¹ ۱۔فارس دے بادشاہ خورس دے راج دے تیجے ورھے وچ دانی ایل اتے جیہڑا بیلشض اخواندا سی اک گل اتری تے اوہ گل سچ سی تے ڈاہڈی بپتا دی سی تے اوہنے اوس گل تے دھیان کیتا تے اوس رویا دا بھید سمجھ لیا ۔ ² ۲۔ میں دانی ایل تن ساتیاں تیک سوگ کر دا ریا۔ ³ ۳۔جد تائیں ایہہ تن ساتے مک ناں گئے میں ناں تے سوادلا کھانا کھادا تے ناں ای ماس تے شراب نوں منہ لایا تے ناں میں تیل ملیا ۔ ⁴ ۴۔ تے پہلے مہینے دے چووی ویں دن می وڈے دریا مطلب پئی دجلہ دریا دے کنڈے تے ساں ۔ ⁵ ۵۔ میں اپنیاں اکھاں چک کے ڈٹھا تے کیہہ ویکھنا ہاں پئی اک آدمی جنہے سوتی لیڑے پائے ہوئے نیں تے اوفاز دے شُچے سونے دی پیٹی لک نال بنھی ہوئی اے کھلوتا اے ۔ ⁶ ۶۔اوہداسریر زبرجد ورگا تے اوہدا منہ بجلی وانگ سی تے اوہدیاں اکھاں جلدیاں دیویاں ورگیاں سن ۔اوہدیاں باہاں تے پیراں دا رنگ لشکدے پتل وانگ سی تے اوہدی آواز بھیڑ دے شور وانگ سی ۔ ⁷ ۷۔ اے رویا منیوں دانی ایل نوں وکھائی دتی سی کیوں جو میرے نال دے لوکاں نے ایہہ رویا نئیں ڈٹھی پر اوہ بھڑی طرح کمبن لگ پئے تے اپنے آپ نوں لکاون لئی نٹھ گئے ۔ ⁸ ۸۔اینج میں کلا ای رہ گیا تے میں ایس وڈی رویا نوں ویکھدے ای جیویں میرے سریر وچ جان نئیں رہی ،میرا رنگ اڈ گیا تے میرے وچ اکا طاقت نئیں رہی ۔ ⁹ ۹۔ پر میں اوس آدمی دے بولن دی آواز نوں سنیا تے منہ پرنے ڈگ کے گوڑی نیند ر سوں گیا ۔ ¹⁰ ۱۰۔تے ویکھو اک ہتھ نے مینو چھویا تے مینوں گوڈیاں تے تلیاں اُتے بٹھایا ۔ ¹¹ ۱۱۔ تے اوہنے مینوں آکھیا پئی اے پیارے مرد دانی ایل ! میں جیہڑیاں گلاں تینوں آکھدا ہاں اوہناں نوں سمجھ لے تے سدھا کھڑا ہو جا ۔کیوں جو ہن مینوں تیرے کول گھلیا گیا اے تے جد اوہنے مینوں ایہہ گل آکھی تے میں کمبدا ہویا کھلو گیا ۔ ¹² ۱۲۔فیر اوہنے مینو ں آکھیا اے دانی ایل نہ ڈر ۔کیوں جو پہلے ای دن توں جد تو ایہہ گلاں سمجھن لئی اپنا د ل لگا یا تے اپنے آپ نووں اپنے خدا دے اگے نیواں کیتا ۔تیریاں گلاں سنیاں گئیا نتے تیریاں گلاں دے سببوں میں آیا ہاں ۔ ¹³ ۱۳۔پر فارس دے ملک دے موکل نے اکی دیہاڑیاں تک میرے نال لڑائ ی کیتی پر ویکھ فیر میکائیل دوت جیہڑا خدا دے نیڑے اوہدے حضور وچ رہن والے دوتاں وچوں اک دوت اے اوہ میری مدد کرن لئی آپڑیا تے میں اوتھے فارس دے بادشاہواں دے نال ٹھہرا ریا ۔ ¹⁴ ۱۴، جو کجھ تیرے لوکاں نالآخیر دناں وچ ہون والا اے میں اوہ تینوں دسن لئی آیا واں کیوں جو ایہہ رویا اے بہتے سارے دناں دے لئی اے ۔ ¹⁵ ۱۵۔جد اوس نے مینوں ایہہ گلاں آکھیاں میں اپنا سر سٹ لیا تے چپ ہو گیا ۔ ¹⁶ ۱۶۔تے ویکھو کسی نے جیہڑا آدمزاد وانگ سی میرے بلاں نوں چھو یا تے میں اپنا منہ کھولیا تے جیہڑا میرے سامنے کھلوتا سی اوہنوں آکھیا ۔اے خداوند ایہہ رویا وکھن دے سببوں میں بڑا دکھی ہاں ۔میں بڑا ماڑا ہاں ۔ ¹⁷ ۱۷۔فیر بھلا میں تیرا خادم اپنے خداوند نال کیویں گل کر سکدا اے ؟ ناں تے میرے وچ زور اے تے ناں ای دم اے ۔ ¹⁸ ۱۸۔ تد اوس آدمی نے جیہڑا ویکھن چ سادہ جیہا سی مینوں اک واری فیر چھویا تے مینوں زور دتا ۔ ¹⁹ ۱۹۔تے اوہنے آکھیا اے پیارے انسان ۔نہ ڈر تیر ی سلامتی ہووے۔ڈاہڈا ہوتے زور پھڑ تے جد اوس نے مینوں ایہہ آکھیا تے میں زور پایا تے آکھیا اے میرے مالک ہن فرما کیوں جو توں ای مینوں زور دتا اے ۔ ²⁰ ۲۰۔ تد اوس نے آکھیا کیہہ تینوں پتہ اے پئی میں تیرے کول کیوں آیا ہاں ؟ تے ہن میں فارس د ے محافظ نال لڑن نوں مڑ کے جاناں واں تے جدوں میں چلا جاواں گا تے یونان دا موکل آوے گا ۔ ²¹ ۲۱۔سو جو کجھ سچائی دی کتاب وچ لکھیا میں تینوں دساں گا تے تیرے موکل میکائیل دے سوا ایس کم وچ میرا کوئی مدد گار نئیں ۔