1
.اوہناں نے ربّ دے گھَر وِچ سیوا کرن لئی اُون دے اَسمانی، جامنی اَتے لال پھُل بُوٹے کڈھے ہوئے لِباس بنائے۔ اوہناں نے ہارُونؔ لئی پاک لباس جِویں خُداوند نے حُکم دِتا سی بنایا۔
2
.بضلی ایلؔ نے سونے، اَسمانی، جامنی اَتے لال رنگ دے کپڑیاں اَتے باریِک وَٹے ہوئے سُوتر دا افُود بنایا۔
3
. اوہناں نے سونا کُٹ کُٹ کے باریِک پَتریِاں بنائیِاں اَتے پَتریِاں نُوں کَٹ کَٹ کے تاراں بنائیِاں تاں جو اوہناں نال اَسمانی، جامنی اَتے لال رنگ دے کپڑیاں اَتے باریِک وَٹے ہوئے سُوتر تے چَنڈے ہوئے اُستاد دی حِکمت وانگ سونے دا کَم کیِتا جاوے۔
4
. اوہناں نے اَفُود نُوں جوڑن لئی دو موڈھے بنائے اَتے اوہدے دُوںواں سِریاں نُوں جوڑ کے بَنھ دِتا۔
5
. اوہنوں کَسن لئی کاریگری نال بَنیا ہویا لَک بَنھ جیہڑا اوہدے اُتے سی اوہ وہی اوسے ٹُکرے اَتے چَج دا سی مطلب کے سونے، اَسمانی، جامنی اَتے لال رنگ دے کپڑیاں اَتے باریِک وَٹے ہوئے سُوتر دا بَنیا ہویا سی جِویں خُداوند نے مُوسیٰؔ نُوں حُکم دِتا سی۔
6
. اوہناں نے سلیمانیؔ پتھر چھانگ کے صاف کیِتے جیہڑے سونے دے خانیاں وِچ جُڑے گئے سَن اَتے اوہناں تے اَنگوٹھی دی مہر وانگ اِسرائیِلؔ دے پُتراں دے ناں کڈھے ہوئے سَن۔
7
. بضلی ایلؔ نےاوہناں نُوں اَفود دے موڈھیاں تے لایا تاں جو اوہ اِسرائیِلؔ دے پُتراں دی یادگاری دے پتھر ہون جِویں خُداوند نے مُوسیٰؔ نُوں حُکم دِتا سی۔
8
. اَتے اوہنے اَفود ورگا ہِک بنَھ بنایاجیہڑا چَنڈے ہوئے کاریگر دے ہتھ دا کَم سی۔ اوہنے اوہنوں سونے، اَسمانی، جامنی اَتے لال رنگ دے کپڑیاں اَتے باریِک وَٹے ہوئے سوُتر دا بنایا۔
9
. اوہ چوگُٹھا سی۔ اوہناں نے ہِک بَنھ دُہرا بنایا جیہڑا اِک گِٹھ لَما اَتے اِک گِٹھ چوڑا سی۔
10
. اوہدے تے اوہناں نے چار قطاراں وِچ نَغ جڑے۔پہیلی قِطار وِچ لال یاقُوت، پُکھراج اَتے زمُرّد سی۔
11
.دُوجی قطار وِچ شب چراغ دا گوہر ، نیلم اَتے ہِیرا۔
12
. تِجی قطار وِچ لشم یشم اَتے یاقُوت۔
13
.چوتھی قِطار وِچ فیروزہ اَتے سلیمانی پتھر اَتے زَبر جد۔ ایہہ سارے پتھر سونے دے وَکھووَکھ خانیاں وِچ جَڑے ہوئے سَن۔
14
. ایہہ پتھر اِسرائیِل دے پُتراں دے ناواں دی گِنتی دے حِساب نال بارہ سَن، اَتے انگوٹھی دی چھاپ وانگ بارہ ٹبراں وِچوں اِک اِک دا ناں اِک اِک پتھر تے وَکھرا وَکھرا کُھرچیا ہویا سی۔
15
.اوہناں نے ہِک بنھ تے ڈُوری وانگ پاسے دے سونے دیِاں گُجیِاں ہوئیِاں زنجیِراں بنائیِاں۔
16
.اوہناں نے سونے دے دو خانے اَتے سونے دے دو کڑے بنائے اَتے دُوںواں کَڑیاں نُوں ہِک بَنھ دے دُوںواں سِریاں تے لایا۔
17
.اوہناں نیں سونے دِیاں گُجیِاں ہوئیِاں دُوںویں زنجیِراں اوہناں کَڑیاں وِچ پایِاں جیہڑے ہِک بَنھ د ے سِریاں تے سَن۔
18
.اوہناں نے زنجیِراں دے باقی دُوںویں سِرے دُوںواں خانیاں نال جَڑ کے اَفُود دیاں دُوںواں موڈھیاں تے اَگلے پاسے لا دِتے۔
19
.اَتے اوہناں نیں سونے دے دو ہور کَڑے بناکے اوہناں نُوں ہِک بَنھ دے دُوںویں سِریاں دی اوس کِناری وِچ لایا جِہدی سِدھ اَفود وَل اَندلے پاسے سی۔
20
. اَتے اوہناں نیں سونے دے دو کَڑے ہَور بنا کے اوہناں نُوں اَفوُد دے دُوںویں موڈھیاں دے اَگلے حِصّے وِچ اَندرلے پاسے جِتھے اَفُود جُڑیا ہویا سی لایا تاں جو اوہ اَفود دے کاریگری نال اُونے ہوئے پٹکے اُتے رہیوے۔
21
. اَتے اوہناں نیں ہِک بَنھ نُوں لَے کے اوہدے کَڑیاں نُوں اَفُود دے کَڑیاں نال اِک نیِلی ڈُوری نال اینج بَنھیا پئی اوہ اَفُود دے کاریگری نال اُونے ہوئے پَٹکے دے اُتے رہیوئے تاں جو ہِک بَنھ ڈِھلا ہو کے اَفود نالوں وَکھ نہ ہو جاوے۔ مُوسیٰؔ نے ایہہ سب کُجھ اونج ہی کیِتا جِویں خُداوند نے اوہنوں حُکم کیِتا سی۔
22
.بَضلی ایلؔ نے اَفُود دا جُبّہ، جُولاہے وانگ اُون کے، اُکا نِیلے کپڑے دا بنایا۔
23
. اَتے اوہدا گَلما زِرہ دے گَلمے وانگ وِچکار سی اَتے اوہدے آل دوالَے اُونی ہوئی کِناری سی تاں جو اوہ پاٹ نہ جاوے۔
24
.اَتے اوہناں نے اوہدے گھیرے وِچ اَسمانی، جامنی اَتے لال رنگ دی وَٹّی ہوئی تار نال اَنار بنائے۔
25
.اوہناں پاسے دے سونے دِیاں ٹَلیاں بنا کے اوہناں نُوں جُبّے دے گھیر ے دے چَواں پاسے اَناراں دے وِچکار لایا۔
26
.سو ہارُونؔ دے سیوا کرن لئی ، جُبّے دے سارے گھیرے وِچ اِک اِک ٹَلی سی اَتے اِک اِک اَنار جِویں خُداوند نے مُوسیٰؔ نُوں حُکم کیِتا سی۔
27
. اوہناں ہارُونؔ اَتے اوہدے پُتراں لئی سُوتر دے باریِک اُونے ہوئے کُڑتے بنائے۔
28
. اَتے باریِک سُوتر دا عمامہ اَتے باریِک سوُتر دِیاں سوہنیِاں پَگاں اَتے باریِک وَٹے ہوئے سُوتر دے پجامے۔
29
.اَتے بارِیک وَٹے ہوئے سُوتر اَتے اَسمانی، جامنی اَتے لال رنگ دے کپڑیاں دا بُھل بوٹیاں والا لَک بَنھ ویِہ بنایا جِویں خُداوند نے مُوسیٰؔ نُوں حُکم کیِتا سی۔
30
.اوہناں نیں پاک تاج دی پَتری پاسے دے سونے دی بنائی اَتے اوہدے اُتے اِک اَنگوٹھی تے نقش وانگ ایہہ لکھیا "خُداوند لئی پاک ۔"
31
.تے فیر اوہنوں عمامے نال اُتے بنّھن لئی اوہدے وِچ اِک نیلی ڈُوری لائی جیِنج خُداوند نے مُوسیٰؔ نُوں حُکم کیِتاسی ۔
32
. اینج اَکٹھ دے تںبُو دے گھر دا سارا کَم توڑ چڑھیا۔اِسرائیِلؔ دے لوکاں نے سب کُجھ آپ کیِتا۔ اوہناں نیں اوہ سارِیاں ہدایتاں مَنیاں جیہڑیاں خُداوند نے مُوسیٰؔ نُوں کیِتیاں سَن۔
33
. اَتے اوہ اَکٹھ دا تںبُو مُوسیٰؔ کول لیائے مطلب کے تںبُو اَتے اوہدا کُل سامان، اوہدیِاں گُھنڈیاں، تختے ، بینڈے، تھم ، خانے۔
34
. بھیڈواں دِیاں لال رَنگیاں ہوئیِاں گَھلاں دا اوچھاڑ ، چنگے چمڑے دا اوچھاڑ اَتے ڈھکن لئی پڑدا۔
35
. گواہی دا صندُوق، اوہدے ڈنڈے اَتے سَرپوش۔
36
.اوہ میز ، میز دے کُل پانڈے اَتے نذر دی روٹی لیائے ۔
37
. پاسے دے سونے دی دیِوے دانی اَتے اوہدے شنگار دے دیِوے، اوہدے کُل پانڈے اَتے بالن دا تیل لیائے۔
38
.سونے دی قُربان گاہ، مسح کرن دا تیل اَتے خُوشبو والا بُخور، تَںبُو دے بُوہے دا پڑدا ۔
39
. پِتل مڑھیا ہویا مذبح اَتے پِتل دی جھنجری اَتے اوہدے ڈنڈے اَتے اوہدے کُل پاندے اَتے وَڈا حَوض اوہدی چوکی سنہے۔
40
.اوہ ویڑے دے پڑدے سنہے اوہناں دے تھم اَتے پاوے، اَتے وہیڑے دے بُوہے دا پڑدا، اوہدیِاں رسّیِاں اَتے کِلے، اَتے اَکٹھ دے تَںبُو دی سیوا لئی کُل سامان لیائے۔
41
.اوہ پاک گَھر دی سیوا لئی چَنگے اُونے ہوئے کاہناں دے کپڑے مطلب کے ہارُونؔ کاہن اَتے اوہدے پُتر اں لئی لیائے جِنہاں نُوں پا کے اوہناں کہانت دا کَم توڑ چڑھانا سی۔
42
.سو اِسرائیلِیاں نیں اوہ سارا کَم توڑ چڑھایا جِویں خُداوند نے مُوسیٰؔ نُوں حُکم کیِتا سی۔
43
. جد مُوسیٰؔ نے ویکھیا پئی اوہناں سارا کَم اونج ہی توڑ چڑھایا جِویں خُداوند نے اوہناں نُوں کَرن دا حُکم کیِتا سی۔ تد مُوسیٰؔ نے اوہناں نُوں برکت دِتی۔