1
.فیر اوہ ایلیمؔ توں ٹُرے اَتے بنی اِسرائیِلؔ دی ساری جماعت مِصرؔ دے دیس وِچوں نکلن پِچھوں دُوجے مہینے دی پندرھویِں تاریِخ نُوں سینؔ دے بیلے وِچ جیہڑا ایلیمؔ اَتے سِیناؔ دے وِچکار اے اپَڑی۔
2
. اَتے اوس بیلے وِچ بنی اِسرائیِلؔ دی ساری جماعت مُوسیٰؔ اَتے ہارُونؔ تے بُڑ بُڑان لگی۔
3
. اِسرائیِلیاںؔ نیں اوہناں نُوں آکھیا پئی "کاش اِسیِں خُداوند دے ہَتھوں مِصرؔ دے دیس وِچ اوہدوں ہی مَر جاندے جدوں اِسیِں گوشت دِیاں ہانڈِیاں کول بہہ کے روٹی کھاندے ساں کیوں جو تُسیِں تے ساہنوں ایس بیلے وِچ بُھوکا مارن لئی لَے آئے ہو"۔
4
. تد خُداوند نے مُوسؔیٰ نُوں آکھیا پئی " مَیں تُہاڈے لئی اَنبراں توں روٹِیاں وساواں گا۔ سو ایہہ لوکی نِکل کے اِک دیہاڑے جوگا جوڑ لین کرن گے تاں جو مَیں ایہناں نُوں پرکھّاں پئی ایہہ میری شریَعّت تے چلدے نیں یا نیئں۔
5
.اَتے چھیویں دیہاڑے اینج ہووّے کرے گا پئی جِنا اوہ ہر دیہاڑے جوڑدے نیں اوہدُوں دُونا جوڑن کرن گے۔اَتے جو کُجھ اوہ لَیان گے اوہو ہی پکان گے۔"
6
. تد مُوسؔیٰ تے ہاروؔن نیں کُل بنی اِسرائؔیِل نُوں آکھیا پئی "شامیِں تُہانُوں پتا لگ جائے گا پئی خُداوند اوہو اے جیہڑا تُہانُوں مِصرؔ دے دیس وِچوں کڈھ لَے آیاسی۔
7
. اَتے سویلے تُسیِں خُداوند دا جلال ویکھو گےکیوں جو تُسیِں جیہڑا خُداوند تے بُڑ بُڑان لگ پیندے او، اوہ سُن دا اے اَتے اَسیِں کون ہاں پئی تُسیِں ساڈے تے بُڑ بُڑاندے او؟"
8
. مُوسیٰؔ نےایہہ وی آکھیا پئی "شامیِں خُداوند تُہانُوں کھان لئی گوشت اَتے سویلے رَجویں روٹی دیوے گا کیوں جو جیہڑا تُسیِں خُداوند تے بُڑ بُڑاندے او، اوہ سُن دا اے اَتے ساڈی حقیِقت ہی کیِہ اے؟ تُہاڈا بُڑ بُڑانا ساڈے تے نیئں سگھوں خُداوند تے وے۔"
9
. مُوسیٰؔ نے ہارُونؔ نُوں آکھیا پئی "بنی اِسرائیِلؔ دی ساری جماعت نُوں آکھ پئی تُسیِں خُداوند دے نیڑے آوو کیوں جو اوہنے تُہاڈا بُڑبُڑانا سُن لیا اے۔"
10
. اَتے جدوں ہارُونؔ بنی اِسرائیِلؔ دی جماعت نُوں ایہہ گلاں دَسن رہیا سی تے اوہناں بیلے وَل نظر ماری اَتے اوہناں نُوں خُداوند دا جلال بدَل وِچ وکھالی دِتّا۔
11
. تد خُداوند نے مُوسیٰؔ نُوں آکھیا پئی
12
."مَیں بنی اِسرائیلؔ دا بُڑبُڑانا سُن لیا اے سو تُوں اوہناں نُوں آکھ دے پئی ’شامیِں تُسیِں گوشت کھاو گے اَتے سویلے تُسیِں روٹی نال رَجو گے۔ تد تُہانُوں پتا لگ جاوے گا پئی مَیں خُداوند ہاں۔"
13
. اَتے اینج ہویا پئی شامیِں اینیِاں بٹیراں آئیِاں پئی اوہناں دے تنبوواں دی تھاں نُوں ڈھک دِتّا اَتے سویلے تنبوواں دی تھاں دے آسے پاسے تریل پئی ہوئی سی۔
14
. اَتے جِہدوں اوو تریل جیہڑی پئی سی سُک گئی تے کیِہ ویکھیا پئی بیلے وِچ اِک نکی نکی گول گول شے اجیہی نِکی جِویں چندرے دے دانے ہوںدے نیں بھوئیں تے پئی ہوئی اے۔
15
. جدوں اسرائیِلؔ دے لوکاں اوہنوں ویکھیا تے آپو وِچ آکھن لگےپئی "ایہہ کیِہ اے؟" کیوں جو اوہ نئیں سَن جاندے پئی اوہ کیِہ سی۔ مُوسیٰؔ نے اوہناں نُوں آکھیا پئی "ایہہ اوہ روٹی اے جیہڑی خُداوند نے تُہانُوں کھان لئی دِتّی اے۔
16
.سو خُداوند دا حُکم اے پئی، "تُسیِں ایہنوں اپنی اپنی بُھک دے حِساب نال مطلب کے اپنے اپنے بندیاں دی گِنتی دے حِساب نال اِک بندے لئی اِک اومر اَکھٹا کریا جے اَتے ہر بندہ اوہنے ہی بندیاں لئی اکٹھا کرے جِنے اوہدے ڈیرے تے ہون۔"
17
. سو بنی اِسرائیِلؔ نے اینج ہی کیِتا۔ کسے بہتا اَتے کِسے تھوڑا اکٹھا کیِتا۔
18
. اَتے جدوں اوہنوں اوہناں اومرنال مِنیا تے جنہیں بہتا اکٹھا کیِتا سی اوہدا کُجھ نہ وَدھیا اَتے جنہیں تھوڑا اکھٹا سی اوہدا کُجھ نہ گھٹیا۔ اوہناں وِچوں ہر اِک نے اپنی بُھک دے حِساب نال اِکھٹا کیِتا سی۔
19
. تد مُوسیٰؔ نے اوہناں نُوں آکھیا پئی "کوئی بندہ اوہدے وِچوں سویل تیِک کُجھ وی باقی نہ چھڈے"۔
20
.تاویِں اوہناں مُوسیٰؔ دی گل نہ مَنی سگھوں کئی لوکاں نیں سویل تیِک اوہنوں رہن دِتّا سو اوہدے وِچ کیِڑے پئے گئے اَتے اوہ سَڑ گیا۔
21
. اوہ ہر سویل دی سویل اوہنوں اپنے بندیاں دی گِنتی دے حِساب نال اکٹھا کردے سَن اَتے دھپ ڈاڈی ہوندیاں ہی اوہ پَگھرجاندا سی۔
22
. اَتے چھیویں دیہاڑے اینج ہویاپئی جنہی روٹی اوہ روز جوڑدے سَن اوہدُوں دُونی جوڑی مطلب کے اِک بندے لئی دو اومر اَتے جماعت دے ساریاں سرداراں نیں مُوسیٰؔ نُوں آ کے ایہہ دَسیا۔
23
. اوہنے اوہناں نُوں آکھیا پئی "خُداوند دا حُکم ایہہ وے۔ ’کل اُچیچا آرام دا دیہاڑا مطلب کے خُداوند دا سبت اے۔ جو تُساں پَکانا اے پَکا لو اَتے جو اُبالنا جے اُبال لوّو اَتے جے کُجھ ودھ جاوے اوہنوں سویل تیِک سانبھ لوّو‘۔"
24
. سو اوہناں جِویں مُوسیٰؔ نے آکھیا سی اوہنوں سویل تیِک سانبھیِں رکھّیا اَتے اوہ نہ تے سڑیا اَتے نہ ہی اوہدے وِچ کیِڑے پئے۔
25
. اَتے مُوسیٰؔ نے آکھیا پئی "اَج اوسے نُوں کھاو کیوں جو اَج خُداوند دا سبت اے ایس لئی اوہ اَج تُہانُوں میدان وِچ نئیں لبھے گا۔
26
. چھے دیہاڑیاں تیِک تُسیِں اوہنوں اَکھٹا کریا جے پَر ستواں دیہاڑا سبَت اے ایس لئی اوس دیہاڑے تُہانُوں اوہ نئیں لبھنا۔"
27
.اَتے ستویں دیہاڑے اینج ہویا پئی اوہناں وِچوں کُجھ بندے مَن اَکٹھا کرن گئے پَر اوہناں نُوں کُجھ نہ لَبھا۔
28
. تد خُداوند نے مُوسیٰؔ نُوں آکھیا پئی "تُسیِں کدوں تیِک میری شیریِعّت اَتے میریاں حُکماں نُوں منن توں نہ کردے رہوو گے؟
29
. ویکھو کیوں جوخُداوند نے تُہانُوں سَبت دا دیہاڑا دِتّا گیا اے ایسے لئی اوہ تُہانُوں چھیویں دیہاڑے دو دیہاڑیاں جوگی روٹی دیندا اے۔سو تُسیِں اپنی اپنی تھاں تے رہوو اَتے ستویں دیہاڑے کوئی اپنی تھاں توں باہر نہ جاوّے۔"
30
. سو لوکاں نیں ستویں دیہاڑے آرام کیِتا۔
31
. اَتے بنی اِسرائؔیل نے اوس روٹی دا ناں "مَنّ" دَھریا۔ اَتے اوہ دھنیئے دے بیِہ وانگ چِٹا اَتے اوہدا سواد شہد دے بنے ہوئے پَوئے وانگ سی۔
32
. اَتے مُوسؔیٰ نے آکھیا پئی "خُداوند نے ایہہ حُکم کیِتا اےپئی ’ایہدا اِک اومر بَھر کے اپنی پیڑِیاں لئی سانبھ لو تاں جو اوہ ایس روٹی نُوں ویکھ لین جیہڑی مَیں تُہانُوں بیلے وِچ کھوائی جِہدوں مَیں تُہانُوں مِصرؔوں کڈھ کے لَے آیا۔"
33
. مُوسیٰؔ نے ہارُونؔ نُوں آکھیا پئی "اِک مرتبان لَے اَتے اِک اومر مَنّ اوہدے وِچ پا کے اوہنوں خُداوند اَگے دھر دے تاں جو اوہ تُہاڈِیاں پیِڑیاں لئی پیا رہیوّے۔"
34
. اَتے جِویں خُداوند نے مُوسؔیٰ نُوں حُکم دِتا سی اوہدے حِساب نال ہارُونؔ نے اوہنوں گواہی دے صندُوق دے اَگے دَھر دِتّا تاں جو اوہ پیا رہیوّے۔
35
. اَتے بنی اِسرائیِلؔ جد تیِک وسدے دیس وِچ نہ اَپڑ ے مطلب کے چالی ورھیاں تیِک، مَنّ کھاندے رہے۔ اوہ کنعانؔ دیِاں حدّاں تے اَپڑن تیِک مَنّ کھاندے رہے۔
36
. اِک اومر ایفےدا دَسواں حِصہ ہُوندا اے۔