1
.اَتے تُوں بنی اِسرائیلؔ وِچوں ہارُونؔ نُوں جیہڑا تیرا بھَرا اے اَتے اوہدے نال اوہدے پُتراں نُوں اپنے نیڑے کر لَویِں تاں جو ہارُونؔ اَتے اوہدے پُتر، ندبؔ، اَبیہوؔ، الیعزرؔ اَتے اِتمرؔ کہانت دے عہدے تے ہو کے میری سیوا کرن۔
2
. اَتے تُوں اپنے بھَرا ہارُونؔ لئی عِزت اَتے زِینت لئی پاک لِباس بنا دیویِں۔
3
.اَتے تُوں اوہناں ساریاں روشن ضمیراں نُوں جنِہاں نُوں مَیں حِکمت دی رُوح نال بھریا اے آکھ پئی اوہ ہارُونؔ لئی لِباس بنان تاں جو اوہ پاک ہو کے میرے لئی کہانت دا کَم کرے۔
4
.اَتے جیہڑے لِباس اوہ بنان گے اوہ ایہہ نیں مطلب کے سینہ بند، افُود، جُبّہ، اُونّیا ہویا چار خانیاں والا کُرتا، پَگ اَتے پَٹکا۔ اوہ تیرے بھَرا ہارُونؔ اَتے اوہدے پُتراں لئی ایہہ پاک لِباس بنان تاں جو اوہ میرے لئی کہانت دا کَم کرن۔
5
. کاریگر باریِک سُوتی کپڑا ورتَن جیہڑا سونے، اَسمانی، جامنی اَتے لال رنگ دا ہووے۔
6
. اَتے اوہ اَفُود سونے، اَسمانی ، جامنی اَتے لال رنگ دے کپڑے اَتے باریک اُونے ہوے سُوتی کپڑے دا بنان جیہڑا کِسے چنڈے ہوے کاریگر دے ہتھ دا کَم ہووے۔
7
. اَتے اوہ اینج جوڑیا جاوے پئی اوہدے دُوہاں موڈیاں دے سِرے آپو وِچ مِلا دِتے جان۔
8
. اَتے اوہدے اُتے کاریگری نال جیہڑا پٹکا بَنھن لئی ہووے گا اوہدے تے اَفود ورگا کَم ہویا ہووے۔ اَتے اوہ اوسے کپڑے دا ہووے اَتے سونے، اَسمانی، جامنی اَتے لال رنگ دے کپڑیاں اَتے اوہ کپڑا باریِک سُوتر دا اُونیا ہووے۔
9
.اَتے تُوں دو سلیمانیؔ پتھر لَے کے اوہناں اُتے اِسرائیِلؔ دے باراں پُتراں دے ناں کُھرچ کے لکھیِں۔
10
. اوہناں وِچوں چھیاں دے ناں اِک پتھر تے اَتے باقی دے چھے ناں دُجے پتھر تے اوہناں دے جَمن دی تاریخ دے حِساب نال ہون۔
11
. تُوں پتھر دے کُھرچن ہار نُوں لا کے اَنگُوٹھی دی شکل وانگ اِسرائیِلؔ دیاں پُتراں دے ناں اوہناں دُوہاں پتھراں تے کُھرچوا کے اوہناں نُوں سونے دے خانیاں وِچ جَڑواویِں۔
12
.اَتے دُوہاں پتھراں نُوں افُود دیاں دُوہاں موڈھیاں تے لَواویِں تاں جو ایہہ پتھر اِسرائیِلؔ دیاں پُتراں دی یادگاری لئی ہون اَتے ہارُونؔ اوہناں دے ناں خُداوند دے ساہمنے اپنیاں دُوہاں موڈھیاں تے یادگاری لئی لائی رَکھے۔
13
. تُوں سونے دے خانے بناویِں۔
14
. اَتے پاسے دے سونے دئِیاں دو زنجِیراں ڈوری وانگ گُوجھیِاں ہویاں بناویِں اَتے ایہناں گُوجھیِاں ہویِاں زنجِیراں نُوں خانیاں وِچ جِڑ دیویِں۔
15
.نیاں دا ہِک بَنھ کِسے چَنڈے ہوئے کاریگر توں بنواویِں اَتے افُود وانگ سونے، اَسمانی، جامنی اَتے لال اُنّ دا اَتے باریِک سُوتی کپڑے دا بنواویِں۔
16
. اوہ چَوگُٹھا اَتے دوہرا ہووے۔ اوہدی لَمیائی اِک گِٹھ اَتے چوڑائی وی اِک ہی گِٹھ ہووے۔
17
.اَتے چار قطاراں وِچ اوہدے تے ہِیرے اَتے نَغ جَڑیِں۔ پہلی قِطار وِچ لال یاقُوت، پُکھراج اَتے گوہرِ شب چراغ ہووے۔
18
. دُوجی قطار وِچ زمُرّد، نیِلم اَتے ہِیرا۔
19
.تِجی قطار وِچ لشم اَتے یشم اَتے یاقُوت۔
20
. چوتھی قطار وِچ فیِروزہ اَتے سنگِ سُلیمانی اَتے زبرجد۔ایہہ سارے سونے دے خانیاں وِچ جَڑے جان۔
21
.ایہہ پتھر اِسرائیِلؔ دیاں پُتراں دے ناواں دے حِساب نال گنتی وِچ باراں ہون اَتے اَنگوٹھی وانگ ایہہ ناں جیہڑے باراں ٹبَراں دے ناں ہون گے اوہناں تے کُھرچ کے لکِھے جان گے۔
22
.اَتے تُوں سیِنہ بند تے ڈُوری وانگ گُجھیاں ہویاں پاسے دے سونے دیِاں دو زنجیراں لاویِں۔
23
. اَتے سینہ بند لئی سونے دے دو دائرے بنا کے اوہناں نُوں سینہ بند دیاں دُوہاں سِریاں تے لاویِں۔
24
. اَتے سونے دیِاں گُجھیاں ہویاں دُوہاں زِنجیراں نُوں اوہناں دُوہاں دائریاں وِچ جیہڑے سینہ بند دیاں دُوہاں سِریاں تے ہون گے، لا دیویِں۔
25
.اَتے دُوہاں گُجھیاں ہویاں زِنجیراں دے باقی دُوہاں سِریاں نُوں، دُوہاں پتھراں دے خانیاں وِچ جَڑ کے اوہناں نُوں افُود دیاں دُوہاں موڈھیاں تے سامنی لائمے لَا دیویِں۔
26
.اَتے سونے دے دو ہور دائرے بنا کے اوہناں نُوں ہِک بَنھ دے دُوہاں سِریاں دے اوس کنارے وِچ لاویِں جیہڑا اَفود دے اندرلَے پاسے وے۔
27
.فیر سونے دے دو ہور دائرے بنا کے اوہناں نُوں اَفُود دے دُوہاں موڈھیاں ہیٹھ اوہدے اَگلے حِصے وِچ لاویِں جِتھے اَفُود جوڑیا جاوے گا تاں جو اوہ افُود دے کاریگری نال اُنے ہوے پَٹکے دے اُتے رہیوے۔
28
.اَتے اوہ سینہ بند نُوں لَے کے اوہدیاں دائریاں نُوں اِک نِیلے تَسمے نال بنھ دین تاں جو ایہہ سینہ بند اَفُود دے کاریگری نال اُنے ہوے پَٹکے دے اُتے وی رہیوے اَتے اَفُود توں وَکھ وی نہ ہووے۔
29
.اَتے ہارُونؔ اِسرائیِلؔ دیاں پُتراں دے ناں نیاں دے سینہ بند تے اپنے سینے اُتے پاک تھاں وِچ وَڑن ویلے خُداوند دے حُضور لائی رَکھے تاں جو سَدا اوہناں دی یاد گیِری ہوندی رہیوے۔
30
. اَتے تُوں نیاں دے سینہ بند وِچ اُورِیم اَتے تُمیّم نُوں رَکھیِں اَتے جَد ہارُونؔ خُداوند دے حُضور جاوے تے ایہہ اوہدے دِل دے اُتے ہون۔ اینج ہارُونؔ بنی اِسرائیِلؔ دے نیاں نُوں اپنے دِل دے اُتے خُداوند دے ساہمنے سَدا لئی لائی رَکھے گا۔
31
.اَتے تُوں اَفُود دا جُبّہ اُکا اَسمانی رنگ دا بناویِں۔
32
.اَتے اوہدا گَلما وِچکار ہووے اَتے بکتر دے گَلمے وانگ اوہدے گَلمے دے آل دوالے اُنی ہوئی گوٹ ہووے تاں جواوہ پاٹ نہ جاوے۔
33
.اَتے اوہدے گھیرے دے چَواں پاسے اَسمانی، جامنی اَتے لال رنگ دے اَنار بناویِں اَتے اوہناں دے وِچکار چَواں پاسے سونے دیِاں گھنٹیِاں لاویِں۔
34
.مطلب کے جُبّے دے گھیرے وِچ سونے دی اِک گھنٹی ہووے اَتے اوہدے پچھوں اَنار۔ فیر، سونے دی اِک گھنٹی اَتے اوہدے پچھوں اَنار۔
35
.اِیہہ جُبہّ ہارُونؔ سیوا کرن ویلے پایا کرے تاں جو جدوں اوہ پاک تھاں وِچ خُداوند دے حُضور جاوے یاں اوتھوں نِکلے تے اوہدی واج سُنیِوے تاں جو اوہ مَرنہ جاوے۔
36
.اَتے تُوں پاسے دے سونے دی اِک پتّری بنوا کے اوہدے تے اَنگوٹھی دی شکل وانگ ایہہ کُھر چ کے لِکھیِں پئی، "خُداوند لئی پاک"۔
37
. اَتے اوہنوں نیِلے تسمے نال بنھیِں تاں جو اوہ پَگ دے سامنے آلے حصے تے ہووے۔
38
.ایہہ ہارُونؔ دے مَتھے تے رہیوے تاں جو، جو کُجھ بنی اِسرائیِلؔ اپنے پاک ہدئِیاں دے رائیِں پاک ٹھہران، اوہناں پاک کیِتیاں ہوئِیاں شیواں دا پاپ ہارُونؔ چُکے اَتے ایہہ پَگ اوہدے مَتھے تے سَدا رہیوے تاں جو اوہناں دے ہدئِیے خُداوند اَگے قُبولے جان۔
39
.کُرتہ بارِیک سُوتی کپڑے دا بنیا ہووے اَتے چار خانیاں دا ہووے اَتے پَگ وی بارِیک سُوتی کپڑے دی ای بناویِں اَتے اِک پٹکا بناویِں جِہدے تے پُھل بُوٹیاں دی کڈھائی کیِتی ہووے۔
40
.ہارُونؔ دے پُتراں لئی کُرتے بناویِں اَتے عزِت اَتے زِینت لئی اوہناں لئی پٹکے اَتے پَگاں بناویِں۔
41
.اَتے تُوں ایہہ سب کُجھ اپنے بَھرا ہارُونؔ اَتے اوہدے پُتراں نُوں پَواویِں اَتے اوہناں نُوں مَسح اَتے مخصُوص اَتے پاک کریِں تاں جو اوہ سارے میرے لئی کہانت دا کَم کرن۔
42
.تُوں اوہناں لئی سُوتی کپڑے دے پاجامے بنا دیویِں تاں جو اوہناں دا جُسا کَجیا رہیوے۔ ایہہ پاجامے لَک توں لے کے پَٹ تیِک ہون۔
43
.ہارُونؔ اَتے اوہدے پُتر جد جد اَکٹھ دے تںبُو وِچ وَڑن یاں سیوا کرن لئی پاک تھاں دے وِچ قُربانی دی تھاں دے نیڑے جان ، ایہناں پاجامیاں نُوں پان کرن تاں نہ ہووے پئی پاپی ٹھہرن اَتے مَر جان۔ ایہہ قانُون ہارُونؔ اَتے اوہدی پیڑھی لئی سَدا تیِک رہیوے۔