¹ ۱۔ بیلشضر بادشاہ نے اپنے اک ہزار امیراں دی وڈ ی ضیا فت کیتی تے اوہناں ہزار بندیاں دے سامنے رج کے شراب پتی ۔ ² ۲۔ بیلشضر نےحکم دتا پئی سونے چاندی دے اوہ بھانڈے جنہاں نوں اوہدا پیو بنوکدنضر یروشلیم دی ہیکل وچوں کڈھ کے لیا یا سی ۔لے کے آن تاں جو بادشاہ اوہدے امیر تے اوہناں دیا رانیاں تے رکھیلاں نے اوہناں بھانڈیاں وچ شراب پین۔ ³ ۳۔سو سونے تے چاندی دے اوہ بھانڈے جیہڑے خدا دی اوس ہیکل وچوں لئے گئے سن اوتھے لیائے گئے تے بادشاہ تے اوہدے امیراں تے اوہدی بیوی تے حرماں نے اوہناں وچ شراب پیتی ۔ ⁴ ۴۔اوہ شراب پی پی کے اپنے دیوتاواں دی تعریف کردے رے جیہڑے سونے چاندی تے پیتل تے لوے تے لکڑی تے پتھر دے بنے ہوے سن ۔ ⁵ ۵۔اوسی ویلے انسانی ہتھ دیاں انگلیاں وکھائی دتیاں تے اوہناں نے بادشاہ دے محل دی دیوار دے گچ اتے لکھیا ۔بادشاہ نے ہتھ دا لکھن والا حصہ ویکھیا ۔ ⁶ ۶۔ تد بادشاہ دے مکھ دا رنگ اڈ گیا تے اوہدیاں سوچاں نے اوہدا چین کھو لیا تے اوہدے لک دے جوڑ ڈھلے پے گئے تے اوہدے گوڈے اک دوجے نال ٹکران لگ پئے ۔ ⁷ ۷۔تے بادشاہ بڑی اچی آواز چ چیکیا پئی جوتشیاں تے کسدیاں تے گیانیاں نوں بلاؤ تے بادشاہ نے بابل دے سیانیاں نوں آکھیا کہ جیہڑا ایس لکھے ہوئےنوں پڑھ لوے تے اوہدا مطلب دس دیوے گا اوس نوں قر مچی رنگ دا چوغہ دتا جاوے گاتے اوہدے گل وچ سونے دا کنٹھا پایا جائے گا تے اوہ ملک دا تیجا وڈا سردار ہو وے گا ۔ ⁸ ۸۔تد بادشاہ دے سارے گیانی آئے پر اوہ لکھیا ہو یا نہ پڑ ھ سکے تے ناں بادشاہ نوںمطلب دس سکے ۔ ⁹ ۹۔فیر بادشاہ دا رنگ اڈ گیا تے اوہدے امیر وی پر یشان ہو گئے ۔ ¹⁰ ۱۰۔بادشاہ تے اوہدے امیراں دیا گلاں سن کے بادشاہ دی ماں جشن وچ آئی تے بادشاہ نوں آکھن لگی ۔اے بادشاہ سدا جیوندا رہ ۔تیریاں سوچاں تینوں پریشان نہ کرن تے تیرے مکھ دا رنگ نہ بدلے ۔ ¹¹ ۱۱۔تیرے ملک وچ اک بندہ اے جیہدے وچ پاک دیوتاواں دی روح اے تیرے پیو دے دناں وچ اوہدے وچ چانن تے دیوتاواں ورگی دنائی سی تے تیرے پیو بنو کد نضر نے اوہنوں جادوگراں ،جوتشیاں تے کسدیاں تے گیانیاں دا سردار متھیا سی ۔ ¹² ۱۲۔کیو ںجو اوس دانی ایل دے وچ جیہدا نال بادشاہ نے بیلشضر رکھیا سی ۔اک اتم روح اے مطلب پئی سفنیاں دا مطلب تے مشکلاں دا حل تے اوکھیاں گلاں دسن دا علم تے سمجھ اوس دے کول اے ۔سو توں دانی ایل نوں سد تے اوہ ایس دا مطلب دسے گا ۔ ¹³ ۱۳۔تد دانی ایل نوں بادشاہ دے سامنے لیایا گیا ۔بادشاہ نے پچھیا : کیہ توں ای او دانی ایل ایں جیہڑا یہوداہ دے اوہناں اسیراں وچوں ایں جنہاں نو ں بادشاہ میرا پیو یہوداہ توں لیا یا سی ؟ ¹⁴ ۱۴۔میں سنیا اے تیرے وچ دیوتاواں دی روح اے تے ایہہ وی سنیا اے کہ تیرے وچ چانن تے سمجھ تے پورا گیان اے ۔ ¹⁵ ۱۵۔ہن گیانی تے جوتشی میرے سامنے لیائے گئے تاں جو اوس لکھت نوں پڑھ کے مینوں اوہدا مطلب دسن پر اوہ ایہناں گلاں دا مطلب نہ دس سکے ۔ ¹⁶ ۱۶۔ پر میں تیرے ولوں سنیا اے پئی توں سفنیاں دا مطلب دسن تے وہم دور کرن وچ بڑا ماہر ایں ۔سوجے توں ایس لکھت نوں پڑھ کے ایہدا مطلب دسیں تے تینوں قر مچی رنگ دا چوغہ پہنایا جاوے گا تے تیرے گل وچ سونے دا کینٹھا پاپا جاوے گا توں ملک دا تیجا وڈا سردار ہو ویں گا۔ ¹⁷ ۱۷۔تد دانی ایل نے بادشاہ دے سامنے جواب دیندے ہویاں آکھیا توں اپنے انعام اپنے کول ای رکھ تے توں اپنے ایہہ انعام کسی ہور نوں دے چھڈتاں ویں میں بادشاہ لئی ایہہ لکھت پڑھاں گا تے اوہدا مطلب وی دساں گا ۔ ¹⁸ ۱۸۔اے بادشاہ سوہنے رب نے تیرے پیو نوں ملک تے وڈیائی تے شان تے عزت بخشی ۔ ¹⁹ ۱۹۔تے اوس وڈیائی دے سببوں جیہڑی رب نے بادشاہ نوں دتی سی ،ساریاں قوماں تے امتاں تے وکھو وکھ زبان بولن والے اوہدے حضور وچ کمبدے سن ۔اوہ جنہوں چاہندا سی اوس نوں ای قتل کرادا سی تے جنہوں چاہندا سی اوہنوں جیوندا رکھدا سی تے جنہوں چاہندا سی اوہدا مان ودھاندا سی تے جنہوں چاہندا سی نیواں کردا (گھٹا دہندا) سی ۔ ²⁰ ۲۰۔پر جدوں اوہدے وچ ہنکارآ گیا تے اوہدا دل اوہدے سببوں کرڑا ہو گیا تد اوہنوں ملک دے تخت اتوں لاہ دتا گیا تے اوہدی شان اوہدے کولوں کھوہ لئی گئی ۔ ²¹ ۲۱۔تے اوہنوں انساناں وچوں کڈ ھ دتا گیا تے اوہدا دل جانوراںوانگ رہن لگ پیاتے جنگلی کھوتیاں دے نال وسن لگ پیا ۔تے اوہ بلد وانگ گھاہ چر دا سی ۔اوہدا پنڈا اسمانی تریل نال بھجدا سی ۔اوس ویلے اوہنوں سمجھ آ گئی پئی کہ خدا تعالیٰ ای انسان دے دیس اتے راج کردا اے تے جنہوں چاہندا اے اوہنوں دیندا اے ۔ ²² ۲۲۔تے توں اے بیلشضر جیہڑا اوہدا پتر ایں جدوں تینوں ایہناں ساریاں گلاں دا پتہ سی تد وی توں دل توں عاجز نہ بنیا ۔ ²³ ۲۳۔ سگوں توں اسمان دے مالک دے خلاف ہو گیا تے تیر ے وچ ہنکارآ گیا تے اوہدے گھر دے بھانڈے تیرے سامنے لیائے گئے تے توں تے تیرے سردارں تے تیری رانیاں تے تیریاں رکھیلاں نے اوہناں وچ پیتا۔۔ایس توں وکھ توں چاندی تے سونے تے پتل تے لوے تے لکڑی تے پتھر دے اوہناں دیوتاں دی تعریف کیتی جنہاں نوں نا ںکجھ وکھائی دیندا اےناں سنائی دیندا اے ناں اوہناں نوں کجھ پتہ ای اے ۔پر جیہڑے خدا دے ہتھ وچ تیری جان (تیرا ساہ )اے تے جیہڑا تیریاں راہواں دا مالک اے ۔توںاوہدی تعریف نئیں کیتی ۔ ²⁴ ۲۴۔سو اوس ولوں ہتھ دا اوہ حصہ گھلیا گیا تے ایہہ لکھت لکھی گئی ۔ ²⁵ ۲۵۔جو کجھ لکھیا گیا ایہہ اوہو اے۔مِنے منِے تقیل وفرسین۔ ²⁶ ۲۶۔ایہناں گلاں دا مطلب ایہہ وے ۔مِنے ،مطلب پئی خدا نے تیری بادشاہی دا حساب کر لیا اے تے اوہنوں ختم کر چھڈیا اے ۔ ²⁷ ۲۷۔تقیل ،مطلب تینوں لکڑی چ تو لیا گیا اے ۔توںوزن چ گھٹ نکلیا ایں ۔ ²⁸ ۲۸۔فرسین۔مطلب تیرا ملک ونڈیا گیا اے تے مادیاں تے فارسیاں نوں دے دتا گیا اے ۔ ²⁹ ۲۹۔تد بیلشضر دے حکم نال دانی ایل نوں قرمچی چوغہ پہنایا گیا تے اوہدے گل وچ سونے دا کینٹھا پوایا گیا تے اوہدے لئی اعلان کیتا گیا کہ اوہ دیس داتیجے درجے دا سردار اے ۔ ³⁰ ۳۰۔اوس رات کسدیاں دےبیلشضر نوں قتل کردتا گیا ۔ ³¹ ۳۱۔ تے باٹھ ورہیاں دے دارامادی نے اوس ملک تے قبضہ کر لیا ۔