1
۔تے خُداوند نت مُوسیٰؔ تے ہارونؔ نال کلام کرکے حُکم دِتا ۔
2
۔ پئی شرعی فرض جِہدے بارے خُداوند مَیں حُکم دِتا اے ۔ ایہہ وے ۔پئی بنی اسرائیلؔ نُوں آکھ دے ، پئی لال رنگ دی اِک بے عیب تے بے داغ وَچھی جِہدے اُتے کدی وی پنجالی نئیں رَکھی گئی ، تیرے کول لیاؤن ۔
3
۔ تے تُسیں اوہنوں الیعزؔ کاہن نُوں دیو ۔ تے اوہ اوہنوں خیمہ گاہ توں باہر لے جان تے اوہ اوہدے سامنے دَفع کیِتی جاوے ۔
4
۔ تَد الیعز رؔ کاہن اوہدے لہُو وِچ اَپنی اُنگلی اُتے لاوے تے حضُوری دے خیمے دے اَگلے پاسے اوہدے لہُو وِچوں سَت واری چھِڑکے ۔
5
۔ تے فیر اوہدیاں اَکھاں دے سامنے اوہ وَچھی ساڑی جاوے ۔ اوہدی کھَل اوہدے گوشت تے لہُو تے اوہدی غلاظت سَنھے ۔
6
۔ تد کاہن دیو دار دی لکڑی تے زُوفا تے قِرمزی دھاگا لوے تے اوہنوں اوس اَگ دے بھانبڑ وِچ وَچھی نُوں ساہڑیاں دیوے ۔
7
۔ تَد کاہن اَپنے کپڑیاں تے اَپنے جُسے نُوں پانی نال دھووے تے مگروں اوہدے خیمے گاہ وِچ آوے ۔ تے کاہن شام تیِکر ناپاک رہو ے گا ۔
8
۔ تے جِہنیں اوہنوں ساہڑیا ، اوہ وی اَپنا لِباس تے اَپنا جُسہ پانی نال دھو دے ۔ اوہ شام تیِکر ناپاک رہوے گا ۔
9
۔ تے اِک پاک بندہ وَچھی دی سواہ نُوں کٹھا کرے ۔ تے خیمہ گاہ دے باہر اوہنوں پاک تھاں وِچ رَکھے گا ۔ تاں جو اوہ بنی اسرائیلؔ لئی پاک کرن والے پانی دے لئی سنبھال کے رَکھی جاوے ۔ ایس لئی پئی اوہ خطا لئی قُربانی اے ۔
10
۔ تے جِہنے وَچھی دی سوا کٹھی کیِتی ، اَپنیاں کپڑیاں نُوں دھووے ۔ تے اوہ شام تیِک ناپاک رہوے گا ۔ تے ایہہ بنیہ اسرائیلؔ لئی تے پَردیسی لئی جیہڑا اوہناں وِچ رہوے ، سدا تیِکر فرض اے ۔
11
۔ تے جے کر کوئی بندہ انسان دی لاش نُوں ہَتھ لاوے ۔ تے فیر اوہ سَتاں دیہاڑیاں تیِکر ناپاک رہوے گا ۔
12
۔ اوہ اَپنے تائیں اوس پانی نال تیِجے دیہاڑے تے ستویں دیہاڑے پاک کرے۔ تاں پاک ہووے گا ۔ تے جے کر اوہ اَپنے تائیں تیِجے دیہاڑے تے ستویں دیہاڑے پاک ناں کرے ۔ تاں اوہ پاک نئیں ہووے گا ۔
13
۔ جِہنیں وی اِنسان دی لاش نُوں ہَتھ لایا ہووے تے پاک ناں کیِتا گیا ہووے ۔ اوہنے خُداوند دے مَسکن نُوں ناپاک کیِتا ۔ اوہ بندہ اسرائیلؔ وِچوں باہر کڈھ دِتا جاوے گا ۔ ایس لئی پئی اوہدے اُتے پاک کرن والا پانی نئیں تراؤنکیا گیا۔ اوہ ناپاک اے تے اوہدے وِچ ناپاکی باقی اے۔
14
۔ جے کے کوئی بندہ کِسے خیمے وِچ مَر جاوے ۔ تے فیر اوہدے بارے وِچ ایہہ شریعت اے ۔ پئی جیہڑا وی اوس خیمے وِچ آو ے۔ تے ساریاں شیواں جیہڑیاں وِچ موجُود نیں ، سَت دِناں تیِکر ناپاک رہن گئیاں ۔
15
۔ تے ہَر اِک کھُلا بھانڈا جِہدے اُتے ڈھکن ناں ہووے ناپاک ہووے گا ۔
16
۔ تے جیہڑا کوئی وی میدان وِچ تلوار نال قتل کیِتا ہووے یاں مُردے نُوں یاں اِنسان دی ہڈی نُوں یان قبر نُوں ہَتھ لاوے ۔ تے فیر اوہ سَتاں دیہاڑیاں تیِک ناپاک رہوے گا ۔
17
۔ تُوں اوس ناپاک بندے لئی ساہڑی ہوئی خطادی قُربانی دی سواہ بھانڈے وِچ لئی جاوے تے اوہدے اُتے اوہدے وَگدا پانی روہڑیا جاوے ۔
18
۔ تے اِک پاک زوُفا لوے تے اوس پانی وِچ ڈوبے تے خیمے اُتے تے ساریاں بھانڈیاں اُتے تے سبھو آدمیاں اُتے جیہڑے اوہدے اندر سَن ۔ تے اوہدے اُتے جَہنیں مقتُول نُوں یاں ہَڈی نُوں یاں مُردے نُوں یاں قبر نُوں ہَتھ لایا ہووے ، تَراؤنکے ۔
19
۔ پاک بندہ ناپاک اُتے تیِجے دیہاڑے تے ستویں دیہاڑے تراؤنکے ۔ تے ستویں دیہاڑے اوہنوں کرے ۔ تَد اوہ اَپنے کَپڑے دھووے ۔ تے پانی نال نہاوے تے فیر شام ویلے اوہ پاک ہووے گا ۔
20
۔ تے جیہڑا بندہ ناپاک ہویا ہووے ۔تے اوہنے اَپنے تائیں پاک نئیں کیِتا ۔ تے فیر اوہ گرو ہ وِچوں باہر کڈھیا جاوے ۔ ایس لئی پئی اوہنے خُداوند دے مُقدس نُوں ناپاک کیِتا ۔ تے جِہدوں تیِکر پاک کرن والا پانی نال تراؤنکیا جاوے ، اوہ ناپاک اے ۔
21
۔ ایہہ اوہناں لئی سدا تیِکر فرض ہووے گا ۔ تے جیہڑا پانی تراؤنکے اوہ اپنے کپڑے دھووے ۔ تے جیہڑا پاک کرن والے پانی نُوں ہَتھ لاوے ، شام تیِکر ناپاک رہوے گا۔
22
۔ تے ہَر اِک شے جِہنوں ناپاک بندہ ہَتھ لاوے ناپاک ہووے گی ۔ تے جیہڑا کوئی اوس ناپاک شے نُوں ہَتھ لاوے ناپاک ہووے گی ۔ تے جیہڑا وی اوس ناپاک شے نُوں ہَتھ لاوے ، شام تیِکر ناپاک رہوے گا ۔