¹ ۱۔ بابل دے بادشاہ بیلشضردے پہلے ورھے وچ دانی ایل نے اپنے بسترے اتے اک سفنےوچ اپنیاں سوچاں دی رویا ڈٹھی تداوہنے اوس سفنے نوں لکھیا تے اوہ ساریاں کلاں کھل کے دسیاں۔ ² ۲۔ میں رات نوں اک رویا ویکھی تےاہدے وچ ایہہ ویکھیا پئی اک وڈے سمندر اُتے اسمان دیاں چار ہواواں بڑے زور نال وگدیاں نیں۔ ³ ۳۔تد سمندر وچوں چار وڈے وڈے درندے نکلے جیہڑے اک دوجے تھوں وکھو وکھ سن ۔ ⁴ ۴۔ پہلا درندہ شیروانگ سی تے اوہدے کھمب عقاب وانگ سن میرے ویکھدے ای ویکھدے اوہدے کھمب پٹ لئےگئے تے اوہنوں زمین توں چک لیا گیا تے اوہ آدمی وانگ اپنے پیراں تے کھلو گیا تے اوہنوں آدمی دا دل دے دتا گیا ۔ ⁵ ۵۔ میں نظر کیتی تے ویکھیا پئی دوجا درندہ رچھ دے وانگ اے تے اوہ اک پاسے سدھا کھلو گیا تے اوہدے منہ وچ دنداں دے وچکار تن پسلیاں سن تے اوہنوں آکھیا گیا پئی اٹھ تے ڈھیر سارا ماس کھا۔ ⁶ ۶۔ تے میں رات دی رویا وچ نظر کیتی تے ویکھیا پئی اک درندہ تیندوے وانگ اے تے اوہدی ہک اتے پنچھی وانگ چار بانہواں سن ۔تے اوس حیوان دے چار سر سن تے اوہنوں راج دے دتا گیا ۔ ⁷ ۷۔ تے میں رات دی رویا نظر کیتی تے کیہہ دیکھیا پئی چو تھا درندہ بھیانک ،ڈراونا اے تے بڑا ای زبردست اے تے اوہدے دندوڈے وڈے تے لوے دے سن اوہ نگلی جانداسی ،ٹوٹے ٹوٹے کردا سی تے جیہڑے رہ جاندے سن اوہناں نوں پیرا نال درڑدا سی ،پر اوہ دوسرے درندیاں توں وکھرا سی جیہڑے اوس تھوں پہلے آئے سن ۔اوہدے دس سنگ سن ۔ ⁸ ۸۔جدوں میں سنگاں تے دھیان کردا پیاسی تے میں ویکھیا پئی اک ہور نکاجیا سنگ اوہناں دے وچکار روں نکلیا جیہدے اگلے پہلے سنگاں وچوں تن سنگاں نوں مڈھوں پٹ دتا گیا تے میں ویکھیا پئی ایس سنگ وچ آدمی وانگ اکھاں سن تے اک منہ سی جیہدے وچوں ہنکاردیاں گلاں نکلدیاں سن۔ ⁹ ۹۔تے جد میں ویکھ رہا سی ادوں تیک تخت لگائے گئے تے قدیم الایام اوہناں اتے بیٹھ گیا، اوہدے لیڑے برف وانگ چٹے سن تے اوہدے وال اُن وانگ ستھرےسن اوہداتخت اگ دے لانبو وانگ سی تے تخت دے پہیے بلدی اگ وانگر سی ¹⁰ ۱۰۔اوہدے اگے اک اگ دا دریا وگدا سی ہزاراں ہزار اوہدی خد مت کردے سن تے لکھو لکھ اوہدے حضور وچ کھلوتے سن اودوں نیاں ہون ڈیا سی تے کتاباں کھولیاں گئیاں ¹¹ ۱۱۔میرے ویکھدے ای ویکھدے اوس سنگ دیاں غرور بھریاں گلاں د ی واج دے سببو ں میرے اگے اوس درندے نوں مار دتا گیا ۔اوہدا بدن ہلاک کر دتا گیا تے اگ دے بھانبڑ وچ سٹ دتا گیا ۔ ¹² ۱۲۔تے دوجے درندیاں دے کولوں اوہناں دا راج و یلے لیا گیا تے اوہناں دی حیاتی دا ویلا اک زمانہ تے اک عرصہ متھیا گیا ۔ ¹³ ۱۳۔ میں رات دی رویا اُتے نظر کیتی تے کیہ ویکھیا پئی اک بندہ آدمزاد دے وانگ اسمان دے بدلاں سنے آیا تے اوہ قدیم الایام تیک اپڑ گیا تے اوہدے اگے لیایا گیا ¹⁴ ۱۴۔تے حکومت تے وڈہائی تے راج اوہنوں دے دتی گئی تاں جو ساریاں قوماں تے امتاں تے زباناں اوہدی ٹہل کرن اوہدی حکومت سدا تیک قائم اے تے لازوال حکومت اے تے اوہدی مملکت مٹن والی نئی ۔ ¹⁵ ۱۵۔فیر میں دانی ایل دی روح میرے اندر دکھی ہوئی تے میرے دماغ دی رویا نے مینوں بے قرار کر دتا ۔ ¹⁶ ۱۶۔سو میں اوہناں وچوں جیہڑے کول ای کھلوتے سن اک بندے دے کول گیا تے ایہناں ساریاں گلاں دی سچیائی پچھی فیر اوہنے مینوں دسیا تے ایہناں گلاں دا مطلب وی سمجھایا۔ ¹⁷ ۱۷۔ ایہہ چار وڈے وڈے جاندار اوہ چار بادشاہ نیں جیہڑے ایس زمین تے راج کرن گے ۔ ¹⁸ ۱۸۔فیر حق تعالیٰ دے پاک لوکی راج لے لین گے تے ہمیش تیک ایہدے مالک ہوون گے ۔ ¹⁹ ۱۹۔ تد چوتھے درندے دی سچائی سمجھن نوں میرا من کیتا جیہڑا دوجیاں کولوں وکھراسی تے ڈاہڈا ڈراؤنا سی جیہدے دند لوے دے تے نونہہ پتل دے سن تے جیہڑا لنگھداجاندا تے ٹوٹے ٹوٹے کر دیندا سی تے جیہڑے بچ جاندے سی اوہناں نوں پیراں نال لتاڑ دا سی ۔ ²⁰ ۲۰۔ تے اوہدے دس سنگاں دی سچائی نے اوس سنگ دی جیہڑا نکلیا سی تے جیہدے اگے تن ڈگ پئے سن مطلب جیہڑے سنگ دیاں اکھاں سن تے جیہدے منہ وچوں غرور دیاں گلاں نکلدیاں سن تے جیہدی صورت اوہدے سنگیاں تو بہتی رعب والی سی ۔ ²¹ ۲۱۔میں ویکھیا پئی اوہی سنگ مقدساں نال جنگ کرداسی تے اوہناں تے چھا جاندا سی ۔ ²² ۲۲۔جد تیک قدیم الایام نہ آیا تے حق تعالیٰ دے مقدساں دا نیاں ہویا تے وقت آن اپڑیا پئی مقدس لوگ راج دے مالک ہوون گے ۔ ²³ ۲۳۔تے اوہنے اینج آکھیا پئی چوتھا درندہ حیوان دھرتی اتے چوتھی بادشاہی اے تے اوہ دوجیاں بادشاہیاں تھوں وکھری ہووے گی تے اوہ ساری دھرتی نوں نگل جاوے گی اوہنوں لتاڑےگی تے اہدے ٹوٹے ٹو ٹے کر دیو گی ۔ ²⁴ ۲۴۔ تے اوہ دس سنگ دس بادشاہ نیں جیہڑے او س راج دے وچ اٹھن گے تے اوہناں دے پچھو اک ہور بادشاہ اٹھے گا جیہڑا پہلے بادشاواں تو وکھرا ہووے گا تے تِن بادشاہواں نوں ہرا دوے گا۔ ²⁵ ۲۵۔ تے حق تعالیٰ دے خلاف گلاں کرے گا تے حق تعالیٰ دے مقدساں نو ں دکھ دیوے گا تے متھے ہوئے وقتاں نوں تے شر یعت نوں بدل دیوے گا تے اوہ اک سمے تے سمے تیک ادھے دور تک اوہدے ہتھاں وچ کردتے جان گے ۔ ²⁶ ۲۶۔ فیر عدالت لگے گی تے اوہدا اختیار اوہدے کولوں لے لیا جاوے گا تاں پئی اوہنوں ہمیش لئی تباہ کر دین ۔ ²⁷ ۲۷ ۔پر سارے اسمان دے ہیٹھاں دی مملکتاں دی حکومت تے سلطنت تے عظمت حق تعالیٰ دے مقدساں دی امت نوں بخشی دتی جائے گی ۔اوہدی مملکت ہمیش واسطے ہووے گی تے سارے دیس اوہدی خدمت کرن گے تے اوہدا حکم منن گے ۔ ²⁸ ۲۸۔ ایتھے ایہہ گل مک گئی مینوں دانی ایل نوں میرا سوچاں نے بڑا بے چین کیتا تے میرے چہرے دا رنگ بدل گیا فیر وی میں ایہہ گل اپنے دل وچ ای رکھی ۔