¹ ۱۔ جدوں مردکی نوں اِیناں ساریاں گلاں دا پتا چلیا تے اونے آودے لیرے پاڑ دِتے ، آودے اوتے بوری لےلئی تے آودے سر وچ سوا ہ پا لئی تے اپنے سینے نوں پیٹدا ہویا شہر دے چوک وِچ جا پُہنچیا۔ ² ۲۔ پر او شاہی محل دے بوے دے وِچ رک گیا کیوں جے کسے نوں وی بوری پا کے محل دے اندرجان دی اجازت نیں سی۔ ³ ۳۔ ہرصوبے وچ جیتھے جیتھے بادشاہ دا حکم پُہنچیا یہودیاں وچ رونا پٹنا تے سوگ شروع ہوگیا ۔اوناں نے کھانا پینا چھڈ دِتا تے رون پٹن شروع ہو گئے ۔ بیتھرے لوکاں نے بوریاں پالیاں تے آودے سِراں وِچ سوا پا لئی ۔ ⁴ ۴۔ جدوں آستر دیاں لونڈیاں تے خواجہ سرا ایہہ خبر لے کے آستر دے کول ا ئیاں تے او بوہت پریشان ہوئی ۔ اونے کُجھ لیڑے لیئے تے اوناں نوں مردکی دے کول پیج کے منت کیتی کہ او اوناں نوں پا لوے پر مردکی نے اوناں نوں لین توں منع کر دِتا۔ ⁵ ۵۔ تد آستر نے بادشاہ دے خواجہ سراواں وچوں اِک خواجہ سرا ہتاک نوں جیہڑا ملکہ دی خدمت کرن لئی مقرر کیتا گیا سی اونوں صدیا تے حکم دِتا کے او جاوے تے پتہ کرے کے مردکی اوتے کی مصیبت آپئی اے تے اوھدی وجہ کی اے؟ ⁶ ۶۔ فیر ہتاک باہر نکلیا تے شہر دے چوک وِچ گیا جہڑا قصِر شاہی دے بُوہے دے اِگے سی ۔ ⁷ ۷۔ مردکی نے اونوں پوری کہانی سنائی تے اوس رقم دے بارے وی دِسیا جہدا شاہی خزانے وِچ جمع کران دا ہامان نے وعدہ کیتا سی تاں جے اونوں یہودیاں نوں مارن اوتے خرچ کیتا جاوے۔ ⁸ ۸۔ مردکی نے ہتاک نوں اوس حکم دی اِک نقل وی دِتی جہڑی یہودیاں نوں مارن لئی سُوسن وِچ اشتہار دے طور تے لایا گیا سی تاں جے او آستر نوں وکھا سکے تے اوھدے اِگے منت کرے کہ او چھیتی نال بادشاہ سلامت دے کول جاوے تے آودی قوم دے لوکاں لئی رحم دی منت کرے۔ ⁹ ۹۔ ہتاک نے واپس جا کے ملکہ آستر نوں سب کُجھ جہڑا مردکی نے آکھیا سی دِس دِتا۔ ¹⁰ ۱۰۔ اِیدے تے آستر نے ہتاک نوں نصحیت کیتی کہ او مردکی نوں ایہہ دِسے کہ ¹¹ ۱۱۔ بادشاہ دے سارے صوبیاں دے حاکم تے لوکی جاندے نے کہ جے کوئی بندہ بادشاہ دے اندر آلی جگہ وِچ بنا ں بلائے وڑ آوے تے بادشاہ دے حکم دے مطابق مار دِتا جاندا اے پر جیندے وِل بادشاہ آودی سونے دی لاٹھی نوں ودھاندا اے اودی جان بچ جاندی اے۔ جیتھوں تیک میرا تعلق اے پُورے بیتں دِن ہو گئے نے کہ مینوں وی بادشاہ وِلوں نیں صدیا گیااے ۔ ¹² ۱۲۔ جدوں آستر نے ایہہ لفظ مردکی نوں سنائے گئے تے اونے جواب وِچ ایہہ آکھیا ¹³ ۱۳۔ تُو ایہہ نہ سوچ کہ کیوں کہ تُو محل وِچ رہنی اے ایسس لئی یہودیاں وِچوں صرف تُو ای بچی ریویں گی ۔ ¹⁴ ۱۴۔ جے تُو ہون وی زبان بند رکھیں گی تے یہودیاں نوں تے کسے ہور پاسیوں مدد تے نجات مل جاوے گی پر تُو آودے پیو دے گھرانے دے نال مِر جاویں گی ۔ کون جاندا اے کہ تُو ایویں دے اوکھے ویلے وِچ ساڈی مدد کرن لئی ایسس شاہی رُتبے تیک پُہنچی ایں ؟ ¹⁵ ۱۵۔ تد آستر نے مردکی نوں ایہہ سنیا گھلیا ¹⁶ ۱۶۔ جا تے سُوسن وچ موجود سارے یہودیاں نوںکٹھیا ں کر تے تُسیں سارے میرے لئی تِن دِن تیک روزہ رکھو ، کھان پین توں باز رووہ ۔ میں تے میری لونڈیاں وی تہاڈے وانگوں روزہ رکھاں گیاں ۔ایدے توں بعد میں بادشاہ دے حضور وِچ جاواں گی حالانکہ ایہہ قانون دے خلاف اے پر جے مینوں مرنا ای اے تے مرن دِیو! ¹⁷ ۱۷۔ فیر مردکی ٹُڑ گیا تے آستر نے جو کُجھ آکھیا سی اوھدے اوتے عمل کیتا۔