1
. "اوہ حُکم جیہڑے تُوں اوہناں نُوں دَسنے نیں ایہہ نیں۔
2
.جے تُوں عبرانیؔ غلام مُل لَویں اَتے اوہ چھے ورّھے سیوا کرے اَتے ستویں ورّھے مُل تارے بِنا آزاد ہو کے ٹُر جاوے۔
3
. جے اوہ اکلا آیا ہووّے اَتے اکلا ہی ٹُر جاوے اَتے جے اوہ وہیایا ہووّے اَتے اوہدی ووہٹی وی اوہدے نال جاوّے۔
4
.جے اوہدے مالک نے اوہدا وہیا کرایا ہووّے اَتے اوس زنانی توں پُتر اَتے دِھیّاں جمّے ہون اَتے اوہ زنانی اَتے اوہدے بال اوس مالک دے ہو کے رہن پَر اوہ آپ اکلا ہی ٹُر جاوّے۔
5
. پَر جے اوہ غُلام صاف صاف آکھ دیوے پئی "مَیں اپنے مالک، ووہٹی اَتے اپنے بالاں نال مُحبت کرنا واں اَتے مَیں آزاد ہوکے نئیں جاواں گا۔"
6
. تد اوہدا مالک اوہنوں رَبّ کول کَھڑے اَتے اوہنوں بُوہے تے یاں بُوہے دی چوگاٹھ تے لَیا کے سُووے نال اوہدا کَن وِنہے۔ تد اوہ سدا اوہدی سیوا کردا رہیوے۔
7
.اَتے جے کوئی بندا اپنی دھی گولِّھی ہون لئی ویچے اَتے مرد غُلاماں وانگ چھے ورھیاں پِچھوں اوہ آزاد نہ کیِتی جاوے۔
8
.جے اوہدا مالک جنہے اوہنوں رکھیا اے اوہدے توں راضی نہ ہووّے اوہ اوہنوں پکا اجازت دیوے پئی اوہ فیر وِک سکے پَر اوہنوں ایہہ حق اُکا نئیں پئی اوہ اوہنوں کِسے اوپری قوم وِچ ویچے کیوں جو مالک ہی اپنی گل تے گھلو نئیں سکیا۔
9
.اَتے جے اوہدا مالک اوہنوں اپنے پُتر نال وہیا دیوے اَتے فیر اوہ پکا اوہنوں اپنیِاں دِھیاں وانگ رکھے۔
10
. اَتے جے اوہ کوئی ہور زنانی وہیا لَوے تاویِں اوہ اوہدے کپڑے ٹاکی، روٹی پانی اَتے ووہٹی ہون دا حق نہ کھووے۔
11
.اَتے جے ایہہ تِنیں گلاں پُوریاں نہ ہون اَتے اوہ اپنا مُل تاریاں بِنا ٹُر جاوّے۔
12
.اَتے جے کوئی بندہ کِسے بندے نُوں اجیہا مارے پئی اوہ جانوں مَر جاوے اَتے مارن والا پَکا موت دی سزا مِلے۔
13
.پَر جے اوس بندے نے اوہنوں جان دیاں بُجھدیاں نہ ماریا ہووّےسگھوں رَبّوں اوہدے ہتھوں مَر جاوّے تد مَیں اوہنوں اِک پناں لئی تھاں دَساں گا جِتھے اوہ نَس جاوّے۔
14
.اَتے جے کوئی اپنے گوانڈی تے جان دیاں بُجھدیاں چڑھائی کرکے جانوں مار دیوے اَتے قاتل پاویں رَبّ دے مذہبے تے ہووّے اوہنوں اوتھوں وی ترُو کے موت دی سزا دِتّی جاوّے۔
15
. اَتے جیہڑا اپنے پیو یا ماں تے ہتھ چُکے اوہ پَکا جانوں ماریا جاوّے۔
16
.اَتے جے کوئی کِسے بندے نُوں اَغوا کر لَوّے بھاویں اَغواں کرن والے نے اوہنوں کول رکھّیا ہووّے یا اَگاں ویچ دِتّا ہووّے اوہدی سزا موت اے۔
17
. اَتے جے کوئی اپنے پیو یا اپنی ماں تے لعنت کرئےتے اوہ پَکا جانوں ماریا جاوّے۔
18
.جے دو بندے آپو وِچ جھگڑپین اَتے اِک بندہ دُجے نُوں وَٹا یا گھُسّن مار کے مَنجھی تے پا دیوے۔
19
. تدجے اوہنوں شفا ہوجاوّے اَتے اوہ سوٹی نال ٹُرن لَگ پَّوے تے مارن والا اوہدیِاں گھُسیاں دیہاڑیِاں اَتے اوہدے دوا دارُو دا خرچا چُکے۔ پَر اوس بندے تے قتل نہ پَوّے۔
20
. اَتے جے کوئی اپنے غلام یا گولِّھی نُوں ڈانگ نال اینج مارے پئی اوہ مَر جاوّے تد اوہ بندہ پَکا سزا پاوّے۔
21
.پَر جے غُلام اِک دو دیہاڑِیاں وِچ ٹھیک ہوجاوّے اَتے فیر مالک نُوں سزا نہ ہووّے کیوں جو غُلام اوہدا مال اے۔
22
.جے لوکی آپو وِچ جھگڑ پین اَتے کِسے حاملہ زنانی نُوں اجیہی سَٹ لگے پئی اوہدا حمل ڈگ پَوّے پَر ہور کوئی سَٹ نہ لگے تد اوس زنانی دے سائیِں دی مانگ اَتے نیِایاں دے مِتھن پاروں مجرم بھڑت بھرے۔
23
.اَتے جے سَٹ ڈاڈی لَگ جاوّے تے تُوں جان دا بدلہ جان،
24
. اَکھ دا بدلہ اَکھ، دَند دا بدلہ دَند، ہتھ دا بدلہ ہتھ، پیر دا بدلہ پیر،
25
. ساڑن دا بدلا ساڑنا، پھٹ دا بدلہ پھٹ یاں جھریِٹ دا بدلہ جھریِٹ ہووّے۔
26
.اَتے جے کوئی اپنے غُلام یا گولِّھی دی اَکھ اَتے اجیہا مارے پئی اوہدی اَکھ گَھس جاوّے اَتے اوہ اوہنوں اوہدی اَکھ دے گَھس جان دے بدلے آزاد کر دیوے۔
27
.جے کوئی اپنے غُلام یا گولِّھی نُوں اجیہا مارے پئی اوہدا پیِڑھ نِکل جاوّے اَتے اوہ اوہنوں اوہدا پیِڑھ نِکل جان دے بدلے آزاد کر دیوے۔
28
. جے کوئی ڈھگا کِسے زنانی یاں بندے نُوں اجیہا سینگ مارے پئی اوہ مَر جاوّے اوہنوں پکا سنگسار کیِتا جاوّے اَتے اوہدا گوشت وی نہ کھادا جاوّے۔ پَر اوس ڈھگے دا سائیِں بے دوسا ہووّے گا۔
29
.پَر جے اوس ڈھگے نُوں پہلاں ہی سینگ مارن دی ہِلترہووّے اَتے اوہدے سائیِں نُوں دَس وی دِتا گیا ہووّے پَر تاں وی اوہنے اوہنُوں بَنھ کے نہ رکھّیا ہووّے اَتے اوہنے کِسے زنانی یا بندے نُوں مار دِتّا ہووّے اَتے اوہنوں پکا سنسگسار کیِتا جاوّے اَتے اوہدے سائیِں نُوں وی موت دی سزا دِتّی جاوّے۔
30
.اَتے جے خُون بہا منگیا جاوّے اَتے اوہ اپنی جان بخشی دے بدلے اوہنی رقم ادا کرے جِنی مِتھی گئی ہووّے۔
31
.جے اوس ڈھگے نے کِسے بندے دے پُتر یا دِھی نُوں ماریا ہووّے اَتے اوس ڈھگے دے سائیِں نال وی ایس حُکم دے حِساب نال ورتا کیِتا جاوّے۔
32
. جے ڈھگا کِسے دے غُلام یا گولِّھی نُوں مار دیوے اَتے ڈھگے دا سائیِں تریِہ مِثقال اوس غُلام یا گولِّھی دے مالک نُوں دیوے اَتے ڈھگے نُوں وی سنگسار کیِتا جاوّے۔
33
.جے کوئی بندہ ٹویا کڈھے اَتے اوہدا مُنہ نہ کَجےاَتے کوئی ڈھگا یا کھوتا اوس ٹوئے وِچ جا ڈِگے۔
34
. تے ٹوئے دا مالِک ایہدی بھرت بھرےاَتے اوہناں دے سائیِاں نُوں مُل دیوے اَتے موئے ڈنگر آپ رکھّے۔
35
.اَتے جےکِسے دا ڈھگا کِسے ہور بندے دے ڈھگے نُوں اجیہی سَٹ لاوّے پئی اوہ مَر جاوّے تے اوہ جیوندے ڈھگے نُوں ویچن اَتے اوہدا مُل آپو وِچ ساںواں وَنڈّ لین اَتےموئے ڈھگے نُوں وی ساںواں وَنڈّ لین۔
36
.اَتے جے پتا لگ جاوّے پئی اوس ڈھگے نُوں پہلاں توں سینگ مارن دی ہِلتر سی اَتے اوہدے سائیِں نے اوہنوں بَنھ کے نئیں سی رکھّیا اَتے فیر اوہنوں پَکا ڈھگے دے بدلے ڈھگا دینا پَوّے گا اَتے مویا ڈنگر اوہدا ہووّے گا۔