1
۔کیہ تینوں پتا اے پئی پہاڑی بکریاں کیہڑے ویلے جمدیاں نیں ۔ یا تُوں ہرنیاں نُوں بچے دیندیاں ویکھیا اے ۔
2
۔ کیہ تُوں اوہناں دے گربھ دے مہینے گِنے نیں ۔ تے اوہناں دے بچے دین دا ویلا پتا کیِتا اے۔
3
۔ اوہ اُڈدیاں تے بچے جمدیاں نیں ۔ تے اَپنی پیِڑ نُوں دوُر کردیاں نیں ۔
4
۔ فیر اوہناں دے بچے وَڈے ہو جاندے نیں ۔ تے میدان چہ وددے نیں ۔ اوہ نکل جاندے نیں تے اوہناں دے کول پَرت کے نئیں آؤندے ۔
5
۔ کِنے جنگلی کھوتے نُوں آزاد کرکےباہو کڈھیا اے ۔ تے دَس جنگلی دا پٹا کِنے کھولیا اے ؟
6
۔ میں اُجاڑ نُوں اوہدا گھر تے کھاری دھرتی نُوں اوہدے رہن دی تھاں بنایا اے ۔
7
۔ اوہ شہر دے شور شرابے نُون ککھ نئیں سمجھدا ۔ تے ہِکن والے دے رولے نُوں نئیں سُندا ۔
8
۔ پہاڑاں دیا ں قطاراں اوہدے چُگن دی تھاں اے ۔ اوہ ہر ہری شے نُوں لبھدا اے ۔
9
۔ کیہ جنگلی ساہُن خُوش ہووے گا پئی تیری چاکری کرے یا کھُرلی دے لاگے رات کڈھے ؟
10
۔ کیہ تُوں جنگلی ساہُن نُوں پیلی دیاں راہواں چہ پنجالی تھلے نئیں گایا ۔ کیہ اوہ تیرےمگر مگر وادیاں نُوں سِدھا کرے گا ؟
11
۔ کیہ تُوں اوہدی ڈاہڈی طاقت دے پاروںاوہدے تے بھروسہ کریں گا ۔ تے اَپنے کَم اوہدے حوالے کریں گا ؟
12
۔ کیہ تُوں اوہدے تے مان کریںگا ۔ پئی پَرت کے تیری فصل تیرے پیِڑاں چہ کٹھیاں کرے ۔
13
۔ کیہ شُتر مُرغ دا پِر لَقلَق یا عُقاب دے پَر وانگوں نیں ؟
14
۔ کیوں جو اوہ اَپنے آنڈے زمین تے چھڈ جاندی اے ۔ جِتھے ریت اوہناں نُوں سیک دیندی اے ۔
15
۔ اوہ بھُل جاندی اے پئی پیر اوہناں نُوں پھین گے ۔ یاں جنگلی جانور اوہنا ں نُوں بھن دین گے ۔
16
۔ اوہ اَپنے بالاں تے سختی کردی ایسراں پئی جِسراں اوہدے اَپنے نیں ۔ بھاویں اوہدی مِحنت ضائع ہو جاوے ۔ فیر وی اوہنوں ڈر نئیں ۔
17
۔ کیوں جو خُدا نے اوہنوں بُدھی دِتی ای نئیں ۔ تے اوہنوں دانش نئیں بخشی ۔
18
۔ پِر جِہدوں اوہ اُچیائی وَل اَپنیاں باہواں ماردی اے ۔ تے گھوڑے تے اوہدے سوار تے ہسدی اے ۔
19
۔ کیہ تُوں گھوڑے نُوں زور دِتا اے تے اوہدی دھون تے جَت پائی اے ؟
20
۔ کیہ تُوں ٹڈی وانگوں اوہنوں چھالاں مروائیں گا ؟ تے اوہدے بھجن دی شانڈاہڈی اے ۔
21
۔ اوہ وادی چہ کھُر ماردا اے ۔ تے اَپنی طاقت چہ خُوش اے ۔ اوہ ہتھیا ر بنھے بندیاں ملن لئی اَگے جاندا اے ۔
22
۔ اوہ خوف تے ہسدا اے ۔ تے ڈردا نئیں ۔ تے تلوارف توں گنڈ نئیں وکھاندا ۔
23
۔ تیراں تے ٹوکری تے چمکدا ہوئیا نیزہ تے بَرچھا اوہدے تے کھڑکدے نیں ۔
24
۔ اوہ اَپنے نَسن نال تے گُسے نال زمین ناپدا اے تے تُرہی دی واج نُوں کُجھ نئیں سمجھ دا ۔
25
۔ جِہدوں تُرہی وجدی اے اوہ ہِن ہِن کردااے ۔ اوہ خون وگن دے تے جنگی سردارں تے اڑیس دین نال تے شور پان نُوں دوُروں سُنگھ لیندا اے ۔
26
۔ کیہ ناز تیری دانش نال اُڈدا اے تے اَپنیاں باہواں دکھن وَل کھلاردا اے ۔
27
۔ کیہ عُقاب تیرے آکھن نال اُتاں جاندا اے ۔ تے اُچہ تھاں تے اَپنا آہلنا بناندا اے ۔
28
۔ اوہ پہاڑاں تے رہندا تے اوتھے ڈیرہ لاندا اے ۔ یعنی پہاڑ دی ٹیِسی تے اَپنی لُکن دی تھاں تے
29
۔ اوتھوں ای اوہ شکار نُوں تاڑ لیندا اے ۔ تے اوہدیا ں اَکھاں دوُر تیِک وہندیاں نیں ۔
30
۔ اوہدے بچے لہو چُنگدے نیں ۔ تے جِتھے قتل ہون والے پئے ہون تے اوتھے اوہ چھیتی نال اَپڑ جاندااے ۔