1
. خُداوند نے مُوسیٰؔ نُوں فرمایاپئی
2
."بنی اِسرائیِلؔ نُوں ایہہ آکھیِں پئی میرے لئی نذر لَاون اَتے تُسیں اوہناں کولوں ہی میری نذر لَیا جے جیہڑے اپنے دِل دی خُوشی نال دین۔
3
.اَتے جیہڑئِیاں شیواں دی نذر تُساں اوہناں کولوں لینی اے اوہ ایہہ نیں۔ سونا، چاندی اَتے پِتّل۔
4
.اَتے اَسمانی،جامنی تے لال رنگ دا کپڑا اَتے بارِیک کتان تے بکری دی پشم۔
5
. اَتے بھیڈُواں دیِاں رنگیِاں ہویاں لال کھَلاں تے بکری دیاں کَھلاں اَتے کِکَر دی لکڑ۔
6
.اَتے دیِوے لئی تیل اَتے مَسح کرن دے تیل لئی تے واشنا بخُور لئی مَصالِح۔
7
.اَتے سُلیمانی پتھر اَتے اَفود اَتے سِینہ بند تے جڑن لئی نَغ۔
8
.اوہ میرے لئی اِک گھر بنان تاں جو مَیں اوہناں دے وِچکار رہواں۔
9
. اَتے گھَر دا اَتے اوہدے سارے وَلیوے دا جیہڑا نمونہ مَیں تَینوں وکھاواں تُوں اوسے دے حِساب نال اوہنوں بناویِں۔
10
.اَتے اوہ کِکَر دی لکڑی دا اِک صندُوق بنان جہدی لمیائی ڈھائی ہتھ اَتے چوڑائی ڈیڑھ ہتھ اَتے اُچیائی ڈیڑھ ہتھ ہووے۔
11
.تُوں اوہدے اندر باہر پاسے دا سونا مڑھیِں اَتے اوہدے اُتے آل دوالے سونے دی کناری بناویِں۔
12
. اَتے اوہدے لئی سونے دے چار کڑے گھڑ کے، عہد دے صندُوق دے چواں پاوئیاں تے چڑھاویِں۔ دو کَڑے اِک پاسے اَتے دو دُجے پاسے ہون۔
13
. اَتے کِکر دی لکڑ دے دو ڈنڈے بنا کے اوہناں تے سونا مَڑھیِں۔
14
. اَتے اوہناں ڈنڈیاں نُوں صندُوق دے دُوںواں پاسیاں دے کَڑیاں وِچ پایا جے تاں جو اوہناں دے سہارے عہد دا صندُوق چُکیا جاوّے۔
15
. ڈنڈے صندُوق دے کَڑیاں وِچ پئے رہن اَتے اوہناں نُوں کڈھیا نہ جاوّے۔
16
. اَتے جیہڑا عہد نامہ مَیں تَینوں دیاں اوہنوں پکا صندُوق وِچ دھریِں۔
17
. اَتے تُوں کفارے دا سَر پوش پاسے دے سونے دا بنا ویِں جَہدی لمیائی ڈھائی ہتھ اَتے چوڑائی ڈیڈھ ہتھ ہووّے۔
18
.اَتے سَرپوش دیِاں دُوںواں نُکراں تے سونے دے دو فرشتے گَھڑ کے گھلاریں۔
19
.اِک فرشتہ اِک نُکر تے اَتے دُوجا فِرشتہ دُوجی نُکر تے بنائیِں اَتے تُسیں سرپوش نُوں تے دُوںواں نُکراں دے فِرشتیاں نُوں اِک ہی ٹوٹے نال بنایا جے۔
20
. اَتے اوہ فرشتے اُتاں نُوں اینج اپنے کھمب کِھلاری رکھن پئی سرپوش نُوں اپنے کھمباں ہیٹھ ڈھک لین اَتے اوہناں دے مُنہ سرپوش وَل آمو سامنے ہون۔
21
.اَتے تُوں اوس سرپوش نُوں اوس صندُوق اُتے لاویِں اَتے اوہ عہد نامہ جیہڑا مَیں تَینوں دیاں گا اوہنوں صندُوق وِچ دَھرئیِں۔
22
.عہد دے صندُوق دے کول مَیں تَینوں مِلاں کراں گا۔ اَتے اوس سرپوش دے اُتوں دی اَتے فرشتیّاں دے وِچکاروں دی جیہڑے عہد دے صندُوق دے اُتے ہون گے اوہناں ساریاں حُکماں بارے جیہڑے مَیں بنی اِسرائیِلؔ لئی تَینوں دیاں گا تیرے نال گل بات کیِتا کراں گا۔
23
.اَتے تُوں دو ہتھ لَمی اَتے اِک ہتھ چوڑی اَتے دیڑھ ہتھ اُچی کِکر دی لکڑ دا اِک میز بناویِں۔
24
.اَتے اوہنوں پاسے دے سونے نال مَڑھیِں اَتے اوہدے آل دوالے سونے دی کناری بناویِں۔
25
.اوہدے آل دوالے چار اُنگل چوڑی اِک کنگنی لاویِں اَتے اوس کنگنی دے آل دوالے سونے دی کناری بناویِں۔
26
.اَتے سونے دے چار کڑے بنا کے اوہناں نُوں چَوّاں نُکراں تے لاویِں جیہڑے چَوّاں پاوئیاں دے ساہمنے ہون۔
27
. اوہ کَڑے کنگنی دے کول ہی ہون تاں جو ڈنڈیاں لئی جِنہاں نال عہد دا صندُوق چُکیا جاوّے گُھریاں دا کَم دین۔
28
.اَتے کِکر دی لکڑ دے ڈنڈے بنا کے اوہناں تے سونا مَڑھیِں تاں جو میز اوہناں نال چُکیا جاوّے۔
29
. تُوں اوہدے ڈونگھے، چمچے، جھجراں اَتے ڈو لھن لئی وڈھے وڈھے کَولے سب پاسے دے سونے دے بناویِں۔
30
.اَتے تُوں اوس میز تے نذر دیِاں روٹِیاں میرے لئی سدا تیِک دھریا کریِں۔
31
.اَتے تُوں پاسے دے سونے دی اِک دیِوے دانی بناویِں۔ اوہ دیِوے دانی اَتے اوہدا تَھلا اَتے ڈنڈی سب کُجھ گَھڑ کے بناویِں۔ اَتے اوہدیِاں پیالیِاں اَتے لاٹُو اَتے اوہدے پُھل سب کُجھ اِکو ہی ٹوٹے دے بنائے جان۔
32
. اَتے اوہدے دُوںواں پاسیوں چھے شاخاں باہر نُوں نِکلدیِاں ہون۔ تِن شاخاں دیِوے دانی دے اِک پاسیوں نِکلن اَتے تِن دُوجے پاسیوں۔
33
.اِک شاخ تے بادام دے پُھل ورگیاں تِن پیالِیاں ہون اِک لاٹو اَتے اِک پُھل ہووّے اَتے دُوجی شاخ تے وی بادام دے پُھل ورگِیاں تِن پیالِیاں اِک لاٹو اَتے اِک پُھل ہووّے۔ اینج ہی دیِوے دانی دئِیاں چھیاں شاخاں اُتے ایہہ سب کُجھ لگا ہووّے۔
34
.اَتے دیِوے دانی وِچ آپ بادام دے پُھل ورگیاں چار پیالِیاں اپنے اپنے لاٹو اَتے پُھل سنہے ہون۔
35
.اَتے دُوںواں شاخاں دے ہیٹھ اِک لاٹو سارے اِک ہی ٹوٹے دے ہون اَتے فیر دو شاخاں دے ہیٹھ اِک لاٹُو سب اِک ہی ٹوٹے دے ہون اَتے فیر دو شاخاں دے ہیٹھ اِک لاٹُو سب اِک ہی ٹوٹے دے ہون۔ دیِوے دانی دیِاں باہر نکلیاں ہویاں چھیویں شاخیں اینج دئیِاں ہی ہون۔
36
. مطلب کے لاٹُو اَتے شاخاں اَتے دیِوے دانیاں سارے اِکو ہی ٹوٹے دے بنے ہون۔ ایہہ سب کُُجھ پاسے دے سونے دے اِک ہی ٹوٹے نال گَھڑ کے بنائے جان۔
37
.اَتے تُوں اوہدے لئی سَت دیِوے بناویِں۔ ایہوہی دیِوے بالے جان تاں جودیوِے دانی دے اَگے چانن ہووے۔
38
.اَتے اوہدے گُلگیِر اَتے گُلدان پاسے دے سونے دے ہون۔
39
.دیِوے دانِیاں اَتے ایہہ سارے پانڈے اِک قنطار پاسے دے سونے دے بنے ہون۔
40
.اَتے ویکھیِں ایہناں نُوں اوسے ہی نمونے تے بناویِں جیہڑا تَینوں پہاڑ تے وکھایا گیا سی۔