¹ ۔تے خُداوند نے ہارونؔ نُوں حُکم دِتا ۔ پئی مَقدِس دے بارے پاپ دا بھار تیرے تے تیرے پُتراں تے تیرے نال تے تیرے پیو دے گھرانے اُتے ہووے گا ۔ تُہاڈی کہانت دا بھار وی تیرے تے تیرے پُتراں اُتے ہووے گا ۔ ² ۔ تے تُوں اپنے لاویؔ بھراواں دے قبیلے ، مطلب ایہہ پئی اپنے پیو دے قبیلے نُوں اَپنے نال لیا ۔ تاں جو تیرے نال مِلن تے تیری تے تیرے پُتراں دی سیوا کرن ۔ پَر تُوں تے تیرے نال تیرے پُتر شہادت دے خیمے دے سامنے رِہن ۔ ³ ۔ تے اوہ تیرے حُکماں تے خیمے دےسارے کماں اُتے غور کرن ۔ پَر مُقدس بھانڈیاں تے مذبح دے نیڑے ناں آؤن ۔ تاں ایہہ ناں ہووے پئی اوہ مَر جان تے تُسیں وی اوہناں دے نال ہلاک ہوؤ۔ ⁴ ۔ اوہ تیرے نال مِلن ، تے حضُوری دے خیمے دی رَکھوالی تے اوہدی پُوری سیوا کَرن ۔ تے کوئی اوپرا بندہ تُہاڈے نیڑے ناں آوے ۔ ⁵ ۔ تے تُسیں مَقدِس تے مذبح دی رکھوالی کرو ۔ تاں جو بنی اسرائیلؔ اُتے فیر غضب ناں پَوے ۔ ⁶ ۔ تے ویکھو۔ میں بنی اسرائیلؔ وِچوں تُہاڈے بھراواں نے لاویؔ نُوں لیا ۔ تے اوہناں نُوں خُداوند لئی تُہاڈ اہدی ٹھہرایا۔ تاں جو اوہ حضُوری دے خیمے دی سیوا چہ لگے رہن ۔ ⁷ ۔ تے تُوں تے تیرے نال تیرے پُتر اَپنی کہنات دیاں اوہناں ساریاں شیواں وِچ جیہڑیاں مذبحےلئی نیں ۔ تے یاں پَردے دے اَندر نیں ۔ رکھوالی کرو تے سیوا کرو ۔ ایس لئی میں تُہاڈی کہانت نُوں عَطّیہ دی خِدمت کیِتا اے ۔ جے کر کوئی اوپرا بندہ نیڑے آوے گا تے فیر ماریا جاوے گا ۔ ⁸ ۔ تے خُداوند نے ہارونؔ نُوں آکھیا ۔ پئی میں ایہناں ساریاں اُٹھایاں ہوئیاں قُربانیاں دا بَچیا ہوئیا تیرے سپُرد کیِتا ۔ بنی اسرائیلؔ دیاں دیاں ساریاں پاک شیواں وِچوں ایہہ تیرے ممسوح ہون دا حَق ٹھہرا کے تینوں تے تیرے پُتراں نُوں سدا تیِکر حَق دے طور تے دِتا اے ۔ ⁹ ۔پاک تریِن شیواں وِچوں ایہہ تیرا ہووے گا ۔ اوہناں دیاں ساریاں قُربانیاں ، مطلب ایہہ پئی نذر دیاں قُربانیاں تے خطا دیاں قُربانیاں تے تقصیر دیاں قُربانیاں جیہڑیاں اوہ میرے لئی لیاؤن ۔ ایہہ پاک ترین شیواں تیری تے تیرے پُتراں دیاں ہون گئیاں ۔ ¹⁰ ۔ تُوں اوہناں نُوں اِنتہائی پاک تھاں اُتے کھانا ۔ اوہناں وِچوں کلے مَرد کھان ۔ اوہ تیرے لئی مُقدس ہون ۔ ¹¹ ۔ تے اوہناں دے ہدیاں وِچوں ایہہ تیرا اے ۔ بنی اسرائیلؔ دیاں ساریاں ہلائیاں قُربانیاں ،میں تینوں تے تیرے پُتراں تے دھیاں نُوں سدا تیِکر حَق دے طور تے دِتیاں نیں ۔ تیرے گھر دے اند جیہڑے پاک نیں اوہناں نُوں کھا سکدے نیں ۔ ¹² ۔ سَبھو چنگا تیل تے مَے تے گیہوں دےپَہلے پھَل جیہڑے اوہ خُداوند لئی لیاؤن، میں تینوں دِتے ۔ ¹³ ۔ تے اوہناں دی زمین دے پہلے پَکّے ہوئے پھَل جیہڑے اوہ خُدوند لئی لیاؤن تیرے ہون تے تیرے گھر دے اند ر جیہڑے پاک نیں اوہنوں کھان ۔ ¹⁴ ۔ بنی اسرائیلؔ دی مسحّ کیتی ہوئی ہَر اِک شَے تیری اے ۔ ¹⁵ ۔ رحم نُوں کھولن والا ، کیہ انسان تے کیہ حیوان ، جِہنوں اوہ خُداوند لئی قُربانی لئی لیاؤن تیرا اے ۔ اِنسان دے پلوٹھے تے حرام کیِتے ہوئے چَوپایاں دے پلوٹھیاں دا تُوں ، فدیہ لویں ۔ ¹⁶ ۔ تے بندے دا فِدیہ ، جِد اوہ اِک مہینے دا ہووے ، پَنج مَثقال مَقدِس دے مِثقال دے حساب نال ہووے گا ۔ تے اوہ ویہ جیرے دا اے ۔ ¹⁷ ۔ پَر گاں تے بھیڈ تے بکری دے پہلے بچیاں دا تُوں فِدیہ ناں لویں ۔ ایس لئی پئی اوہ پاک نیں ۔ اوہناں دا خُون تُوں مذبح اُتے چھڑکیں گا ۔ تے اوہناں دی چَربی سوختنی قُربانی دے لئی ساڑیں گا ۔ پئی خُداوند لئی اعلےٰ خُوشبُو ہووے ۔ ¹⁸ ۔ تے اوہناں دا گوشت تیرا ہووے گا ۔ جیویں ہلایا ہویا سیِنہ تے سجّا موہڈا تیرا ہووے گا ۔ ¹⁹ ۔ تے ساریاں پاک شیواں جیہڑیاں بنی اسرائیلؔ خُدواند لئی لیاؤن گے ۔ میں تینوں تے تیرے پُتراں نُوں تے تیریاں دھیاں نُوں ہمیشاں دے حَق دے طور تے دِتیاں ۔ لُون دا یہہ معاہدہ زمانے دے اَخیر تیِکر خُدواند دے سامنے تیرے لئی تے تیری نَسل لئی ہووے گا ۔ ²⁰ ۔ تے خُداوند نےہارونؔ نُوں حُکم دِتا ۔ پئی تُوں اوہناں دے دیس وِچ میراث ناں لویں ۔ تے ناں اوہناں وِچ تیرا حِصہ ہووے گا ۔ ایس لئی پئی بنی اسرائیلؔ دے وِچ حصہ تے تیری میراث میں واں ۔ ²¹ ۔ پَر بنی لاویؔ لئی اوس سیوا دے بدلے جیہڑے اوہ حضوری دے خیمے وِچ کرن گے ۔ میں بنی اسرائیلؔ دیاں ساریاں دہ یکیاں میراچ کر دِتیاں نیں ۔ ²² ۔ تے اَگے توں بنی اسرئیلؔ حضوری دے خیمے دے نیڑے ناں آؤن ۔ اینج ناں ہووے پئی اوہناں دا پاپ اوہنے دے سِر پوے ۔ تے اوہ ہلاک ہو جان ۔ ²³ ۔ سگوں لاویؔ وی حضُوری دے خیمے دی سیوا کرن ۔ تے ایہہ اوہناں ای دا ذِمہ ہووے گا ۔ ایہہ اِک فرض سدا تیِکر تُہاڈی پُشتاں وِچ ہووے گا ۔ تے بنی اسرائیلؔ وِچ اوہناں دی میراث نئیں ہووے گی ۔ ²⁴ ۔ ایس لئی پئی بنی اسرائیلؔ دیاں دہ یکیاں جیہڑیاں اوہ خُداوند دے اَگے نذراں لیاؤن گے ۔ میں لاویاں ؔ دی میراث کَر دِتی اے ۔ ایسے لئی میں اوہناں دے بارے آکھنا واں ، پئی اوہ بنی اسرائیلؔ دےوِچ میراث نئیں پاؤن گے ۔ ²⁵ ۔ تے خُدوند نے مُوسیٰؔ نال کلام کرکے حُکم دِتا۔ ²⁶ ۔ تُوں لاویاں ؔ وِچ اعلان کر ، تے اوہناں نُوں آکھ دے پئی ۔ جِہدوں تُسیں بنی اسرائیلؔ کولوں دہ یکیاں لویں ، جیہڑیاں میں تُہاڈی میراثکر دیتیاں نیں ۔ تُوں ہر دہ یکی دی دہ یکی خُدوند لئی نذر لیاؤ۔ ²⁷ ۔تے فیر تُہاڈی نذراں کھلیہان تے کولُہو دے نذرانے وانگوں جانی جاوے ۔ ²⁸ ۔ تے ایسے طرحاں ای تُہاڈیاں ایہنیاں ساریاں دہ یکیاں وِچوں جیہڑیاں تُسیں بنی اسرائیل ؔ کولوں لوؤ ۔ خُداوندلئی نذر لیاؤ ۔ ²⁹ ۔ تے تُہاڈیاں نذراں جیہڑیاں ایہناں ہدیاں وِچوں تُسیں خُداوند لئی لیاؤ ۔ ساریاں نالوں چنگیاں تے پاک شیواں ہون ۔ ³⁰ ۔ تے تُوں اوہناں نُوں آکھ ، پئی جِہدوں تُسیں چنگے توں چنگا حِصے دا نذرانہ دیو۔ فیر دہ یکیاں توں بچیا ہویا ۔ لاویاں ؔ لئی کھلیہان تے کولہُو دی پیداوار وانگوں ہووے گا ۔ ³¹ ۔ تے تُسیں تے تُہاڈا ٹبر اوہنوں کِسے وی تھاں کھاؤ ۔ ایس لےلئی اوہ حضوُری دے خیمے دی سیوا لئی تُہاڈی اُجرت اے ۔ ³² ۔ تے جے کر تُسیں اپنیاں چنگیاں شیواں دا نذرانہ لیاؤ گے ۔ تے اوہدے سببوں تُسیں گُہنگار نئیں ہوو گے ۔ پَر تُسیں بنی اسرائیلؔ دیاں مُقدس شیواں نُوں ناپاک ناں کریو ۔ تاں جو تُسیں ہلاک ناں ہو جاؤ ۔