¹ ۱۔بیلشضر بادشاہ دے راج دے تیجے ورھے دے وچ اوسرویا دے پچھاں دانی ایل نیں اک ہور رویا ڈٹھی ۔ ² ۲۔ تے میں اوس رویا دے وچ ویکھیا ،رویا دے وچکار مینوں اوس ویلے اینج جاپیا جیویں میں سوسن دے محل اندر آں جیہڑا عیلام دے صوبے وچ اے،میں فیر رویا وچ ای اپنے آپ نوں دریائے اولائی دے کنڈے اتے ویکھیا ۔ ³ ۳۔میں اکھاں چک کے نظر کیتی تے کیہ ویکھیا کہ دریا کول اک مینڈھا کھلوتا سی ۔اوسدے دو سنگ سن ۔دونویں سنگ اچے سن پر اک سنگ دوجے کولوں وڈا سی تے وڈا سنگ دوجے توں پچھوں اگیا سی ۔ ⁴ ۴۔میں ایس مینڈھے نوں ویکھیا پئی اوہ لہندے تے اترتے دکھن ول سینگ ماردا سی تے اوہدے سامنے کوئی وی درندہ کھلوناں سکیا تے ناں ای اوہنوں چھڈا سکیا ۔پر اوہ جو چاہندا سی اوہ ای کردا سی ۔ایتھوں تیک کہ اوہ بہتا وڈا ہو گیا ۔ ⁵ ۵۔ اجے میں سوچیں پیا ہویا سی کہ اک ابکرا لہندے ولوں آن کے ساری دھرتی تے اینج پھریا کہ اوہنے زمین نوں وی نئیں چھویا تے اوس بکرے دیاں دوواں اکھاں دے وچکار اک اجرج سنگ سی ۔ ⁶ ۶۔ تے اوہ بڑے غصے نال اوس دو سنگاں والے مینڈھے کول آیا جنہوں میں دریا دے کنڈے تے کھلوتا ویکھیا سی تے بڑے قہر دے نال اوہدے اتے چڑھائی کر دتی ۔ ⁷ ۷۔ تے میں ویکھیا پئی اوہ منیڈھے دے نیڑے اپڑیا تے مینڈھے اتے اوہنوں ڈاہڈا غصہ آیا تے اوہنے مینڈھے نوں ماریا تے اوہدے دونویں سنگ بنھ دتے تے مینڈھے وچ اوہدے اگے کھلون دا رتی برابر زور نئیں سی پئی اوہدے سامنے کھلو سکے نے اوہنے مینڈھے نوں ڈھا لیا تے اوس نوں لتا ڑ دتا نے کوئی نئیں سی جیہڑا مینڈھے نوں اوہدے کولوں چھڈا سکے ۔ ⁸ ۸۔تے اوہ بکرے دار زور وددا گیا تے جد اوہ بہتا زور والا ہو گیا تے اوہدا وڈا سنگ بھج گیا تے اوہدی تھاں چار اچرج شکلا ں دے سینگ اسمان دیاں چاراں ہواواں ول نکلے ۔ ⁹ ۹۔ تے سنگاں وچوں اک چھوٹا سنگ نکلیا جیہڑا دکھن تے چڑ ھدے تے جلالی دیس ول انت ای ودھ گیا ۔ ¹⁰ ۱۰۔تے اوہ اسمان دے لشکر تیک جا اپڑیا تے اوہنے اسمان دے لشکر وچوں تے تاریاں وچوں کنیاں نوں دھرتی اتے سٹ دتا تے اوہناں نوں لتا ڑیا ۔ ¹¹ ۱۱۔سگوں اوہنے لشکر دے سردار وانگ اپنے آپ نوں ودھا لیا ۔تے اوہنے اودے کولوں ہمیشہ دی قر بانی کھو لئی تے اوہدی پاک تھاں نوں ڈھا دتا ۔ ¹² ۱۲۔تے پاپا ں دے سببوں اک لشکر سدا دی قربانی سنے اوس نوں دے دتا گیا تے سچیائی نوں دھرتی اتے سٹ دتا گیا تے اوہ کامیابی نال ایہی کردا رہیا ۔ ¹³ ۱۳۔ تے میں اک دوت نوں گلاں کردیاں ہویا سنیا تے دوجے دوت نے اوس گلاں کرن والے دوت نوں پچھیا پئی کہ سدا دی قربانی اجاڑن والی پاپاں دی رویا جیہدے وچ پاک تھاں تے لشکر دونویں لتاڑ ے جاندے نیں کد تیک رہو گی ۔ ¹⁴ ۱۴۔تے اوہنے مینو ں آکھیا پئی "دو ہزار تن سو شام تے سویر تیک " فیر پاک تھاں نوں مڑ پاک کیتا جاوے گا ۔ ¹⁵ ۱۵۔جد میں ہاں میں دانی ایل نے ایہہ رویا ڈٹھی تے ایہہ دا مطلب جانن لئی سوچیں پیاں سی ۔اتے کیہ ویکھدا ہاں پئی میرے سامنے کوئی کھلوتا سی جیہدی شکل آدمی وانگ سی ۔ ¹⁶ ۱۶۔تے مینوں اولائی وچوں اک آواز سنائی دتی جنہے اولائی دے وچکار اچی آواز وچ آکھیا ،اے جبرئیلایس آدمی نوں ایس رویا دا مطلب سمجھا دے ۔ ¹⁷ ۱۷۔سو میں جتھے کھلوتا سی اوہ میرے کول آیا تے اوہدے آن تے میں ڈر گیا تے میں منہ پرنے ڈگ پیا ۔فیر اوہنے مینو ںآکھیا اے بشر دی اولاد توں ایہہ سمجھ لے کہ ایہہ رویا اخیر زمانے بارے اے ۔ ¹⁸ ۱۸۔ تے جد اوہ ایہہ گلاں کرریا سی تاں میں گہری نیندر وچ منہ پرنے دھرتی اتے پیاسی پر اوہنے مینوں پھڑ کے سیدھا کھڑا کر دتا ۔ ¹⁹ ۱۹۔تے آکھیا میں تینوں دساں گا پئی ایس قہر دے اخیر تے کیہہ ہووے گا کیوں جو ایہہ حکم متھے ہوئے سمے دی بابت اے ۔ ²⁰ ۲۰۔جیہڑا مینڈھا توں ڈٹھا اے اوہدے دونویں سنگ مادی تے فارسی بادشاہ نیں۔ ²¹ ۲۱۔تے اوہ تکڑا بکرا یونان دا بادشاہ اے تے اوہدیاں اکھاں دے وچکار لا وڈا سنگ پہلا بادشاہ اے ۔ ²² ۲۲۔تے اوس سنگ دا بھج جانا تے اوہدی تھاں تے چار ہور سنگاں دا نکل آنا اوہ چار بادشاہیاں نیں جیہڑیاں اوہدی قوم دے وچکار ہون گیاں پر اوہناں داراج اوہدے وانگ نئیں ہووے گا ۔ ²³ ۲۳۔ فیر اوہدی بادشاہی دے اخیر تیک جد پاپی حدوں ودھ جاون گے تے فیر اک اکھڑ تے بھیداں نوں بجھن والا بادشاہ اٹھے گا ۔ ²⁴ ۲۴۔اوہ بڑا ڈاہڈا ہووے گا پر اوہدا زور اوہدے بلاتے ناں ہووے گا اوہ اچرج طر یقے نال تباہ کردیوے گا ۔تے بڑا سپھل ہووے گا تے کم کرے گا تے زور اواں تے پاک لوکاں نوں مار سٹے گا ۔ ²⁵ ۲۵۔تے اپنی چترائی نال لوکاں نوں دھوکا دین تے اوہدے منصوبے اوہدے ہتھو ں توڑ اپڑن گے ۔اوہ بڑا گھمنڈی ہو جاوے گا تے بہتیاں نوں صلح دے سمے ای نیست کر دیوے گا ۔اوہ بادشاہواں دے نال وی مقابلہ کرن لئی اٹھ کھلو وے گا پر بنا ہتھ ہلائے بغیر ای ہار جاوے گا ۔ ²⁶ ۲۶۔اوہ سانجھ تے سویرے جیہڑی رویا دی دس پائی اے توں اوس رویا نوں ٹھپ کے رکھ ۔کیوں جو اوہد ے پورا ہوون وچ اجے بتھیرے دیہاڑے نیں ۔ ²⁷ ۲۷۔تے میرے دانی ایل دا ہوش جاندا ریا تے میں کجھ دناں تائیں بیمار پیا رہیا ۔فیر میں اٹھ کھلوتا تے بادشاہ دا کم کردا رہیا میںاوس رویا توں دکھی ساں پر ایس نوں سمجھ والاکوئی نئیں سی ۔