلامی والا کم ناں کرو ²⁶ ۔ تے پیلے پھلاں دے دیہاڑے جہدوں تُسیں نویں نذر دیاں قُربانیاں ہفتیاں دے پُورا ہوون تے خُداوند دی نذر کرو ۔ تُہاڈے لئی مُقدس محفل ہووے گی ۔ کوئی غُلامی والا کم ناں کرو۔ ²⁷ ۔ تے خُداوند دے لئی ودھیا خُوشبُو والی سوختنی قُربانی نذر کرو ۔ دو وَچھے اِک بھیڈو تے اِک اِک سال دے سَت لیلے ۔ ²⁸ ۔ تے اوہدے نال نذر دی قُربانی دے لئی ایفہ دسویں دا تیِجا حِصہ میدہ تیل چہ رَلیا ہوئیا ۔ ہَر اِک وچھے دے لئی تے ایفہ دا پنجواں حصہ بھیڈو دے لئی ۔ ²⁹ ۔ تے ستاں لیلیاں دے لئی ایفہ دا دسواں حصہ ہر لیلے دے لئی ۔ ³⁰ ۔ تے اِک بکرا جیہڑا تُہاڈے کفارے لئی قُربان کیِتا جاوے ۔ ³¹ ۔ تُسیں اوہو دائمی سوختنی قُربانی دے علاوہ نذر کرنا ۔ تے تُہاڈیاں نذر دیاں قُربانیاں بلدیاں ہوئیاں تے بے عیب ہوون ۔