1
. فیر خُداوند نے مِصرؔ دے دیس وِچ مُوسیٰؔ اَتے ہارُونؔ نُوں آکھیا پئی
2
. "ایہہ مہینہ تُہاڈے لئی مہیِنیاں دا شُروع اَتے ورھے دا پہلا مہینہ ہووے گا۔
3
. سو اِسرائیِلؔ دی ساری جماعت نُوں آکھ دیو پئی ’اَیسے مہینے دے دَسویں دیہاڑے ہر بندہ اپنے پئو دے ٹَبر دے حِساب نال گھر پِچھے اِک لیلا لوّے۔
4
. اَتے جے کِسے ٹبَر دے جی لیلا کھان لئی گھٹ ہون اَتے اوہ تے اوہدا گوانڈی جِنہاں دے گھراں دِیاں کندھاں سانجِیاں نیں دُوںویں رَل مِل بندیاں دی گِنتی دے حِساب نال لیلا لَین۔ اَتے لیلا ایڈا ہووے پئی سارے بندے رَج کے کھان۔
5
. تُہاڈا لیلا بے عَیب نر اَتے اِک ورھے دا ہووے اَتے ایہہ جا بھیڈاں یاں بکرِیاں وِچوں چُن کے کڈھیا جے۔
6
. اَتے تُسیں اوہنوں ایس مہینے دی چودھویں تاریخ تِیک رکھ چھڈیا جے اَتے اِسرائیِلیاںؔ دے قبیلیاں دی ساری جماعت اوہنوں شامیِں کہووے۔
7
. اَتے تھوڑی جئی رَت لَے کے جِنہاں گھراں وِچ اوہ اوہنوں کھان اوہناں دے بُوہیاں دے دُوںواں تاکاں اَتے اُتلی چوگاٹھ تے لا دین ۔
8
. اَتے اوہ اوہدا ماس اوسے رات اَگ تے بُھن کے بے خمیِری روٹی اَتے کئوڑے ساگ پتّر نال کھا لین۔
9
. اوہنوں کَچا یاں پانی وِچ اُبال کے بالِکُل نہ کھایا جے سگھوں اوہنوں سری پاویاں اَتے اندرلَے اَنگاں سَنہے اَگ تے بُھن کے کھایا جے۔
10
.اَتے اوہدے وِچوں سویل تیِک کُجھ نہ ودھایا جے اَتے جے سویل تیِک اوہدے وِچوں کُجھ وَدھ جاوے اَتے اوہنوں ساڑھ دیا جے۔
11
. اَتے جہدوں تُسیں کھاو اَتے اینج کھایا جے پئی لَک بَھجا ہووے، جُتی پیریِں ہووے اَتے سوٹی پھڑی ہووے۔ تُسیں اوہنوں چھیتی چھیتی کھایا جے کیوں جو ایہہ فَسح خُداوند دی اے۔
12
. خُداوند فرماندا اے؛ پئی مَیں اوسے رات مِصرؔ دے دیس وِچوں ہو کے لنگھاں گا اَتے اِنسان تے حِیوان دےپلیٹھی دے کُل بالاں نُوں جیہڑے مِصرؔ دے دیس وِچ نیں ماراں گا اَتے مِصرؔ دے سارے دیوتیاں نُوں وی سزا دیاں گا۔ مَیں خُداوند ہاں ۔
13
. اَتے جِنہاں گھراں وِچ تُسیں ہوو ایہہ رَت تُہاڈے وَلوں نشان ہووے گی اَتے مَیں اوہ رَت ویکھ کے تُہانوں ولاندا جاواں گا اَتے جَد مَیں مِصرِیاںؔ نُوں ماراں گا اَتے وَبّا تُہاڈے نیڑے پھٹکے گی وی نئیں پئی تُہانوں ہلاک کرسکے۔
14
. اَتے اوہ دیہاڑا تُہاڈے لئی اِک چیتے رکھن والا دیہاڑا ہووے گا اَتے تُسیں اوہنوں خُداوند دی عید دا دیہاڑا کرکے مَنایا جے۔ تُسیں اوہنوں سَدا دی رسم کرکے اوس دیہاڑے نُوں پیِڑہیو پیِڑی عیِد دا دیہاڑا منایا جے۔
15
. سَت دیہاڑیاں تِیک تُسیں بے خَمیِری روٹی کھایا جےاَتے پہلے دیہاڑے توں ہی خمِیر اپنے اپنے گھروں گڈھ دیا جے۔ ایس لئی پئی جیہڑا پہیلے دیہاڑے توں ستویں دیہاڑے تیِک خمیِری روٹی کھاوے اوہ بندہ اِسرائیلؔ دی جماعت وِچوں کڈھ دِتّا جاوے۔
16
. اَتے پہیلے دِیہاڑے میرے لئی اِک پاک اَکٹھ ہووےاَ تے اینج دا ہی اِک ہور پاک اکٹھ ستویں دیہاڑے وی ہووے۔ ایہناں دُوںواں دیہاڑیاں وِچ کھان پکان دے سوا کوئی ہور کَم نہ ہووے۔ اَتے بس ایہوہی کم کیِتا جاوے۔
17
. اَتے تُسیں بے خمیِری روٹی دی ایہہ عیِد منایا جے کیوں جو میَں اوسے دیہاڑے بنی اِسرائیلؔ قوم دے جتھیاں نُوں مِصرؔ دے دیس وِچوں کڈھ لیاواں گا۔ ایس لئی تُسیں اوس دیہاڑے نُوں سدا دی رَسم کر کے پیِڑیو پیِڑی مَنایا جے۔
18
.پہیلے مہینے دی چودا تاریِخ دی شام توں اِکویِں تاریخ دی شام تیِک تُسیں بے خمیِری روٹی کھایا جے۔
19
. سَت دیہاڑیاں تیِک تُہاڈے گھراں وِچ رَتی خمیِر نہ ہووے کیوں جو جیہڑا کوئی کِسے خمیِری شے نُوں کھاوے اوہ بھاویں راہی ہووے اَتے بھاویں اوہ اوسے دیس دا جم ہووے، اِسرائیلؔ دی جماعت وِچوں کڈھ دِتّا جاوے گا۔
20
. تُسیں کوئی خمیِری شے نہ کھایا جے۔ جِتھے کِتے تُسیں وَسو تُسیں بے خمیِری روٹی ہی کھایا جے‘۔"
21
. تد مُوسیٰؔ نے اِسرائِیلؔ دیاں ساریاں وڈیریاں نُوں سد کے ایہہ آکھیا پئی " جاو اَتےاپنے اپنے ٹَبر دے حِساب نال اِک اِک لیلا چُنو اَتے ایہہ لیلا فَسح دے ناں دا کوہیا جے۔"
22
.اَتے تُسیں زُوفے دا اِک گُچھا لَے کے اوہنوں اوس رَت وِچ بھیںویاں جے جیہڑی بھانڈے وِچ ہووے گی۔اوسے بھانڈے دی رَت وِچوں کُجھ اُتلی چوگاٹھ تے اَتے بوُہےدِیاں دُوںواں تاکاں تے لادیا جے۔ اَتے تُہاڈے وِچوں سویل تیِک کوئی وی بُوہیّوں باہر نہ جاوے۔
23
. کیوں جو خُداوند مِصریاںؔ نُوں ماردا ہویا لنگھے گا اَتے جد خُداوند اُتلی چوگاٹھ اَتے بُوہے دِیاں دونواں تاکاں تے رَت ویکھے گااَتے اوہ اوس بُوہے نُوں وَلا جاوےگا اَتے ہلاک کرن والے نُوں اوہ اندر نہ آن دیوے گا۔
24
.اَتے تُسیں ایس گَل نُوں اپنے اَتے اپنیِاں پیڑیِاں وِچ سَدا دی رسم کرکے مَنّیا جے۔
25
. اَتے جد تُسیں اوس دیس وِچ جیہڑا خُداوند تُہانوں اپنے وعدے پاروں دیوے گا اَپڑ جاو تد پَکا ایہو ہی عِبادت کردے رہیا جے۔
26
.اَتے جَد تُہاڈی اولاد تُہانوں پُوچھے پئی ’ایہہ "عِبادت" کرن دی وجہ کیِہ اے؟‘
27
. اَتے تُسیں آکھّیا جے پئی ’ایہہ خُداوند دی فَسح دا چڑھاوا اے جیہڑا مِصریِاںؔ نُوں ماردیاں ہویاں بنی اِسرائیِلؔ دے گھراں نوں وَلا گیا سی اَتے اینج ساڈے گھراں نوں بچا لیا‘۔" تد لوکاں نیں سر نیواں کے سجدہ کیِتا۔
28
. اَتے بنی اِسرائیلؔ نے جا کے اونج ہی کیِتا جِویں خُداوند نے مُوسیٰؔ اَتے ہارُون راہیں فرمایا سی۔
29
. اَتے اَدھی راتیِں خُداوند نے مِصرؔ دے دیس دے سارے پلیٹھی دے بالاں نُوں فِرعونؔ جیہڑا اپنے تخت تے بیٹھا سی اوہدے پلیٹھی دے بال توں لے کے اوس قیدی دے پلیٹھی دے بال تیِک جیہڑا قید وِچ سی سگھوں ڈنگراں دِیاں پلیٹھی دے جاواں نُوں وی مار مُکایا۔
30
. اَتے فرِعونؔ اَتے اوہدے سارے نوکر اَتے سارے مِصریؔ راتیِں ہی اُٹھ گھلوتے اَتے مِصرؔ وِچ بڑے وین پین لگ پئے کیوں جو اِک گھر وی اجیہا نئیں سی جِہدے وِچ کوئی مویا نہ ہووے۔
31
. تد فِرعونؔ نے راتورات مُوسیٰؔ اَتے ہارُون نُوں سَد کے آکھیا پئی "تُسیں بنی اِسرائیِلؔ نُوں لے کے میری قَوم دیاں لوکاں وِچوں نِکل جاو اَتے جِویں آکھّدے او جا کے خُداوند دی عِبادت کرو۔
32
. اَتے اپنے آکھن پاروں اپنیِاں بھیڈاں بکریاں اَتے گاواں ڈھگے وی نال لیندے جاو اَتے میرے لئی وی دُعا کریا جے۔"
33
. اَتے مِصریِاںؔ اوہناں نُوں اپنے دیسوں کڈھن لئی کالھ کیِتی تاں جو اوہناں نُوں مِصرؔ دے دیس وِچوں چھیتی چھیتی کڈھن کیوں جو اوہناں ایہہ آکھیا پئی" کِدھرے اَسیں سارے ہی نہ مَر جائے۔"
34
. سو ایہناں نیں اپنے گُجھے گُھجائے آٹے خمیِرا کیِتیاں بِنا پراتاں سَنہے کپڑیاں وِچ بَنھ کے موڈھیاں تے دَھر لیا۔
35
. اَتے بنی اِسرائیِل نے مُوسؔیٰ دے آکھن پاروں اے وی کیِتا پئی مِصریاںؔ توں سونے چاندی دِیاں ٹُونباں اَتے کپڑے منگ لئے۔
36
. اَتے خُداوند نے اوہناں لوکاں نُوں مِصریاںؔ دی نظر وِچ اجیہی عزّت دِتّی پئی جو کُجھ اوہناں منگیا اوہناں نے دے دِتّا سواینج اوہناں مِصریاںؔ نُوں لُٹ لیا۔
37
. اَتے بنی اِسرائیِلؔ نے رعمسیسؔ توں سکَاتؔ تیِک ٹُردیاں پَند کیِتا اَتے بال بچہ کڈھ کے اوہ کوئی چھے لکھ بندہ سی۔
38
. اَتے اوہناں نال اِک رَلیا مَلیا ٹولا وی گیااَتے بھیڈاں بکریاں اَتے گاواں ڈھگےاَتے چوکھے ڈنگر اوہناں دے نال سَن۔
39
. اَتے اوہناں نیں اوس گُجھے ہوئے آٹے دیِیاں جیہڑا مِصروںؔ لَیائے سَن بے خمیِریاں روٹیاں پکائِیاں کیوں جو اوہ اوہنوں خمیِرا کر نہ سکے ایس لئی پئی اوہناں نُوں مِصروںؔ دھکے نال اینج کڈھ دِتّا گیا پئی اوہ اوتھےگھلو نہ سکے اَتے کُجھ کھا پکا نہ سکے۔
40
. اَتے بنی اِسرائیِلؔ مِصرؔ دے دیس وِچ چار سو تریِہ ورھے رہے۔
41
. اَتےجِہدن بنی اِسرائیِلؔ نُوں اوتھے وسَدیاں چار سو تریِہ ورھے ہو گئے اَتے اوسے دیہاڑے خُداوند دا سارا لشَکر مِصرؔ دے دیس وِچوں نِکل گیا۔
42
. ایہہ رات اوہناں لئی جاگن دی رات سی کیوں جو خُداوند اوہناں نُوں مصرؔ دے دیس وِچوں ایسےرات کڈھ لَے آیا سی۔ ایہہ خُداوند دی اوہ رات اے جِنہوں اَسرائیِلیاںؔ لئی پیِڑئیو پیِڑی مَننا ڈاڈا ضروری اے۔
43
. خُداوند نے مُوسیٰؔ اَتے ہارُورنؔ نُوں آکھیاپئی "فسَح دی رسم اینج اے پئی کوئی اوپرا اوہنوں کھا نہ سکے۔
44
. پَر جے کوئی کِسے دا مُل دا غُلام ہووے اَتے جے تُوں اوہدا ختنہ وی کر دِتّا ہووے ،اوہ اوہنوں کھا سکے گا۔
45
. پَر اوپرا اَتے کاماں اوہنوں نہ کھاوے۔
46
. اَتے اوہنوں اِکو ہی گھر وِچ کھادا جاوے مطلب کے تُوں اوہدا جِری کُو گوشت گھروں باہر نہ کھڑیِں اَتے نہ تُسیں اوہدی کوئی ہڈی بَنھیا جے۔
47
. اِسرائیلؔ دی ساری جماعت ایہہ عِید مَناوے۔
48
.اَتے جے کوئی اوپرا تیرے نال رہندا ہووے اَتے اوہنوں خُداوند دی فسَح منان دا وی چاہ ہووے اَتے اوہدے گھر دے سارے بندے ختنہ کران۔ تد اوہ آ کے فسَح کرے۔ اینج اوہ اجیہا منیا جاوے گا جِویں اوہ اوسے دیس دا جَم ایں ۔پَر جِہدا ختنہ نئیں ہویا اوہ اوہنوں کدی نہ کھاوے۔
49
.دیسی اَتے پردیسی دُوںواں لئی اِکو ہی شریعت ہووے گی ۔
50
. سو سارے بنی اِسرائیِلیاںؔ نیں اوہو ہی کیِتا جیہڑا خُداوند نے مُوسیٰؔ اَتے ہارُون دی رائیِں آکھیا سی۔
51
. اَتے ٹھیِک اوسے دیہاڑے خُداوند بنی اسرائیلؔ دے ساریاں جتھیاں نُوں مِصرؔ دے دیس وِچوں کڈھ لَے آیا۔