1
. مُوسیٰ نے بنی اِسرائیِلؔ دی ساری جماعت نُوں اَکٹھا کر کے آکھیا پئی "جیہڑیاں گلاں تے عمل کرن دا حُکم خُداوند نے تُہانوں دِتّا اے اوہ ایہہ نیں۔
2
.چھے دیہاڑے کَم کار کیِتا جاوے پَر ستواں تُہاڈے لئی پاک دیہاڑا مطلب کے خُداوند دے آرام دا دیہاڑا اے۔ جے کوئی اوہدے وِچ کُجھ کَم کرے اوہ ماردِتا جاوے۔
3
. تُسیِں سبت والے دیہاڑے اپنے کِسے وی گھر وِچ اَگ نہ بالیا جے۔"
4
. مُوسیٰؔ نے بنی اِسرائیِلؔ دی ساری جماعت نُوں آکھیا پئی"جیہڑی گَل دا حُکم خُداوند نے دِتا اے اوہ ایہہ وے۔
5
.پئی "تُہاڈے وِچوں ہر اِک خُداوند لئی دِلوں ہدیہ لیایا کرے۔ سونا، چاندی، پِتل
6
.اَسمانی رنگ، اَرغوانی رنگ اَتے لال رنگ دے کپڑے اَتے باریِک کتان اَتے بِکریاں دی پشم۔
7
.اَتے بھیڈوُاں دیِاں رَتیِاں گھَلاں، بَکری دا چَنگا چمڑا، کِکر دی لکڑ،
8
.دیِوے بالن لئی تیل، مَسح کرن دے تیل لئی مَسالے اَتے خُوشبُودار بخُور،
9
.اَفود اَتے سینہ بند لئی سلیمانی پتھر اَتے جَڑن دا پتھر۔
10
. تُہاڈے وِچوں اوہ سارے جیہڑے چنڈے ہوئے کاریگر نیں آن اَتے اوہ ساریاں شیئواں جِنہاں دا حُکم خُداوند نے دِتا اے بنان۔
11
.مطلب کے گھر اَتے اوہدا تَںبُو اَتے اوہدا اُچھاڑ اَتے اوہدِیاں گُنڈِیاں، تختے،بینڈے،تھمِیاں اَتے پاوے۔
12
. صندُوق اَتے اوہدے ڈنڈے، سرپوش اَتے اوہنوں ڈھکن والا پڑدہ۔
13
. میز اَتے اوہدے ڈنڈے اوہدے سارے پانڈے اَتے نذر دِیاں روٹِیاں
14
. اَتے چانن کرن لئی دیِوے دانِیاں اَتے اوہدے پانڈے اَتے دیِوے اَتے پالن دا تیل۔
15
. اَتے بَخُور پخان لئی قُربان گاہ اَتے اوہدے ڈنڈے اَتے مَسح کرن لئی تیل اَتے خُوشبُودار بخُور اَتے ربّ دے گھر دے بُوہے لئی پڑدہ۔
16
. اَتے سوختنی قُربانی دا مذبح اَتے اوہدے لئی پِتل دی کِنگھری اَتے اوہدے ڈنڈے اَتے اوہدے سارے پانڈے اَتے حوض تے اوہدی چوکی۔
17
. اَتے وہیڑے دے پڑدے تھماں سنہے اَتے اوہناں دے پاوے اَتے وہیڑے دے بُوہے دا پڑدہ
18
.اَتے گَھر دے کِلے اَتے وہیڑے دیِاں کِلیاں اَتے اوہناں دُوںواں دِیاں رَسیِّاں۔
19
.اَتے ربّ دے گھرَ دی سیوا لئی پُھل بُوٹے کَڈھے ہوے لِباس اَتے ہارُونؔ کاہن لئی پاک لِباس اَتے اوہدے پُتراں لئی لِباس تاں جو اوہ کہانت دا کَم کرن۔"
20
.تد بنی اِسرائیِلؔ دی کُل جماعت مُوسیٰؔ کولوں ویِدعاں ہوئی۔
21
.اَتے جِہدا جِہدا دِل کیِتا اَتے جِہدا جہَدا رُوح کیِتا اوہ اَکٹھ دے تَںبُو دے کَم اَتے اوتھوں دی عِبادت اَتے پاک لِباس لئی خُداوند دا ہدیِہ لیایا۔
22
. اَتے کیِہ بندہ اَتے کیِہ زنانی جِنہیاں دا دِل کیِتا اوہ کُل سر دِیاں سُویاں، کَناں دِیاں والِیاں، چھاپاں اَتے ہور ٹُومباں جیہڑیاں کُل سونے دِیاں سَن لَے آون لگے۔ اینج لوکاں نیں خُداوند اَگے سونے دا چڑھاوا چڑھایا۔
23
. اَتے جِہدے جِہدےکول اَسمانی رنگ، جامِنی رنگ، لال رنگ دے کپڑے اَتے باریِک سُوتر اَتے بکرِیاں دی پشم اَتے بھیڈواں دِیاں رنگیاں ہوئِیاں لال کَھلاں اَتے بکری دِیاں کَھلاں سَن لَے آئے۔
24
.اَتے جِنہے چاندی یا پِتل دا ہدیِا دینا چاہیا اوہ اوہو ہی خُداوند لئی لَیایا اَتے جِس کِسے کول کِکر دی لکڑ سی اوہ اوہنوں ہی لَے آیا۔
25
. جِنِیاں زنانِیاں نُوں چج سی اوہناں اپنے ہتھیِں کَت کَت کے اَسمانی، جامِنی، لال رنگ اَتے باریِک سُوتی ڈوراں لَیا کے دِتِیاں۔
26
. اَتے جِنِیاں زنانِیاں سیانِیاں سَن اوہناں بکریِاں دے وال کَتے۔
27
. اَتے جیہڑے آگُو سَن اوہ اَفود تے سینہ بند لئی سُلیمانی پتھر اَتے ہور جڑاو پتھر،
28
. لَو کَرن اَتے مَسح کرن دے تیل اَتے خوشبُودار بخُور لئی مَسالے تے تیل لیائے۔
29
. اینج کُل بنی اِسرائیِلی اپنے دِل دی خُوشی دے نال خُداوند لئی ہدئیے لیائے مطلب کے ہربندے اَتے زنانی نے جہِدا جہِدا دِل کیِتا پئی ایہناں کَماں لئی جِنہاں دا حُکم خُداوند نے مُوسیٰؔ نُوں دِتا سی، کُجھ دیوے اوہناں نے دِتا۔
30
.اَتے مُوسیٰؔ نے بنی اِسرائیِلؔ نُوں آکھیا پئی "ویکھو! خُداوند نے بضلی ایلؔ نُوں جیہڑا اُوریؔ دا پُتر اَتےحُورؔ دا پوترا جیہڑا یہوداہؔ دے ٹَبر وِچوں اے، ناں لے کے چُنیا اے۔
31
. اَتے ربّ نے بضلی ایلؔ نُوں حِکمت، سمجھ ، عِلم اَتے ہرقِسم دے ہُنر لئی اپنے رُوح نال بھریا اے۔
32
.اَتے اوہنوں فَنی نَمونے، سونے، چاندی اَتے پِتل دے کَم،
33
. اَتے پتھرتے لکڑ چھانگن وِچ اَتے ہر اِک نادر کَم دے بنان وِچ، چنگا چنڈیا اے۔
34
.اَتے اوہنے اوہنوں تے اخیسمکؔ دے پُتر اہلیابؔ نُوں جیہڑا دانؔ دے ٹبر دا اے، ہُنر سَکھان دا وَل دَسیا اے۔
35
. اَتے اوہناں دے دِلاں وِچ اَجیہی سیانف بَھری اے جَہدے نال اوہ ہرقِسم دی کاریگری وِچ ہر فَن مولا ہون۔ اَتے اوہ کندہ کار دا اَتے چنڈے ہوئے اُستاد دا اَتے کَڈھائی کرن والے دا جیہڑے اَسمانی، جامنی تے لال رنگ دیاں کپڑیاں اَتے باریِک سُوت تے بُھل بُوٹے کڈھن دا اَتے جولاہے دا اَتے ہر طرح دے دستکار دا کَم کر سَکن اَتے عجیب تے نادر شیئواں ایجاد کَرن۔