¹ .اَتے تُوں بخُور پخان لئی کِکر دی لکڑ دی اِک قُربان گاہ بناویِں۔ ² . اوہدی لمیائی اِک ہتھ اَتے چوڑائی اِک ہتھ ہووے۔ اوہ چَوگُٹھی رہیوے اَتے اوہدی اُچیائی دو ہتھ ہووے اَتے اوہدے سینگ اِکو ٹوٹے دے بنائے جان۔ ³ .تُوں سوختنی قُربانی دے مذبے دا اُتلا حِصّہ،اوہدے پاسے جیہڑے اوہدے آل دوالے نیں اَتے اوہدے سینگ پاسے دے سونے نال مَڑھیں۔ اَتے اوہدے آل دوالے سونے دا اِک تاج بناویِں۔ ⁴ . اَتے تُوں اوس تاج دے ہیٹھاں اوہدے دُونواں پاسیاں وِچ سونے دے دو کَڑے اوہدے دُونواں پاسے بناویِں۔ اوہ اوہنوں چُکن دے ڈنڈیاں لئی خانیاں دا کَم دین گے۔ ⁵ . اَتے ڈنڈے کِکر دی لکڑ دے کَڑھ کے اوہناں تے سونا مَڑھیِں۔ ⁶ .اَتے تُوں اوہنوں اوس پڑدے دے اَگے دھریِں جیہڑا گواہی دے صندُوق دےاَگے وے۔ اوہ اوس اوچھاڑ دے اَگے رہیووے جیہڑا گواہی دے صندُوق دے اُتے وے جِتھے مَیں تَینوں مِلاں کراں گا۔ ⁷ . ایسے تے ہارُونؔ خُوسبُودار بخُور پخایا کرے۔ ہر سویل دیِویاں نُوں ٹھیک کرن دے ویلے بخُور پخایا کرے۔ ⁸ . اَتے سورج دے ڈُبن توں پہیلاں پہیلاں وی جَد ہارُونؔ دیِوے بالے تد بخُور پَخاوے۔ ایہہ بخُور خُداوند اَگے تُہاڈے وِچ پیڑھیئو پِیڑھی پخایا جاوے۔ ⁹ .اَتے تُسیں اوہدے تے کوئی اوپرا بخُور نہ پخایا جے نہ اوہدے تے سوخُتنی قُربانی اَتے نذر دی قُربانی چڑھاویِں اَتے کوئی تپاون وی اوہدے تے نہ تپاویِں۔ ¹⁰ . ہارُوؔن سال وِچ اک واری اوہناں دے سینگاں اُتے کفارہ دیوے کرے۔ خطا دے کفارے دے چڑھاوے دے لہو نال اوہ ورھے وِچ اِک وار کفارہ دیوے گا اَتےایہہ کَم پیِڑھیو پیِڑھی ہُوندا رہیوے۔ ایہہ کَم خُداوند لئی سب توں چوکھا پاک اے۔" ¹¹ . فیر خُداوند نے مُوسیٰؔ نُوں آکھیا ¹² .پئی "جدوں تُوں اِسرائیِلیاں نُوں گِنیں تے جِنہے گِنے گئے ہون اوہ اِک اِک بندے دی گِنتی ویلے خُداوند لئی اپنی جان لئی بَھرت بھرن تاں جو جدوں تُوں اوہناں دی گِنتی کردا ہوویں اوس ویلے کوئی وَبا اوہناں وِچ نہ پھیلے۔ ¹³ . گنن ویلے جِنہوں جِنہوں گن لیا جاوے اوہ مَقدِس دی مِثقال دے حِساب نال اَدھی مِثقال دیوے (مِثقال ویِہ جِیرہے دی ہُوندی اے)۔ ایہہ اَدھی مِثقال خُداوند لئی ہووے۔ ¹⁴ . ہر بندہ جیہڑا گِنیا جاوے مطلب کے جِنہاں دی عُمر ویِہ ورھیاں دی یاں ایہدوں ودھ دی ہووے اوہ پَکا میرے اَگے چڑھاوا چڑھاوے۔ ¹⁵ . اَتے جدوں تُسیں اپنیِاں جاناں لئی کفارے دا چڑھاوا چڑھاو تے دولت والا اَدھی مِثقال توں ودھ نہ دیوے اَتے نہ مہاتڑ ایہدوں گھَٹ دیوے۔ ¹⁶ . اَتے تُوں بنی اِسرائیِلؔ کولوں کفارے دا پیسہ اَکٹھا کر کے اَکٹھ دے تںبُو دے کماں وِچ لاوِیں تاں جوبنی اِسرائیِلؔ وَلوں تُہاڈئِیاں جاناں دے کفارے لئی میرے اَگے یادگار ہووے۔" ¹⁷ . تَد خُداوند نے مُوسیٰؔ نُوں ایہہ آکھّیا ¹⁸ .پئی "تُوں دھون لئی پِتل دا اِک حوض اَتے پِتل دی ہی اِک چوکی بناویِں اَتے اوہنوں اَکٹھ دے تںبُو اَتے قُربان گاہ دے وِچکاردَھر کے اوہنوں پانی نال بَھر دیویِں۔ ¹⁹ .اَتے ہارُونؔ تے اوہدے پُتر اپنے ہتھ پیر اوس پانی نال دھون کرن۔ ²⁰ . جدوں اوہ اَکٹھ دے تںبُو وِچ جان یاں قُربان گاہ دے نیڑے سوختنی قُربانِیاں چڑھان لئی جان تدوں اوہ اپنے آپ نُوں پانی نال دھون تاں جو مَر نہ جان۔ ²¹ . اوہ اپنے ہتھ پیر پَکا دھون کرن تاں جو اوہ مَر نہ جان۔ ہارُونؔ تے اوہدِیاں پیڑھیاں لئی ایہہ سدا دا قانُون ہووے۔" ²² . تد خُداوند نے مُوسیٰؔ نوں ایہہ آکھیا پئی ²³ ."تُوں مِقدِس دی مِثقال دے حِساب نال خاص خاص خُوشبُودار مصالِح لَویِں مطلب کے اپنے آپ نَکلیا ہویا مُر جیہڑا پنج سو مِثقال ہووے، ڈھائی سو مِثقال دارچیِنی اَتے ڈھائی سو مِثقال خُوشبُودار اگر، ²⁴ . پنج سو مِثقال تج اَتے اِک ہِن زَیتُون دا تیل۔ ²⁵ . تُوں ایہناں سارِیاں شئیواں نال مَسح کرن دا پاک تیل بناویِں مطلب کے گُندھی دی حِکمت دے حِساب نال مَسح کرن دا پاک خُوشبُودار روغن بناویِں۔ ایہو ہی میرے لئی مَسح کرن دا تیل ہووے گا۔ ²⁶ .ایسے نال تُوں اِکٹھ دے تںبُو نُوں اَتے شہادت دے صندُوق نُوں۔ ²⁷ . اَتے میز نُوں اوہدے پانڈیاں سَنہے اَتے بُخور پخان دی قُربان گاہ نُوں۔ ²⁸ . اَتے سوختنی قُربانی چڑھان دے مَذبحے نُوں اوہدے کُل پانڈیاں سنہے اَتے حَوض نُوں اَتے اوہدی چَونکی نُوں مَسح کریِں۔ ²⁹ . اَتے اوہناں نُوں پاک کریِں تاں جو اوہ اُکا پاک ہو جان۔ جو کُجھ وی اوہناں نُوں ٹئو جاوے گا اوہ پاک ہو جاوے گا۔ ³⁰ .اَتے تُوں ہارؔون تے اوہدے پُتراں نُوں مَسح کریِں اَتے اوہناں نُوں پاک کریِں تاں جو اوہ میرے لئی کاہِن دا کم پُورا کرن۔ ³¹ . اَتے تُوں بنی اِسرائیِلؔ نُوں آکھ دیویِں پئی ’ایہہ تیل میرے لئی تُہاڈی پیِڑھیو پیِڑھی مَسح کرن دا پاک تیل ہووے گا۔ ³² . ایہہ کسے بندے دے جُسّے تے نہ پایا جاوے اَتے نہ تُسیں کوئی ہور روغن ایہدی ترکیِب تے بنانا ایس لئی پئی ایہہ پاک اے اَتے تُہاڈے لئی وی ایہہ پاک ٹھہرے۔ ³³ .جو کوئی ایہدے وانگ کُجھ بناوے یاں ایہدے وِچوں کُجھ کِسے اوپرے بندے نُوں لاوے اوہ اپنی قوم وِچوں کٹ دِتّا جاوے‘۔" ³⁴ .اَتے خُداوند نے مُوسیٰؔ نُوں آکھیا پئی "تُوں خُوشبُو دار مصالحے مُر اَتے مصطکی اَتے لَون اَتے خُوشبُو دار مصالحے دے نال خالص لُبان تول وِچ اِکو جِنا لَویِں۔ ³⁵ . اَتے لُون رَلا کے اوہدے نال گُندھی دی حِکمت دے حِساب نال خُوشبُودار روغن وانگ صاف اَتے پاک بخُور بناویں۔ ³⁶ . اَتے ایہدے وِچوں کُجھ وا وا باریِک پیِہ کے اِکٹھ دے تںبُو وِچ شہادت دے صُندوق دے اَگے جِتھے مَیں تَینوں مِلاں کراں گا رَکھیِں۔ ³⁷ . جیہڑا بُخور تُوں بناویں اوس ترکیِب دے حِساب نال تُسیں اپنے لئی کُجھ نہ بنایا جے۔ اوہ بُخور تیرے نظر وِچ خُداوند لئی پاک ہووے۔ ³⁸ . جو کوئی سُنگھن لئی وی اوہدے وانگ کُجھ بناوے اوہ اپنی قوم وِچوں کٹ دِتّا جاوے۔"