1
۱۔ سونے نے اپنی آب و تاب کھو دتی اے۔ تے کھرا سونا کیویں بدل گیا اے۔ پاک موتی ہر گلی چ کھلرے ہوئے نیں۔
2
۲۔ صیون دے عزیز پتر جہیڑے وزن چہ خالص سونے وانگر نیں کمیاردے بنائے ہوئے بھانڈیاں وانگر ہو گئے نیں۔
3
۳۔ گدڑ وی اپنی چھاتی توں اپنے بچیاں نوں دودھ پیاندے نیں پر میری قوم دی بیٹی جنگل دے شتر مرغ وانگر بے رحم ہو گئی اے۔
4
۴۔ دودھ چنگن والے دی جیب پیاس توں تالو نال جا لگی اے۔ نیانے روٹی منگدے نیں پر اوہناں نوں کوئی نہیں دیندا ۔
5
۵۔ جہیڑے سوادی کھانے کھاندے سن ہن گلیاں چہ ویران پئے نیں۔ جیہڑے قرمزی کپڑیاں چہ پلدے سن ہن راکھ دے ڈھیر تے لیٹے ہوئے نیں۔
6
۶۔ میرے لوکاں دی سزا سدوم نالوں وی وڈی اے۔ جہیڑا پل چہ تباہ ہو گیا ۔ تے کوئی ہتھ اوہدی مدد لئی نہ ودھ سکیا۔
7
۷۔ اوہدے امیر برف نالوں صاف تے دودھ نالوں چٹے سن۔ تے اوہناں دے پنڈے مونگےنالوں بہتے سرخ سن۔ تے اوہناں دی لشک نیلم ورگی سی۔
8
۸۔ ہن اوہناں دے چہرے کالخ نالوں کالے نیں۔ اوہ بازاراں چہ پچھانے نہیں جاندے اوہناں دا چم ہڈیاں نال سنکڑ گیا ہے۔ اوہ سک کے لکڑ وانگوں ہو گیا ہے۔
9
۹۔ جہڑے تلوار نال مارے ہوئے نیں اوہناں توں چنگے نیں جہڑے بھوک نال مارے ہوئے نیں۔ کھیت دا پھل ناں ملن کر کے ایہہ کُڑھ کُڑھ کے لسے ہندے جاندے سن۔
10
۱۰۔ ترس دل جنانیاں نیں آپ اپنے ہتھا ںنال اپنے بچیاں نوں پکایا اے۔ میرے لوکاں دی دھی دی تباہی دے ویلے، اوہو ایہناں دی خوراک سن۔
11
۱۱۔ خداوند نے اپنا غصہ پورا کیتا۔ اوہنے اپنا تیز کرودھ ڈول دتا۔ اوہنے صیون وچ اک ا گ بھڑکائی۔ جہیڑی اوہدیاں نیاں نوں کھا گئی۔
12
۱۲۔ دھرتی دے راجے تے دنیا دے سارے وسن آلے، یعقین نہیں کردے۔ پئی ویری تے مخالف دشمن دے پھاٹکاں چہ آ وڑن گے۔
13
۱۳۔ ایہہ اوہدے نبیاں دے گناہاں تے کاہناں دی بدکاری دی وجہ توں ہویا اے۔ جہدے چہ اوہناں نیں صادقاں دا خون وگایا اے۔
14
۱۴۔ اوہ اننے ہو کے گلیاں وچ پھردے سن۔ اوہ لہو نال ایہنے پلیت ہو گئے نیں پئی اوہناں دے کپڑ ے کوئی چھو نہیں سکدا۔
15
۱۵۔ اوہ اوہناں نوں کہندے سن ، دور ہوو ناپاک دور ہووسانوں ناں چھوو۔ سو اوہ دور نس گئے تے مارے مارے پھرن لگے۔ قوماں چہ لوکی ایہہ آکھدے سن پئی ایہہ ایتھے نہ ٹکن گے۔
16
۱۶۔ خداوند دے قہر نے اوہناں نوں کھلار دتا۔ اوہ اوہناں تے فیر رحم نہیں کرے گا۔ اوہناں نیں کاہناں دی عزت نہیں کیتی تے بزرگاں دا لحاظ نہیں کیتا۔
17
۱۷۔ ساڈیاں اکھیاں فضول مدد دی انتظار چہ تھک گیاں۔ اسیں اوس قوم دی اوڈیک چہ رہے جہیڑی بچا نہیں سکدی۔
18
۱۸۔ لوکی ساڈے پیراں پچھے اینج پھردے سن پئی اسیں اپنیاں گلیاں چہ وی نہ پھر سکے۔ ساڈا اخیر نیڑے آ گیا اے ۔ ساڈے دھاڑے پورے ہو گئے نیں۔ ساڈی اخیر ہو گئی اے ۔
19
۱۹۔ ساڈا پچھا کرن والے اسمان دے عقاباں نالوں وی تیز سن۔ اوہناں پہاڑاں دے اتے ساڈا پچھا کیتا۔ اوہ اجاڑ وچ ساڈی گھات وچ بیٹھے۔
20
۲۰۔ ساڈیاں ناساں دا مسح ہویا ساہ اوہناں دے ٹویاں وچ پھڑیا گیا۔ جہدے بارے اسیں کہندے ساں پئی اسیں اوہدے سائے تھلے قوماں چہ جیوندے رہاں گے۔
21
۲۱۔ اے ادوم دیئے دھیے، جہیڑی اوہدے دیس چہ وسنی ایں۔ خوش ہو تے شادمانی کر، ایہہ پیالا تیرے تک وی اپڑے گا۔ توں مست ہو کے اپنے آپ نوں ننگا کریں گی۔
22
۲۲۔ اے صیون دیئے دھئے، تیری بدی دی سزا پوری ہوئی۔ اوہ تینوں اسیر کر کے نہیں لے جاوے گا۔ اے ادوم دیئے دھیئے اوہ تیری بدی دی خبر لووے گا۔ اوہ تیرے گناہ ظاہر کر دیئے گا۔