1
. تد خُداوند نے مُوسیٰؔ نوں آکھیا پئی
2
. "بنی اسرائیِلؔ نُوں حُکم کرپئی اوہ پرَت کے مجدالؔ اَتے سمندر دے وِچکار فی ہخیروتؔ دے سامنےبعلؔ صفونؔ دے اَگے ڈیرے لان۔ اَتے تُسیں اوسے دے اَگے سمندر دے کنڈھے کنڈھےڈیرے لایا جے۔
3
. فِرعونؔ بنی اسرائیِلؔ بارے آکھے گا پئی ’اوہ تے دھرتی تےکھجل ہو ہو کے بیلے وِچ پھس گئے نیں‘۔
4
. اَتے مَیں فِرعوؔن دے دِل نُوں ڈاڈا کراں گا اَتے اوہ اوہناں دا پِچھا کرے گا۔مَیں فرعوؔن اَتے اوہدیِاں فوجاں پاروں اُچا ہوواں گا۔اَتے مِصریؔ جان لین گے پئی مَیں خُداوند ہاں"۔سو اِسرائیِلیاںؔ نیں اپنے تَنبو کڈھ لَئے جِویں اوہناں نُوں پَکی کیِتی گئی سی۔
5
. جد مِصرؔ دے بادشاہ نُوں دس پئی، پئی اِسرائیِلیؔ نَس وگے نیں اَتے فِرعونؔ اَتے اوہدے نوکراں دا دِل اوہناں وَلوں پِھر گیا اَتے اوہناں آکھیا پئی "ساتھوں ایہہ ہو کیِہ گیا اے؟ پئی اپنے اِسرائیِلیؔ سیوّکاں نُوں ہتھوں کڈھ بیٹھے ہاں؟"
6
. تد فرِعونؔ نے اپنا رَتھ تیار کرایا اَتے اپنیِاں فوجاں نال لیّاں۔
7
.اوہنے اپنے چھے سو چُنے رَتھ اَتے مِصرؔ دے باقی سارے رَتھ لَئے اَتے اوہناں تے سردار بہائے۔
8
. اَتے خُداوند نے مِصرؔ دے بادشاہ دا دِل ڈاڈا کر دِتّا اَتے اوہنے بنی اِسرائیِلؔ دا پِچھا کیِتا۔کیوں جو اِسرائیِلیؔ بڑے مان نال مِصروں نِکلے سَن۔
9
. اَتے مِصریؔ فوج نے گھوڑیاں، رتھاں اَتے سواراں سنہے اوہناں دا پِچھا کیِتا اَتے اوہناں نُوں جدوں اوہ سمندر کنڈھے فی ہخیروتؔ کول تَنبُو گڈھ رہیئے سَن جا گَپھیا۔
10
. اَتے جد فِرعونؔ نیڑے اَپڑیا تد بنی اِسرائیِلؔ نے اَکھاں چُک کے ویکھیا پئی مِصریؔ اوہناں دا پِچھا کیِتی اوندے نیں اَتے اوہ بوہت ڈر گئے۔ تد اِسرائیِلیاںؔ نیں خُداوند اَگے ترلا کیِتا۔
11
.اَتے مُوسیٰؔ نُوں آکھن لگے پئی "کیِہ مِصرؔ وِچ مَڑہیاں (قَبراں) دا گھاٹا سی پئی تُوں ساہنوں مَرن لئی بیلے وِچ لَے آیا ایں؟ تُوں ساڈے نال ایہہ کیِہ کیِتا ایہہ پئی ساہنوں مِصروںؔ کڈھ لَے آیا ایں؟
12
. کیِہ اَسیِں تَینوں ایہہ گل مِصؔر وِچ ہی نئیں ساں آکھدےپئی ساہنوں ایتھے ہی رہن دے پئی اَسیِں مِصرِیاں دی سیوا کر دے رہیئے؟ کیوں جو بیلے وِچ مَرن توں مِصریاںؔ دی سیوا کرنا ساڈے لئی چنگا ہوندا۔"
13
. تد موسیٰ نے لوکاں نُوں آکھیا پئی " ڈرو نہ۔بس گھلو کے خُداوند دی نِجات دا کَم ویکھو جیہڑا اَج اوہ تُہاڈے لئی کرے گا۔کیوں جو جیہڑے مِصریاںؔ نُوں تُسیِں اَج ویکھدے اوہ ،اوہناں نُوں فیر اوڑک تیِک نہ ویکھو گے۔
14
. خُداوند تُہاڈے وَلوں لَڑے گا اَتے تُسیِں چُپ چپیِتے گھلو کے ویکھو گے۔"
15
. تد خُداوند نے مُوسؔیٰ نُوں آکھیا پئی "تُوں مَیتھوں فریاد کیوں کریِں جانا ایں؟ بنی اِسرائیِلؔ نُوں آکھ پئی اَگاں ودھن۔
16
. اَتے تُوں اپنی سوٹی پھڑ کے اپنا ہَتھ سمندر وَل ودھا اَتے اوہنوں دو حصِّے کر دے تاں جو اِسرائیِلیؔ سمندر وِچوں سُکی تھاں تے ٹُر دے ٹُر دے پار لہنگ جان۔
17
. اَتے ویکھ پئی مَیں مِصریاںؔ دے دِل ڈاڈے کر دیاں گا اَتے اوہ اوہناں دا پِچھا کرن گے اَتے مَیں فِرعونؔ، اوہدیِاں فوجاں، اوہدیاں رتھاں اَتے سواراں دے سببوں اُچا ہوواں گا۔
18
. اَتے جد مَیں فِرعونؔ، اوہدیاں رتھاں اَتے سواراں تُوں اُچا ہو جاواں گا تد مِصریؔ جان لین گےپئی مَیں خُداوند ہاں ۔"
19
. اَتے رَبّ دا فِرشتہ جیہڑا اِسرائیِلیاںؔ دے اَگے ٹُر دا ہوندا سی اوہناں دے پِچھے جا گھلوتا اَتے بدَل دا تھم اوہناں دے اَگوں ہٹ کے پِچھاں جا گھلوتا۔
20
. اینج اوہ مِصریؔ فوجاں اَتے اِسرائیلیؔ لشکر دے وِچکار آ گھلوتا۔ اَتے اوہ بدَل راتیِں مِصرِیاںؔ لئی تے ہنیرا پَر اِسرائیِلیاںؔ لئی چانن کردا رہیا۔سو اوہ ساری رات اِک دُجے دے نیڑے نہ آئے۔
21
.تد مُوسیٰؔ نے اپنا ہَتھ سمندر وَل ودھایا اَتے خُداوند نے ساری رات چڑھدی لاموں ہنیری وَگا کےسمندر نُوں پِچھاں ہٹا کے اوہنوں سُکی تھاں بنا دِتّا اَتے پانی دو حِصے ہوگیا ۔
22
. اِسرائیِلؔی سمندر وِچوں سُکی تھاں تے ٹُر دے ٹُر دے پار لہنگ گئے اَتے اوہناں دے سّجے کھبے پانی کندھاں وانگ گھلو گیا۔
23
. اَتے مِصریاںؔ نیں اوہناں دا پِچھا کیِتا اَتے فِرعونؔ دے سارے گھوڑیاں، رتھاں اَتے سواراں نیں سمندر وِچ اوہناں دا پِچھا کیِتا۔
24
. اَتے رات دے پچھلے پہر خُداوند نے بدَل اَتے اَگ دے تھم وِچوں ہو کے مِصریؔ فوج تے نظر ماری اَتے اوہناں دیِاں فوجاں وِچ گھلبلی مچا دِتّی۔
25
. اَتے اوہنے اوہناں دے رتھاں دے پِنجھ کڈھ دِتّے سو رَتھواناں لئی اوہناں نُوں ٹورنا اوکھا ہو گیا۔ تد مِصریاںؔ نیں آکھیا پئی "چلو اِسرائیِلیاںؔ دے اَگوں نَس وَگیئے کیوں جو اوہناں وَلوں ساڈھے نال خُداوند پیا لڑدا اے۔"
26
. خُداوند نے مُوسیٰؔ نُوں آکھیاپئی "اپنا ہتھ سمندر وَل ودھا تاں جو پانی مِصریاںؔ، اوہناں دیاں رتھاں اَتے سواراں اَتے فیر وَگن لگ پَووے۔
27
. سو مُوسیٰؔ نے اپنا ہتھ سمندر وَل ودھایا اَتے سویل ہون تیِک سمندر فیر اپنی اَصل حالت وِچ آگیا۔اَتے مِصریؔ پِچھاں نَسن لگے پَر خُداوند نے مِصریاں نُوں سمندر دے وِچکار ہِک لیاندا۔
28
. پانی پَرت کے آیا اَتے اوہنے رتھاں، سواراں اَتے فِرعونؔ دِیاں ساریِاں فوجاں نُوں جیہڑیاں اِسرائیِلیاں دا پِچھا کردیاں کردیاں سمندر وِچ جا وَڑیِاں سَن ڈوب دِتّا اَتے اوہناں وِچوں اِک وی جیوندا نہ رہیا۔
29
. پَر بنی اِسرائیِلؔ سُکے تھاں تے ٹُر دے ٹُردے سمندر وِچوں نِکل گئے پَر پانی اوہناں دے سجّےکھبّے کندھاں وانگ گھلوتا رہیا۔
30
. سو خُداوند نے اِسرائیِلیاںؔ نُوں اوس دیہاڑے مِصریاں دے ہتھوں اینج بچایا اَتے اِسرائیِلیاںؔ نے سمندر کنڈھے مِصر یِاںؔ دِیاں لاشاں ویکھِیاں۔
31
. جد اِسرائیِلیاںؔ نیں خُداوند دی اوہ قُدرت ویکھی جیہڑی اوہنے مِصریاں دے خلاف ورتی سی تداوہناں رَبّ دی وڈّیائی کیِتی۔سو اوہناں خُداوند تے بھروسہ کیِتااَتے اوہ خُداوند اَتے اوہدے بندے مُوسیٰؔ نُوں مَنن لگ پئے۔