1
.بضلی ایلؔ نے سوختنی قُربانی لئی کِکر دی لکڑ دا مذبح بنایا۔ اوہدی لمیائی پنج ہتھ اَتے چوڑائی وی پنچ ہتھ سی۔ اوہ چوَگُٹھا اَتے اوہدی اُچیائی تِن ہتھ سی۔
2
.اوہنے اوہدے چَواں نُکراں تے سینگ لائے۔ مذبح اَتے اوہدے سینگ اِکو ہی ٹکرے دے بنے ہوئے سَن اَتے اوہنے اوہنوں پِتل نال مَڑھیا۔
3
.اوہنے مذبحے دیِاں سارِیاں شیواں بنائِیاں مطلب کے سواہ چُکن والِیاں ٹوکرِیاں، بیلچے، کئولے، سیِخاں اَتے انگیِٹھِیاں۔اوہنے ایہہ سارا سامان پِتل دا بنایا۔
4
. اوہنے کِنگھری نُوں قُربان گاہ دے چَواں پاسے دے کنڈے تھلے اینج لایا پئی اوہ اُچیائی وِچ قُربان گاہ دے میچ توں اَدھی سی۔
5
. اوہنے پِتل دی کِنگھری دیاں چَواں نُکراں لئی چار کَڑے بنائے تاں جو ڈنڈیاں لئی خانیاں دا کَم دین۔
6
.بضلی ایلؔ نے ڈنڈے کِکر دی لکڑ دے بنائے اَتے اوہناں نُوں پِتل نال مَڑھیا۔
7
.اوہنے ڈنڈیاں نُوں مذبحے دے دُوںواں پاسے دے کڑیاں وِچ پایا تاں جو مذبح چُکیا جا سکے۔ اوہنے اوہ مذبح پَھٹیاں دا بنایا اَتے مذبح کھوکھلا سی۔
8
.بضلی ایلؔ نے وڈا حوض اَتے چَوکی پِتل دی بنائی۔ اوہنے حوض بنان لئی اوہ پِتل ورتیا جیہڑا اَکٹھ دی تھاں دے بُوہے تے سیواکرن والیِاں زنانیاں نیں اَپنیاں شیشیاں توں لاہ کے بضلی ایلؔ نُوں دِتا سی۔
9
. فیر اوہنے اَکٹھ دے تںبُو دا ویڑھا وی بنایا۔ اَتے ویڑھے دے دَکھنی لائم دے پڑدے اُونے ہوئے باریِک سوتی کپڑے دے سَن جیہڑے سو ہتھ لَمے سَن۔
10
.پڑدیاں لئی ویِہ تھم پِتل دے ویِہ خانیاں سنہے سَن۔ اَتے تھماں دے کُنڈے اَتے پَٹیاں چاندی دِیاں سَن۔
11
. اَتے پہاڑ دی لائمے وی اوہ سو ہتھ لَمے اَتے اوہناں لئی ویِہ تھم اَتے پِتل دے خانے وی ویِہ او ہی سَن اَتے تھماں دے کُنڈے اَتے پَٹیاں چاندی دِیاں سَن۔
12
. لاہندی لائم دے پڑدے پنجاہ ہتھ لَمے سَن جِنہاں دے دَس تھم اَتے دَس نیِہیاں سَن۔ تھماں دے کُنڈے اَتے پَٹیِاں چاندی دِیاں سَن۔
13
.وہیڑا چڑھدی لائم وی پنجاہ ہتھ لَما سی۔
14
.وہیڑے دے اِک پاسے دے بُوہے دے پڑدے پندراں ہتھ لَمے سَن۔ اوہناں دے تِن تھم اَتے تِن نیِہیاں سَن۔
15
. ویڑھے دے دُوجے پاسے دے بُوہے دے پڑدے وی پندراں ہتھ لَمے سَن جِنہاں دے تِن تھم اَتے تِن ہی نیِہیاں سَن۔
16
.ویڑھے دے سارے پڑدے اُونے ہوئے باریِک سوتی کپڑے دے سَن۔
17
. تھماں دِیاں نیِہیاں پِتل دیِاں سَن۔ ایہناں تھماں لئی کُنڈے اَتے پَٹیِاں چاندی دیِاں سَن۔ اَتے تھماں دے سِرے وی چاندی دے مَڑھے ہوئے سَن۔ویڑھے دے کُل تَھم چاندی دے نال مَڑھے ہوئے سَن۔
18
. ویڑھے دے بُوہے دا پڑدا ویِہ ہتھ لَما سَی اَتے اوہ اَسمانی، جامنی ، لال رنگ اَتے باریِک اُونے ہوئے سوتی کپڑے دا سی اَتے ویِہ ہتھ لَما سی۔ وہیڑے دے پڑدیاں وانگ، ایہہ پڑدا وی ویِہ ہتھ لَما اَتے پنج ہتھ اُچا سی۔
19
. ایہدیِاں چَواں نیِہیاں پِتل دِیاں اَتے چارے کُنڈے چاندی دے سَن۔ ایہناں دے سریاں اَتے پَٹیِاں تے چاندی مَڑھی ہوئی سی۔
20
. اَکٹھ دے تَںبُو اَتے وہیڑے دے کُل کِلے پِتل دے بنے ہوئے سَن۔
21
. شہادت دے تںبُو نُوں بنان لئی جیہڑیاں شیواں ورتیِاں گئیِاں اوہ ایہہ نیں اَتے ایہہ شیواں مُوسیٰؔ دی ہدایت دے حِساب نال لاویِاں نیں اَکٹھیاں کیِتیاں اَتے ہارُونؔ کاہن دے پُتر اَتؔمر کاہن نے اوہناں نُوں لِکھن دا کَم کیِتا۔
22
.حُورؔ دے پوترے اَتے اُوریؔ دے پُتر بضلی ایلؔ نے جیہڑا یہوداہؔ دے ٹبر دا سی سب کُجھ بنایا جہِدا خُداوند نے مُوسیٰؔ نُوں حُکم دِتاسی۔
23
. اَخیسمکؔ دا پُتر اَہلیابؔ جیہڑا دانؔ دے ٹبر دا سی بضلی ایلؔ دے نال سی اَتے اوہ کندہ کار اَتے چَنڈیا ہویا کاریگر سی اَتے اَسمانی، جامنی، لال رنگ دے کپڑیاں اَتے باریِک سُوتی کپڑے تے پُھل بُوٹے کڈھدا سی۔
24
. کُل سونا جیہڑا ربّ دے گھَر دِیاں شیواں تے ورتیا گیا مطلب کے ہدیئے دا سونا اُنتّی قِنطار اَتے ربّ دے گھَردی مِثقال دے حِساب نال سَت سو تِریِہ مِثقال سی۔
25
. اَتے لوکاں وَلوں دِتے ہوئے ہدئیِے دی چاندی اِک سو قِنطار اَتے ربّ دے گَھر دی مِثقال دے حسِاب نال اِک ہزار سَت سو پچھتر مِثقال سی۔
26
. یاں اِک بیکا مطلب کے اَدھی مِثقال، ربّ دے گھَر دی مِثقال دے حسِاب نال، ہر بندے کولوں لئی گئی۔ ایہہ سارا ہدیِہ اوہناں بندیاں کولوں اَکٹھا کیِتا گیا جیہڑے گنتی کردیاں ویِہ ورھے یاں ایہدُوں ودھ عُمر دے نِکلے اَتے ایہہ بندے گنتی وِچ چھے لَکھ تِن ہزار پنج سو پنجاہ سَن۔
27
.سَو قنِطار چاندی نال پاک تھاں دیِاں نیِہیاں اَتے پڑدیاں دِیاں نیِہیاں ڈھالیِاں گئِیاں۔ مطلب کے اِک سو نیِہیاں سَن اَتے اِک قنِطار اِک نیِہہ تے لَگی۔
28
. بضلی ایلؔ نے باقی بچِیاں ہوئیاں اِک ہزار سَت سو پچھتر چاندی دِیاں مِثقالاں نال تھماں لئی کُنڈے بنائے۔ اوہناں تھماں دِیاں سریاں نُوں مَڑھیا اَتے اوہناں لئی پَٹیِاں بنائیِاں۔
29
. اُچیچے ہدئیے دے پِتل دا بھار ستر قِنطار اَتے دو ہزار چارسو مِثقال سی ۔
30
. اوہدے نال اوہنے اَکٹھ دے تںبُو دے بُوہے دِیاں نیِہیاں پِتل دا مذبح، پِتل دی چھنچِھری، مذبح دیِاں ساریاں شیئواں،
31
.اَکٹھ دی تھاں دے آل دوالے دِیاں نیِہیاں، وہیڑے دے بُوہے دیِاں نیِہیاں رَبّ دے گھَر دے تںبُو دے کُل کِلے اَتے ویڑھے دے تںبُو دے سارے کِلے بنائے۔