1
.سو بضلی ایلؔ، اہلیابؔ اَتے سارے سیانے بندے جِنہاں دے دِلاں نُوں خُداوند نے سیانف اَتے عقل نال مالا مال کیِتا اے کَم کَرن تاں جو اوہ خُدا دے گھَر نُوں بنان دا کَم خُدا دے دِتّے ہوئے حُکم دے حِساب نال پُورا کَرن۔"
2
. تد مُوسیٰؔ نے بضلی ایلؔ ،اہلیابؔ اَتے کُل سیانیاں بندیاں نُوں سَدیا جِنہاں دے دِلاں وِچ خُداوند نے سیانف بھَر دِتی سی مطلب کے جِنہاں دے دِلوں ایہہ گَل اُٹھی پئی جا کے کَم کرن۔
3
. سو اِسرائیِلیؔ ربّ دا گھر بنان لئی جیہڑے جیہڑے ہدئیے لیائے اوہ اوہناں نے مُوسیٰؔ دے ہتھوں لَے لئے۔ پَر لوکی فیر وی ہرسویل اپنے دِل دی خُوشی نال ہدیئے مُوسیٰؔ کول لیاندے رہیے۔
4
. سو ربّ دے گھَر نُوں بنان والے سارے سیانے اَتے چنڈے ہوئے کاریِگر ربّ دے گھَر دا کَم چھڈ کے مُوسیٰؔ کول آئے۔
5
. ایہناں چنڈے ہوئے کاریِگراں نیں مُوسیٰؔ نُوں دَسیا پئی "لوک خُدا دا گھَر بنان لئی جِہدے لئی ربّ نے حُکم دِتا اے لوڑ توں ودھ کے ہدئیے دے رہیے نیں۔"
6
. سو مُوسیٰؔ نے ہدایت کیِتی پئی جماعت وِچوں ہُن کوئی وی ربّ دا گھَر بنان لئی ہور ہدیِہ نہ لَیاوے۔ تد لوکی ہدئیے لیان توں مُڑے۔
7
. کیوں جو اوہناں کول سامان لوڑ توں وادھُو ہو گیا سی۔
8
. اَتے کَم کرن والے سیانے اَتے چنڈے ہوئے کاریگراں نیں اَکٹھ دا تںبُو دَس باریِک اُونے ہوئے سُوتی، اَسمانی، جامنی اَتے لال رنگ دے کپڑے دے پڑدیاں نال بنایا جِنہاں تے چنڈے ہوئے اُستاداں دے ہتھ دے کڈھے ہوئے کروبی سَن۔
9
.ہر پڑدے دی لَمیائی اَٹھائی ہتھ اَتے چوڑائی چار ہتھ سی اَتے اوہ سارے پڑدے اِکو ناپ دے سَن۔
10
. بضلی ایلؔ نے پنج پڑدےآپو وِچ جوڑے اَتے دُجے پنج پڑدے وی آپو وِچ جوڑے۔
11
.اَتے اَخیِرلے وڈے پڑدے دی باہرلی کناری تے اوہنوں جوڑن لئی اَسمانی رنگ دیِاں لُپیِاں لائیِاں اَتے اجیہاں لُپیِاں اوہنے اَخیِرلے وڈے پڑدے دے دُجے پاسے دی باہرلی کناری تے وی لائیِاں۔
12
. پنجاہ لُپیِاں اوہنے اِک پڑدے تے اَتے پنجاہ ہی دُجے پڑدے دی باہرلی کناری تے جوڑن والے پاسے لائیِاں۔ ایہہ لُپیِاں آموسامنے سَن۔
13
.اَتے اوہنے سونے دیِاں پنجاہ کُنڈیِاں بنائیِاں اَتے اوہناں کُنڈیِاں نال ہی پڑدیاں آپو وِچ اجیہا جوڑیا پئی اَکٹھ دی تھاں جُڑ کے اِک ہوگئی۔
14
. بضلی ایلؔ نے بکری دے والاں نال گیارہ پڑدے اَکٹھ دی تھاں دے اُتلے پاسے لئی بنائے۔
15
. ہر پڑدے دی لَمیائی تریِہ ہتھ اَتے چوڑائی چار ہتھ سی اَتے اوہ گیارہ پڑدے اِکو ہی میچ دے سَن۔
16
. اوہنے پنج پڑدے اِک پاسے جوڑے اَتے چھے پڑدے دُجے پاسے۔
17
. اَتے پنجاہ لُپیِاں اوہناں جُڑے ہوئے پردیاں دیِاں کنارِیاں تے باہرلے پاسے اَتے پنجاہ ہی لُپِیاں جُڑے ہوئے دُجے پڑدیاں دیِاں باہرلی کنارِیاں تے لائیِاں۔
18
. بضلی ایلؔ نے پنجاہ گُنڈیِاں پِتل دیِاں وی بنائیِاں تاں جو اوس تںبُو نُوں اینج جوڑ دیوے پئی اوہ اِک ہو جاوے۔
19
. اوہنے اِک اوچھاڑ تَںبُو لئی بھیڈُواں دیِاں رنگیِاں ہوئیِاں لال گھَلاں دا بنایا اَتے اوس اوچھاڑ تے چاڑھن لئی دُجا اوچھاڑ بکری دیِاں گھَلاں دا بنایا۔
20
.بضلی ایلؔ نے اَکٹھ دے تںبُو دے ڈھانچے لئی کِکر دی لکڑ دے تختے بنائے۔
21
. ہرتختے دی لَمیائی دَس ہتھ اَتے چوڑائی ڈیڑھ ہتھ سی۔
22
. تختیاں نُوں آپو وِچ جوڑن لئی ہر تختے وِچ دو دو چُولاں کڈیِاں گئیِاں سَن۔ اَکٹھ دے تںبُو دے سارے تختیاں وِچ اینج ہی چُولاں کڈھیِاں گئیِاں سَن۔
23
. اَتے اوہنے جیہڑے تختے اَکٹھ دے تںبُو لئی بنائے اوہناں وِچ ویِہ تختے دَکھنی لائمے لائے۔
24
.بضلی ایلؔ نے اوہناں وہیِاں تختیاں ہیٹھ چاندی دے چالی خانے بنائے مطلب کے ہر تختے دِیاں دُوںواں چُولاں لئی دو دو خانے بنائے۔
25
.اَکٹھ دے تںبُو دے دُجے پاسے لئی مطلب کے پہاڑ دی لائم وَل تختے لائے۔
26
. اَتے اوہناں لئی وی چاندی دے چالِھی خانے بنائے مطلب کے اِک تختے ہیٹھ دو خانے،دُوجے تختے ہیٹھ دو خانے اَتے اینج ای باقی دے تختیاں دے ہیٹھ وی دو دو خانے ۔
27
. اَتے اَکٹھ دے تںبُو دے پچھلے پاسے مطلب کے لاہندی لائمے بضلی ایلؔ نے چھے تختے لائے۔
28
.اَکٹھ دے تںبُو دے پچھلیاں دُوںواں پاسیاں دیِاں گُٹھاں لئی دو تختے لائے۔
29
. دُوںواں نُکراں دے تختے ہیٹھوں لے کے اُتے تیِک وِڈھ وِچ دوہرے سَن پَر اِکو ہی ڈھانچے وِچ جڑے ہوئے سَن۔
30
. چاندی دے خانیاں سنہے اَٹھ تختے سَن۔کُل سولاں خانے سَن، دو خانے پہیلے تختے ہیٹھ، اَگلے دو خانے دُجے تختے ہیٹھ اَتے اینج ہی باقی دے خانے۔
31
.بضلی ایلؔ نے کِکر دی لکڑ دے بینڈے بنائے، پنج بینڈے اکٹھ دے تںبُو دے اِک پاسے دے تختیاں لئی بنائے
32
.اَتے پنج بینڈے اَکٹھ دے تںبُو دے پچھلے پاسے لاہندی لائم دے تختیاں لئی بنائے۔
33
. اَتے اوہنے وِچلے بینڈے نُوں اجیہا بنایا پئی تختیاں دے وِچوں ہوکے اِک سرے توں دُجے سرے تیِک اَپڑے۔
34
. اوہنے تختیاں نُوں سونے نال مڑھیا اَتے سونے دے کڑے بنائے تاں جو بینڈیاں لئی خانیاں دا کَم دین اَتے اوہنے بینڈیاں نُوں سونے نال مڑھیا۔
35
. بضلی ایلؔ نے وِچلا پڑدا اَسمانی ارغوانی اَتے لال رنگ دے کپڑیاں اَتے باریِک وَٹے ہوئے سُوتی کپڑے دا بنایا جِہدے تے چَنڈے ہوئے کاریگر دے ہتھ دے کروبی کڈھے ہوئے سَن۔
36
. اوہنے پڑدے لئی کِکر دی لکڑ دے چار تھم بنائے اَتے اوہناں نُوں سونے نال مَڑھیا۔ اوہنے تھماں لئی سونے دِیاں کُنڈیِاں وی بنائِیاں اَتے اوہناں لئی چاندی ڈھال کے چار خانے بنائے۔
37
. اوہنے اَکٹھ دے تںبُو دے بُوہے دا پڑدا اَسمانی، جامنی اَتے لال رنگ دے کپڑیاں اَتے باریِک وَٹے ہوئے سُوتی کپڑے دا بنایا جیہڑا پُھل بوٹیاں والا سی۔
38
. اوہنے اوس پڑدے لئی کُنڈیِاں سنہے پنچ تھم بنائے اَتے اوہناں دیاں سِریاں تے پٹّیِاں نُوں سونے نال مَڑھیا۔ اوہناں لئی جیہڑے پنج خانے سَن اوہ پِتل دے بنے ہوئے سَن۔