1
. فیر بنی اِسرائیِلؔ دی ساری جماعت سِیؔن دے بیلے توں ٹُری اَتے خُداوند دے حُکم پاروں پنَد کردی کردی رفیدیمؔ وِچ آکے ڈیرا لایا۔ اوتھے اوہناں نُوں پیِن لئی پانی نہ لبھا۔
2
.اوتھے لوک مُوسیٰؔ نُوں اپنے حال دا دوش دے کے آکھن لگے "ساہنوں پانی دے"۔ مُوسیٰؔ نے اوہناں نُوں آکھیاپئی "تُسیں میرے نال کیوں جھگڑدے اَتے خُداوند نُوں آزماندے او؟"
3
. اوتھے لوکی بڑے ترہائے سَن سو اوہ مُوسیٰؔ نال بُڑ بُڑائے کے آکھن لگے پئی "تُوں ساہنوں ساڈے بالاں اَتے ساڈے ڈنگراں سنہے ترہایا مارن لئی مِصرؔ دے دیس وِچوں کیوں کڈھ لیایا ایں؟"
4
. تد مُوسؔیٰ نے خُداوند نُوں ترلا کر کے آکھیا پئی "مَیں ایہناں لوکاں دا کیِہ کراں؟ اوہ تے مَینوں سنگسار کرن نُوں پِھر دے نیں"۔
5
.خُداوند نے مُوسیٰؔ نُوں آکھیا پئی "لوکاں توں اَگاں لنگ کے ٹُراَتے بنی اِسرائیِلؔ دے وڈیریاں وِچوں کُجھ نُوں اپنے نال لے اَتے جیہڑی سوٹی تُوں دریا تے ماری سی اوہنوں اپنے ہتھ وِچ پھڑی لَے جا۔
6
. ویکھیں مَیں تیتھوں پیہلاں جا کے حُورِبؔ دی اِک چٹان تے کھلوتا رہیواں گا اَتے تُوں اوس چٹان تے ماریں اَتے اوہدے وِچوں پانی پُھٹ پوّے گا تاں جو ایہہ لوکی پیِن"۔ تد مُوسؔیٰ نے اِسرائیِلیؔ وڈیریاں دے ساہمنے اینج ہی کیِتا۔
7
.اَتے اوہنے اوس تھاں دا ناں مسّہؔ اَتے مریبہؔ دَھریا کیوں جو بنی اِسرائیِلؔ نے اوتھے جھگڑا کیِتا اَتے ایہہ آکھ کے خُداوند دا امتحان لیا پئی " خُداوند ساڈے وِچکار ہے کے نئیں؟"
8
. تد عمالیِقیؔ رفیدیمؔ وِچ آکے بنی اِسرائیِلؔ نال لڑن لگ پئے۔
9
.سو مُوسیٰؔ نے یشوعؔ نُوں آکھیا پئی "اپنے نال کُجھ بندے لَے جا اَتے عمالیِقیاںؔ نال لڑ اَتے مَیں کل خُداوند دی سوٹی اپنے ہتھ وِچ پھڑ کے پہاڑ دی ٹیِسی تے کھلوتا رہواں گا"۔
10
.سو یشوُعؔ مُوسیٰؔ دے حُکم پاروں عمالیقِیاںؔ نال لڑن لگ پئے اَتے مُوسیٰؔ، ہارُونؔ اَتے حورؔ پہاڑ دی ٹیِسی تے چڑھ گئے۔
11
. جد تیِک مُوسیٰؔ اپنے ہتھ اُتاں چُکی رکھدا سی اِسرائیلیؔ جِت دے سَن اَتے جد اوہ ہتھ لمکا دیندا سی اوہدوں عمالیِقیؔ جِت دے سَن۔
12
.جد مُوسیٰؔ دے ہتھ تھک گئے اَتے ہارُونؔ اَتے حُورؔ نیں اِک پتھر لیا کے مُوسیٰؔ دے ہیٹھ دھریا اَتے اوہ اوہدے تے بہہ گیا۔ اَتے ایسے دوران ہارُونؔ اَتے حُور اِک نے اِک پاسیوں اَتے دُجے نے دُجے پاسیوں اوہدے ہتھاں نُوں چُکی رکھیا۔اینج مُوسیٰؔ دے ہتھ سُورج ڈُبن تیِک مضبوطی نال کھلوتے رہے۔
13
. اینج یشوعؔ نے اپنی تلوار نال عمالیقِیاںؔ نُوں ہرا دِتّا۔
14
. تد خُداوند نے مُوسؔیٰ نُوں آکھیا پئی"ایہہ ساری گل دا چیتا رکھن لئی تُوں ایہنوں کِتاب وِچ لکھ لَے اَتے یشوعؔ نُوں سُنا دے پئی مَیں عمالیقِیاںؔ دا ناں تیِک جگ توں ملیا میٹ کر دیاں گا"۔
15
. تد مُوسیٰؔ نے قُربانی لئی اِک تھاں بنائی اَتے اوہدا ناں "یہوواہؔ نِسّی مطلب کے "خُداوند میرا جھنڈا اے" دھریا۔
16
. اوہنے آکھیا پئی "خُداوند نے سونہہ کھادی اے کیوں جو ہتھ خُداوند دے تخت وَل ودھے رہے ایس لئی خُداوند عمالیقِیاںؔ نال پیڑیو پیِڑی جنگ وِڈی رکھے گا"۔