1
. فیر خدا نے نوح تے سارے جیوندیاں تے جانوراں دا ، جیہڑے اوہدے نال کشتی و چ سن ، چیتا کر کے دھرتی تے اک ھنیری وگائی تے فیر پانی گھٹن لگ پئیا۔
2
. تے بوہتی ڈونگیائی دے سارے چشمے تے اسمان دے سارے پھوارے بند ہو گئے۔ تے مینہ رک گیا۔
3
. تے پانی دھرتی اتوں ہولی ہولی گھٹن لگ پئیا۔ تے ڈیڈھ سو دیہاڑیاں توں مگرپانی گھٹ گیا۔
4
. تے ستویں ماہ دی ستارویں تاریح نوں اراراط دے پہاڑ تے کشتی کھلو گئی۔
5
. تے پانی دسویں مہینے تیکر گھٹدا رہیا۔ تے دسویں مہینے دی پہلی تاریخ نوں پہاڑاں دیاں ٹیسیاں دِسیاں۔
6
. تے اوس توں مگر چالی دیہاڑے لنگے تے نوح نے کشتی دی باری جیہڑی اوہنے بنائی سی کھولی۔
7
. تے اک کاں نوں اڈایا تے اوہ نکل کے جدوں تیکر دھرتی تے پانی سک نئی گیا ایدر اودر پھردا ر ہیا۔
8
. فیر اوہنے اک کگی اڈائی تاں جے ویکھے پئی دھرتی توں پانی گھٹیا وے یا نئی۔
9
. پرکگی نوں پنجے رکھن دی کوئی تھاں نئی لبھی تے اوہدے کول کشتی وچ فیر پرت آئی۔کیوں جے ساری دھرتی تے پانی سی۔ تے اوہنے ہتھ ودھا کے اوہنوں پھڑلیا۔تے اپنے کول کشتی وچ لے لئیا۔
10
. تے اوہنے فیر ست دیہاڑے ٹھہر کے کگی نوں فیر توں کشتی وچوں اڈایا۔
11
. تے اوہ کگی شام دے ویلے اوہدے کول پرت آئی۔ تے زیتون دی اک ہری پتی اودہی چنج وچ سی۔تد نوح سیان گیا پئی دھتر ی توں پانی لتھ گیا وے۔
12
. تے اوہنے فیرتو ں ست دیہاڑے ٹھہر کے کگی نوں اڈایا۔ تے اوہ فیر اوہدے کول نئی پرتی۔
13
. تے چھ سو اک ورہے دے پہلے مہینے دی پہلی تاریخ نوں دھرتی توں پانی سک گیا۔ تے نوح نے کشتی دی چھت کھول کے ویکھیا پئی دھرتی خشک ہون لگ پئی اے۔
14
. تے دجے مہینے دی ستائی تاریخ نوں دھرتی سک گئی ۔
15
. تے خدا نے نو ح نوں آکھیا پئی ۔
16
. توں تے تیرے نال تیری کار والی تے تیرے پتر تے تیرے پتراں دیاں کار والیاں کشتی وچوں بار نکل آو۔
17
. تے سارے قسم دے جانور جیہڑے تیرے نال نیں، کی پرندے تے کی چرن والے تے کی کیڑے جیہڑے دھرتی تے ٹردے نیں، اپنے نال لے کے نکل تاں جے اوہ دھرتی تے ودھ کے جمن۔تے تسی دھرتی تے جا کے پھلو تے ودھو۔
18
. تد نوح بار نکلیا ۔تے اوہ تے اوہدے پتر تے اودی گھر والی تے اوہدے پتراں دیاں گھر والیاں اوہدے نال سن۔
19
. تے سارے جاندار وی تے پالتو جانور تے کیڑے جیہڑے دھرتی تے رینگدے نیں اپنی جنس وانگوں کشتی وچوں نکل آئے۔
20
. تد نوح نے خداوند لئی اک مذبح بنایا تے سارے پاک چرن والیاں چوں تے پرندیاں چوں لے کے اوہدے مذبح تے سوختنی قربانی دتی۔
21
. تے خداوند نے اوہناں دی میٹھی خشبو لئی تے اپنے دل وچ آکھیا پئی انسان دے سبب میں دھرتی تے فیر کدی لعنت نہ گھلاں گا۔ کیوں جے انسان دا دل جوانی توں ای بدی ول ہندا وے ۔ تے جینج میں کیتا فیر کدی میں دوبارہ جانداراں نوں نہ ماراں گا۔
22
. سگوںجد تیکر دھرتی رہوے تسی بیج بیجنا تے فصل کٹنا ۔ پالا تے دھپ۔ ہاڑی تے مگھر ۔ تے دن تے رات کدی نہ مکن گے۔