¹ ۱۔ میں ای اوہ بندہ ہاں جہنے اوہدے قہر دی سوٹی توں دکھ پایا اے۔ ² ۲۔ اوہ میرا آگو ہویا پر مینوں روشنی چ نہیں سگوں ہنیرے چ ٹوریا۔ ³ ۳۔ اوہدا ہتھ دن بھر میرے خلاف رہیا۔ ⁴ ۴۔ اوہنے میرے گوشت تےچمڑے نوں بڈھا کر دتا اے۔ اوہنے میریاں ہڈیاں توڑ چھڈیاں نیں۔ ⁵ ۵۔ اوہنے میرے خلاف میرے چار چوفیرے کنداں کھچیاں نیں۔ اوہنے مینوں تلخی دے زہر تے دکھ وچ گھیر لیا اے۔ ⁶ ۶۔ اوہنے مینوں پرانے مردیاں وانگ ہنیرے دیاں تھاواں چہ رکھیا اے۔ ⁷ ۷۔ اوہنے میرے آلے دوالے کنداں بنایاں نیں۔ تانجو میں باہر نہ جا سکاں۔ اوہنے میریاں بیڑیاںبھاریاں کردتیاں نیں۔ ⁸ ۸۔ تے جدوں میں چیکدا تے دہائی دینا ںواں، اوہ میری فریادنیں سندا۔ ⁹ ۹۔ اوہنے تراشے ہوئے پتھراں نال میریاں رہواں بند کر دتیاں نیں۔ اوہنے میریاں راہواں ڈنگ پڑنگیاں کر دتیاں نیں۔ ¹⁰ ۱۰۔ میرے لئی اوہ ریچھ وانگ شکار چہ بیٹھا ۔ تے اوس شیر وانگ جہیڑا لک کے بہندا اے۔ ¹¹ ۱۱۔ اوہنے میریاں راہوں وگاڑ دتیاں تے مینوں ٹوٹے ٹوٹے کرکے برباد کر دتا اے۔ ¹² ۱۲۔ اوہنے اپنی کمان کچھی تے مینوں اپنے تیر دا نشانہ بنایا۔ ¹³ ۱۳۔ اوہنے اپنے ترکش دے تیراں نال میرے گردیا ں نوں وین سٹیا۔ ¹⁴ ۱۴۔ میں اپنے سارے لوکاں لئی ہاسا بن گیا واں؛ تے اوہ مینوں تنگ کرن لئی سارا دن گاندے رہندے نیں۔ ¹⁵ ۱۵۔ اوہنے مینوں تلخیاں نال بھر دتا تے کوڑی شے نال مدہوش کر دتا اے۔ ¹⁶ ۱۶۔ اوہنے میرے دند روڑیاں نال توڑے اوس مینوں راکھ وچ لٹایا۔ ¹⁷ ۱۷۔ توں میری جان نوں ارام توں دور رکھیا اے۔ میں سکھ دے دناں نوں بھل گیا۔ ¹⁸ ۱۸۔ ایس لئی میں آکھنا ہاں پئی میری طاقت تے میری آس جہیڑی خداوند ولوں سی ٹٹ گئی اے۔ ¹⁹ ۱۹۔ میرے دکھ دا خیال کر تےمیری تلخی تے مصیبت نوں یاد کر ۔ ²⁰ ۲۰۔ ایہناں گلاں نو ں یا د کر کے میر ی جا ن میرے اندر بیتاب اے۔ ²¹ ۲۱۔ میں ایہناں گلاں نوں دل وچ سوچنا ہا ں تے امید وار رہنا ہاں۔ ²² ۲۲۔ ایہہ خدا دیاں رحمتاں نیں پئی اسی فنا نہیں ہوئے کیونجو اوہدے ترس کدی ختم نہیں ہندے۔ ²³ ۲۳۔ ہر صبح اوہ تازہ ہندے نیں؛ کیونجو تیری وفاداری ڈاھڈی اے۔ ²⁴ ۲۴۔ میری جان نے آکھیا میرا حصہ خداوند اے۔ ایس لئی میری آس اوہدے تے وے۔ ²⁵ ۲۵۔ خدا وند اوہناں تے مہربان ایں جہیڑے اوہدا انتظار کردے نیں۔ اوس جان تے جہیڑی اوہدی طالب اے۔ ²⁶ ۲۶۔ ایہہ بہتر اے پئی بندہ امید رکھے تے خموشی نال خداوند دی نجات دی اوڈیک کرے۔ ²⁷ ۲۷۔ بندے لئی ایہو چنگا اے پئی اوہ جوانی دے ویلیاں چہ فرمان برداری کرے۔ ²⁸ ۲۸۔ اوہ کلا بیٹھے تے خموش رہوے ، کیونجو رب نے ہی اوہدے تے اے ذمہ داری رکھی اے۔ ²⁹ ۲۹۔ اوہ اپنا منہ خاک تے رکھے پئی ہرے کجھ امید دی صورت نکلے۔ ³⁰ ۳۰۔ تے اوہ اپنا گل اوہدے ول پھیر دیوے جہیڑا اوہنوں چنڈ مارے۔ تے ملامت توں خوب پیٹ بھرے۔ ³¹ ۳۱۔ کیونجو خداوند سدا لئی چھڈ ناں دیووے گا۔ ³² ۳۲۔ کیونجو بھاویں اوہ دکھ دیوے ، فیر وی اوہ اپنیاں ودھیریاں رحمتاں دے سببوں ترس کھاوے گا۔ ³³ ۳۳۔ کیونجو اوہ آدمی دے پتر تے خوشی نال دکھ تے مصیبت نہیں گھلدا۔ ³⁴ ۳۴۔ ساری زمین دے سارے قیدیاں نوں پامال کرنا۔ ³⁵ ۳۵۔ قادرِ مطلق دے حضور کسے بندے دی حق تلفی کرنا۔ ³⁶ ۳۶۔ تے کسے بندے دا مقدمہ وگاڑنا خداوند ویکھ نہیں سکدا۔ ³⁷ ۳۷۔ اوہ کون ایں جہدے آکھن دے مطابق ہندا اے۔ حالانکہ خدا وند نے نہیں فرمایا۔ ³⁸ ۳۸۔ کی بھلائی تے برائی قادرِ مطلق دے حکم نال نہیں؟ ³⁹ ۳۹۔ فیر بندہ جیندے جی کیوں گلا کرے جہدوں اوہنوں اوہدے اپنے ایں گناہاں دی سزا مل رہی ہووے۔ ⁴⁰ ۴۰۔ اسیں اپنی راہواں نوں لبھئے تے پرکھئے تے خداوند ولے پھریے ⁴¹ ۴۱۔ اسیں اپنے ہتھاں دے نال نال دلاں نوں وی خدا سے سامنے اسمان ول چکئے۔ ⁴² ۴۲۔ اسی گناہ تے بغاوت کیتی تے توں معاف نہیں کیتا۔ ⁴³ ۴۳۔ توں سانوں اپنے غصہ نال ڈھکیا تے ساڈا پچھا کیتا۔۔ توں سانوں قتل کیتا تے رحم نہ کیتا۔ ⁴⁴ ۴۴۔ توں اپنے آپ نوں بدلاں نال ڈھکیا پئی ساڈی دعا تیرے تیک نہ اپڑے۔ ⁴⁵ ۴۵۔ توں سانوں قوماں چہ کوڑا تے لوکاں دے وچ نا منظور کیتا۔ ⁴⁶ ۴۶۔ ساڈے سارے ویریاں نے ساڈے خلاف منہ کھولیا۔ ⁴⁷ ۴۷۔ ڈر تے دہشت، ویرانی تے ہلاکت نیں سانوں آدبایا اے۔ ⁴⁸ ۴۸۔ میری قوم دی دھی دی تباہی دے سببو ں میریاں اکھیاں چوں اتھرواں دیاں نہراں جاری نیں۔ ⁴⁹ ۴۹۔ میریاں اکھیاں اتھرو وگاندیاں نیں تے نہیں رکدیاں ۔ اوہناں نوں کوئی ارام نہیں۔ ⁵⁰ ۵۰۔ جدوں تیک خداوند اسمان توں نظر کر کے ناں ویکھے۔ ⁵¹ ۵۱۔ میریاں اکھیاں میرے شہر دیاں ساریاں دھیاں دے لئی میری جان نوں دکھی کردیاں نیں۔ ⁵² ۵۲۔ میرے دشمناں نیں بناں کسی وجہ توں پرندے وانگر میرا پچھا کیتا۔ ⁵³ ۵۳۔ اوہناں نیں میری جان لین لئی مینوں کھوں چہ سٹیا تے میرے اتے اک پتھر رکھیا اے۔ ⁵⁴ ۵۴۔ پانی میرے سر توں لنگ گیا۔ میں آکھیا میں مر گیا۔ ⁵⁵ ۵۵۔ اے خداوند میں کھوں چوں تیرے ناں دی دہائی دتی۔ ⁵⁶ ۵۶۔ توں میری اواز سنی ایں۔ میری آہ تے فریاد توں اپنا کن بند نہ کر۔ ⁵⁷ ۵۷۔ جیس روز میں تینوں پکاریا، توں میرے نیڑے آیا تے توں فرمایا۔ پئی نہ گھبرا۔ ⁵⁸ ۵۸۔ اے خداوند توں میری جان دی حمایت کیتی تے اوہنوں چھڈایا۔ ⁵⁹ ۵۹۔ اے خداوند توں میری مظلومی ویکھی اے میرا نیاں کر۔ ⁶⁰ ۶۰۔ توں میرے خلاف اوہناں دے سارے بدلے تے سارے منصوبیاں نوں ویکھیا اے۔ ⁶¹ ۶۱۔ اے خداوند توں میرے خلاف اوہناں دی ملامت تے اوہناں دے سارے منصوبیاں نوں سنیا اے۔ ⁶² ۶۲۔ جہڑے میرے خلاف اٹھے۔ اوہناں دیاں گلاں تے، دن بھر میرے خلاف اوہناں دے منصوبے۔ ⁶³ ۶۳۔ اوہناں دے اٹھن تے بیٹھن نوں ویکھ پئی میں ای اوہناں دا راگ آں۔ ⁶⁴ ۶۴۔ اے خداوند اوہناں دے کماں دے مطابق اوہناں نوں بدلا دے۔ ⁶⁵ ۶۵۔ اوہناں نوں دل دا غم دے تے تیری لعنت اوہناں تے آوے۔ ⁶⁶ ۶۶۔ غصے دے نال اوہناں دا پچھا کر تے ساری زمین توں اوہناں نوں فنا کر دے۔