1
.فیرتَنیوں ایہہ پَک ہووے پئی تُوں اوہناں نُوں میرے لئی کہانت دا کَم کرن واسطے وَکھ کریِں ۔ اِک وَچھا اَتے دو بے عیب دُنبے لَویِں۔
2
.اَتے بے خمیِری روٹی اَتے بے خمیِرے کُلچے جِنہاں نال تیل رَلیا ہووے۔ نالے تیل دِیاں چوپڑئِیاں ہویاں چپاتِیاں لَوّیِں۔ ایہہ سارئِیاں کنَّک دے مَیدے دِیاں بناویِں۔
3
.اَتے ایہناں نُوں اِک ٹوکری تے دَھر کے، اوس ٹوکری نُوں وچھے اَتے دُنبیاں سنہے اَگاں لَے آویِں۔
4
. فیر ہارُونؔ اَتے اوہدے پتُراں نُوں اَکٹھ دے تںبُو دی بَرُوں تے لَیا کے اوہناں نُوں پانی نال نہوایِں۔
5
.اَتے اوہ کپڑے لے کے ہارُونؔ نُوں کُڑتا اَتے افُود دا جُبّہ اَتے سینہ بند پاویِں اَتے افُود دا کاریگری نال بنیا ہویا لَک دا پٹکا اوہنوں بنھیِں۔
6
.اَتے پَگ اوہدے سر تے وَل کے اوس پِگ اُتے پاک تاج لا دیویِں۔
7
.تد مَسح کرن والا تیل لے کے اوہدے سر تے ڈوہلیِں اَتے اینج تُوں اوہنوں مَسح کریِں۔
8
.فیر تُوں اوہدے پُتراں نُوں اَگاں سَد کے کُڑتے پَواویِں۔
9
.ہارُونؔ اَتے اوہدے پُتراں دے لَک پٹکے وَل کے اوہناں نُوں پَگڑیاں بَنھیِں تاں جو کہانت دے عہدے تے سَدا لئی اوہناں دا حق رہیوے۔ اینج تُوں ہارُونؔ اَتے اوہدے پُتراں نُوں پاک کر کے اوہناں واسطے میری سیوا کرن لئی وَکھ کریِں۔
10
. اَتے فیر تُوں اوس وچھے نُوں اِکٹھ دے تںبُو دے کول لَیاویِں۔ ہارُونؔ اَتے اوہدے پُتّر وَچھے دے سر تے اپنے ہتھ دَھرن۔
11
.فیر تُوں اوس وَچھے نُوں اَکٹھ دے تںبُو دے بُوہے تے لَیا کے حلال کریِں۔
12
.اوس وچھے دی رَت وِچوں کُجھ لے کے اوہنوں اپنی اُنگلی دے لا کے قُربان گاہ دے سِنگاں تے لاویِں اَتے باقی ساری رَت قُربان گاہ دے پاوے تے ڈوہل دیویِں۔
13
.فیر اوس چربی نُوں جِہدے نال آندراں کِجیِّیاں رہیندیاں نیں اَتے جِگر اُتے دی جھلّی نُوں اَتے دُوہاں گُردیاں نُوں اَتے اوہناں دے اُتے دی چربی نُوں لَے کے سب کُجھ قُربان گاہ دے اُتے ساڑھیِں۔
14
. پَر اوس وچھے دے ماس اَتے کَھل اَتے گوئے نُوں اَکٹھ دی تھاں دے باہر اَگ وِچ ساڑھ دیویِں کیوں جو ایہہ خطا دی قُربانی اے۔
15
.فیر تُوں اِک دُنبا لَویِں اَتے ہارُونؔ تے اوہدے پُتر اپنے ہتھ اوس دُنبے دے سر تے دَھرن۔
16
.تُوں اوس دُنبے نُوں حلال کریِں اَتے اوہدی رَت لَے کے قُربان گاہ دے چَواں پاسے چِھڑکیِں۔
17
.تُوں دُنبے نُوں ٹوٹے ٹوٹے کریِں اَتے اوہدِیاں آندراں اَتے پاویاں نُوں دھو کے اوہدیاں ٹوٹیاں تے اوہدے سر نال ملا دیویِں۔
18
.فیر ایہہ سارا دُنبا قُربان گاہ تے دَھر کے ساڑھ دیویِں۔ ایہہ خُداوند لئی سوختنی قُربانی ہووے گی۔ ایہہ مِٹھی واشنا مطلب کے خُداوند لئی آتشیِن قُربانی اے۔
19
. فیر تُوں دُجا دُنبا لَویِں اَتے ہارُونؔ تے اوہدے پُتر اوس دُنبے دے سر تے اپنے ہتھ دَھرن۔
20
.تد اوس دُنبے نُوں حلال کریِں اَتے اوہدی رَت وچِوں کُجھ لَے کے ہارُونؔ اَتے اوہدے پُتراں دے سجے کَن دے کُولے ماس تے اَتے سجے ہتھ اَتے سجے پیر دے اَنگُوٹھیاں تے لاویِں۔ فیر رَت نُوں قُربان گاہ تے چَواں پاسے چِھڑک دیویِں۔
21
. قُربان گاہ دی رَت اَتے مَسح کرن دے تیل وِچوں تھوڑا تھوڑا لے کے ہارُونؔ دے اَتے اوہدے پُتراں دے لباس اُتے چِھڑک دیویِں۔ تد اوہ اپنے لباس سنہے اَتے اوہدے نال اوہدے پُتر اپنے اپنے لباس سنہے پاک ہون گے۔
22
.تُوں دُنبے دی چربی اَتے اوہدی موٹی پُوچھل، اوہدِیاں آندراں کَجن والی چربی اوہنوں اَتے جِگر اُتے دی جِھلی نُوں اَتے دُوہاں گُردیاں نُوں اَتے اوہدے اُتے دی چربی نُوں اَتے اوہدا سجا پٹ لَویِں ایس واسطے پئی ایہہ میرے اَگے کاہن نُوں مُخصوص کرن دا دُنبا اے۔
23
.اَتے بے خمیری روٹی دی چنگیر وِچوں جیہڑی خُداوند دے اَگے دَھری ہووے اِک روٹی اَتے اِک روغنی کُلچہ اَتے اِک چپاتی لَویِں ۔
24
.ایہناں ساریاں نُوں ہارُوؔن اَتے اوہدیاں پُتراں دے ہتھاں تے دَھر کے، خُداوند دے اَگے ہَلاویِں تاں جو ایہہ ہلان دا ہدیا ہووے۔
25
.فیر اوہناں نُوں اوہناں دے ہتھوں لَے کے قُربان گاہ تے سوختنی قُربانی دے اُتے ساڑھ دیویِں تاں جو اوہ خُداوند اَگے مِٹھی واشنا ہووے۔ ایہہ خُداوند لئی آتشین قُربانی اے۔
26
.تُوں ہارُوؔن نُوں مُخصوص کرن والے دُنبے دا سینہ لَے کے اوہنوں خُداوند اَگے ہِلاویِں تاں جو اوہ ہلان دا ہدیا ہووے۔ ایہہ تیرا حِصّہ ہووے گا۔
27
.تُوں ہارُوؔن اَتے اوہدے پُتراں دے مُخصوص کرن دے دُنبے دے ہلان دے ہدیے دے سینے نُوں جِنہوں ہَلا لَیا گیا اے اَتے چُکن دے ہِدیے دے پَٹ نُوں جَنہوں چُک لیا گیا اے، لَے کے اوہناں دُوہاں نُوں پاک ٹھہراویِں۔
28
.تاں جو ایہہ کُل بنی اِسرائیِلؔ وَلوں سَدا تیِک ہارُوؔن اَتے اوہدے پُتراں دا حق ہووے کیوں جو ایہہ چُکے جان دا ہدیا اے۔ سو ایہہ بنی اِسرائیِلؔ وَلوں اوہناں دی سلامتی دیاں ذبیِحیاں وِچوں خُداوند لئی چُکے جان دا ہدیا ہووے گا۔
29
. ہارُوؔن دے پاک کپڑے اوہدے پِچھوں اوہدے پُتراں لئی رہن گے۔ تاں جو اوہ اوہناں کپڑیاں وِچ میرے لئی مَسح کیِتے جان۔
30
.اوہدے پُتراں وِچوں جیہڑا اوہدی کہانت دی گدی سنبھالے، جَد اوہ میرے حُضور سیوا کرن لئی پاک تھاں وِچ وڑے، ایہناں کپٹریاں نُوں سَت دیہاڑیاں تیِک پائی رَکھے۔
31
.جیہڑے دُنبہ کاہن نُوں مُخصوص کرن ویلے ورتیا جاوے، اوہدا گوشت پاک تھاں تے اُبالیِں۔
32
. ہارُوؔن تے اوہدے پُتر اَکٹھ دے تںبُو دے بُوہے تے اوس دُنبے دا گوشت اَتے چنگیر وِچ دَھریاں ہویاں روٹِیاں کھان۔
33
. جیہڑیاں شیواں نال اوہناں نُوں مُخصوس تے پاک کرن لئی کفارہ دِتّا جاوے اوہ اوہناں نُوں وی کھان۔ پَر اوہناں شیواں وِچوں کُجھ وی کوئی اوپرا جی نہ کھاوے کیوں جے ایہہ شیواں میرے لئی پاک نیں اَتے میرے لئی وَکھ کیتیِاں ہویِاں نیں۔
34
.جے مُخصوص کرن دی قُربانی دے یاں روٹی وِچوں اَگلی سویل تیِک کُجھ بچے تے تُوں پَکا اوہنوں ساڑھ دیویِں۔ اوہنوں کدی نہ کھادا جاوے کیوں جو اوہ میرے لئی وَکھ کیِتا ہویا اے۔
35
. تُوں ہارُوؔن اَتے اوہدے پُتراں نال اوہو کریِں جِہدا مَیں تَینوں حُکم کیِتا اے۔ سَت دیہاڑیاں تیِک مُخصوصیت دی ایہہ تیاری ہوندی رہیوے۔
36
.تُوں ہر دیہاڑے خَطا دی قُربانی دے وَچھے نُوں کفارے لئی حلال کریِں اَتے تُوں کفارہ دین ویلے قُربانی گاہ نُوں صاف کرکے پاک کریِں اَتے تُوں اوہنوں مَسح کریِں تاں جو اوہ میرے لئی پاک ہوجاوے۔
37
.سَت دیہاڑیاں تیِک قُربان گاہ لئی کفارہ دیویِں اَتے اوہنوں خُداوند لئی پاک کریِں۔ تد قُربان گاہ اُکا پاک ہو جاوے گی اَتے جیہڑی شئے قُربان گاہ نُوں ٹئو جاوےگی اوہ وی پاک ہو جاوے گی۔
38
.تُوں ہر دیہاڑے اِک اِک ورّھے دے دو لیلے قُربان گاہ تے چڑھایاکریِں۔
39
. اِک لیلا سویلے اَتے دُوجا لیلا سُورج ڈُبن توں پہیلاں پہیلاں چڑھاویِں۔
40
.پہیلے لیلے نال ایفہ دے دَسویں حصّے جِنا مَیدہ دیویِں جِہدے وِچ ہِین دے چوتھے حصّے دے حِساب نال کُٹ کُٹ کے کڈھیا ہویا تیل رَلیا ہووے۔ اَتے ہِین دے چوتھے حصّے دے حِساب نال تپاون لئی مَے وی دیویِں۔
41
.تُوں دُوجا لیلا سُورج دے ڈُبن توں پہیلاں پہیلاں چڑھاویِں اَتے اوہدے نال سویل وانگ نذر دی قُربانی اَتے اونج دا ہی تپاون چڑھاویِں جِہدے نال اوہ خُداوند لئی مِٹھی واشنا اَتے آتشیِن قُربانی ٹھہرےگی۔
42
.ایہو سوختنی قُربانیِاں پیڑھیو پیڑھی اَکٹھ دے تںبُو دےبُوہے تے خُداوند اَگے سَدا ہوندیاں رہن۔ اوتھے مَیں تُہاڈے نال مِلاں کراں گا اَتے گلاں کیِتا کراں گا۔
43
.اوتھے مَیں بنی اِسرائیِلؔ نال مِلاں گا اَتے اوہ تھاں میرے جلال نال پاک ہووے گی۔
44
. مَیں اَکٹھ دے تںبُو اَتے قُربان گاہ نُوں اپنے لئی وَکھ کراں گا اَتے مَیں ہارُوؔن اَتے اوہدے پُتراں نُوں وی اپنے لئی وَکھ کراں گا تاں جو میرے لئی کہانت دا کَم کرن۔
45
.مَیں بنی اِسرائیِلؔ دے وچکار رہیواں گا اَتے اوہناں دا رَبّ ہوواں گا۔
46
. تد اوہناں نُوں پتا لَگ جاوے گا پئی مَیں خُداوند اوہناں دا رَبّ ہاں جیہڑا اوہناں نُوں مِصرؔ دے دیس وِچوں ایس لئی کڈھ لَے آیا تاں جو مَیں اوہناں دے وِچ رہیواں۔ مَیں ہی خُداوند اوہناں دا ربّ ہاں۔