¹ ۱. جدوں خدا وند تیرا خدا تینوں اُس دیس وچ داخل کرے۔ جہدے وارث ہون لئی توں جاندا ایں تے تیرے ساہمنے بہت ساریاں قوموں نوں جڑوں پٹ دیوے۔ یعنی حتیاں جرجاشیاں تے اموریاں تے کنعانیاں تے فرزیاں تے جویاں تے یبوسیاں نوں جیہڑیاں ست وڈیاں تے تیرے توں زیادہ زور ور قوماں نیں ۔ تے جدوں خدا وند تیرا خدا اوہناں نوں تیرے ہتھ وچ دے دیوے تے توں اوہناں نوں ماریں ۔ تاں توں اوہناں نوں اُکا ہلاک کرنا ۔ توں اوہن اں نال کوئی عہد نہ بنھنا تے نہ اوہناں تے مہربانی کرنا۔ ² ۲. تے جدوں خدا وند تیرا خدا اوہناں نوں تیرے ہتھ وچ دے دیوے تے توں اوہناں نوں ماریں ۔ تاں توں اوہناں نوں اُکا ہلاک کرنا۔ توں اوہناں نال کوئی عہد نہ بنھنا تے نہ اوہناں تے مہربانی کرنا۔ ³ ۳. توں اوہناں نال ویاہ نہ کرنا ۔ اپنی دھی اوہناں دے پتر نوں نوں نہ دینا تے اوہناں دی دھی اپنے پتر لئی نہ لینا ۔ ⁴ ۴. کیوں جو اوہ تیرے پتر نوں میری فرماں برداری توں بہکاوے گی۔ کہ اوہ دوجے معبوداں دی بندگی کرے۔ تد خدا وند دا قہر تیرے تے بھڑکے گا تے اوہ تہانوں چھیتی نابود کر دے گا۔ ⁵ ۵. سگوں تسیں اوہناں نال انج کرنا کہ تسیں اوہناں دے مذبحے ڈھا چھڈو۔ تے اوہناں دے تھم تروڑ دیو ۔ اوہناں دے کھمبیاں نوں کٹ دیو۔ تے اوہناں دیاں گھڑیاں ہویاں مورتاں نوں اگ وچ ساڑ و۔ ⁶ ۶. کیوں جو تو خدا وند اپنے خدا دی پاک قوم ایں تے خدا وند تیرے خدا نے تینوں چن لتا ۔ تاں جو اوہناں ساریاں لوکاں وچوں جیہڑے پوری زویں تے ہین ۔ تسیں اوہدے خاص لوک او۔ ⁷ ۷. ایس لئی نہیں پئی تسیں دوجیاں قوماں کولوں ودھ سو خدا نے تہانوں پسند کیتا تے چن لتا ۔ کیوں جو تسیں ساریاں قوماں توں بہت تھوڑے سی۔ ⁸ ۸۔ پر کیوں جو خدا وند نے تہانوں پیار کیتا تے اُس سونہہ دا لحاظ کیتا جیہڑی اوہنے تہاڈے پیو دادے نے کھادی ۔ ایس لئی خدا تہانوں زور آور ہتھ وچوں کڈھ لیا ۔ تے غلامی آلی تھاں توں تے مصر دے باشاہ فرعون دے ہتھوں تہانوں چھڑایا۔ ⁹ ۹. پس جان لے خدا وند تیرا خدا اوہی خدا اے ۔ اوہ وفادا خدا اے جیہڑا عہد نوں تے رحمت نوں اوہناں لئی ہزاراں پیڑھیاں تیکر چیتے رکھدا اے جیہڑے اوہنوں پیار کردے تے اوہدے حکماں نوں مندے نیں۔ ¹⁰ ۱۰. تے اوہ اوہناں نوں ہلاکت نال بدلہ دیندا اے جیہڑے اوہدے نال کینہ رکھدے نیں ۔ اوہ اجیہاں نال دیر نہیں کردا پر اوہناں توں ای بدلہ لیندا اے۔ ¹¹ ۱۱. پس توں اوہدے احکام تے قانون تے قضاواں من جنہاں تے عمل کرن لئی میں اج دے دن تینوں حکم دینداں ۔ ¹² ۱۲. پس جے توں ایہناں حکماں نوں سنیں گا ایہناں نوں منیں گا تے اوہناں تے عمل کریں گا تاں اوہ تینوں اجر دیوے گا۔ یعنی خدا وند تیرا خدا اپنے اُس عہد تے اپنی اُس رحمت نوں یاد رکھے گا جہدی اوہنے تیرے پیو دادے نال سونہہ کھادی ۔ ¹³ ۱۳. اوہ تینوں پیار کرے گا تے تینوں برکت دیوے گا تے تینوں ودھاوے گا۔ اوہ تیری ککھ دے پھل تے تیری زمین دے پھل نوں وی یعنی تیرے غلے تے تیری مے تے تیرے تیل تے تیرے ڈنگراں دیاں بچیاں تے تیریاں بھیڈاں بکریاں دے اجڑاں نوں اُسی دیس وچ برکت دیوے گا جہدے بارے اوہنے تیرے پیو دادے نال سونہہ کھادی سی کہ تینوں دیوے گا ۔ ¹⁴ ۱۴. تے توں اوہناں ساریاں قوماں توں ودھ کے مبارک ہوویں گا تے تیرا کوئی چوپایا بانجھ نہیں ہووے گا تے تساں وچوں بھانویں کوئی مرد ہووے بھانویں عورت بے اولاد نہیں رہوے گا ۔ ¹⁵ ۱۵. تے خدا وند ہر بیماری تیتھوں دور کرے گا تے مصر دے اوہناں ساریاں بریاں مرضاں وچوں جنہاں نوں توں جاندا ایں کوئی مرض تیرے تے نہیں لیائے گا۔ سگوں اوہنوں تیرے دشمناں تے پاوے گا ۔ ¹⁶ ۱۶. تے توں اوہناں ساریاں قوماں نوں جنہاں نوں خدا وند خدا تیرے حوالے کرے گا نابود کر دے گا۔ ایس لئی تیریاں اکھاں اوہناں تے ترس نہ کھاون تے نہ توں اوہناں دیاں معبوداں دی بندگی کرنا ، انج نہ ہووے۔ پئی اوہ تیرے لئی پھاہی ہوون ۔ ¹⁷ ۱۷. جے توں اپنے دل وچ آکھیں کہ ایہہ قوماں میتھوں ودھ نیں ۔ میں ایہناں نوں کیویں کڈھ سکاں گا۔ ¹⁸ ۱۸. تاں توں ایہناں کولوں نہ ڈرنا۔ سگوں یاد کرنا پئی خدا وند تیرے خدا نے فرعون تے سارے مصریاں نال کیہ کیتا۔ ¹⁹ ۱۹. یعنی اوہ وڈیاں مصیبتاں جیہڑیاں تیریاں اکھاں نے ویکھیاں۔ اوہ نشانیاں۔ اوہ عجائبات۔ اوہ زور آور ہتھ تے ودہائی ہوئی بانہہ جس نال خدا وند تیرا خدا باہر کڈھ لیایا۔ اسے وانگ خدا وند تیرا خدا اوہناں ساریاں قوماں نال کرے گا جنہاں کولوں توں ڈردا ایں ۔ ²⁰ ۲۰. تے خدا وند تیرا خدا اوہناں تے ڈیمو گھلے گا۔ تاں جو اوہناں بچیاں ہویاں نوں وی ، جیہڑے تیرے ساہمنیوں چھپ گئے، ہلاک کرے ۔ ²¹ ۲۱. ایس لئی توں اوہناں کولوں ڈریں نہیں کیوں جو خدا وند تیرا خدا جہیڑا تہاڈے وچکار اے۔ عظیم تے مہیب خدا اے ۔ ²² ۲۲. تے خدا وند تیرا خدا اوہنوں قوماں نوں تھوڑ ا تھوڑا کر کے دفع کرے گا۔ توں اوہناں نوں چھیتی فنا نہیں کریں گا۔ انج نہ ہووے پئی جنگل درندے تیرے تے ودھ جان ۔ ۲۳. سگوں خدا وند تیرا خدا اوہناں نوں تیرے حوالے کر دیوے گا تے اوہناں نوں ڈاہڈا گھبراوے گا ۔ ایتھے تیکر کہ اوہ فنا ہو جان گے ۔ ۲۴. تے اوہناں دے بادشاہواں نوںن تیرے ہتھاں وچ دے دیوے گا۔ ایس لئی توں اوہناں دے ناں اسماناں ہیٹھوں مٹا دیوے گا۔ تے کوئی تیرے ساہمنے کھلو نہیں سکے گا جدوں تیکر توں اوہنوں فنا نہ کریں۔ ²⁵ ۲۵. توں اوہناں دیاں معبوداں دیاں گھڑیاں ہویاں مورتاں نوں اگ وچ ساڑ توں اوس چاندی تے سونے دا جیہڑا اوہناں کول اے لالچ نہ کر تے اوہنوں اپنے لئی نہ لے ۔۔ انج نہ ہووے پئی اوہ تیرے لئی پھاہی ہون کیوں جو ایہہ خدا وند تیرے خدا دے ساہمنے مکروہ اے۔ ²⁶ ۲۶. تے توں بت دی کوئی وی شے اپنے گھر دےاندر نہ لیا ۔ انج نہ ہووے پئی توں اوہدے وانگ ملعون ہوویں ۔ توں اوہدے کولوں کمال نفرت کر۔ تے اوہ تیرے لئی گندگی وانگ ہووے ۔ کیوں جو اوہ ملعون اے۔