1
. تے ایدے بعد اینج ہویا پئی داود نے فلستیاں نو ں ماریا تے اوہناں تے غالب آیا۔ تے داود نے جات تے اوہدے پنڈ فلستیاں دے ہتھوں کھو لئے ۔
2
. تے اوہنے موابیا ں نوں ماریا تے اوہناں نوں پوئیں تے لمے پاکے رسی نال ناپیا۔ تے اوہنے دو رسیاں نال ناپیا۔ اک نال قتل کیتے جان لئی تے اک نال زندہ رکھن لئی۔ تے موابی داود دے محصول دین والے خادم بنے۔
3
. تے داود نے ضوباہ دے بادشاہ رحوب دے پُتر ہدد عزر نوں وی ہرایا ، جدوں اوہ دریا ئے فرات تے اپنی حکومت بحال کرن گیا۔
4
. تے داود نے اوہدے اک ہزار تے ست سو سوار تے وی ہزار پیادے پھڑ لئے۔ تے سارے رتھاں دے گھوڑیاں دیاں کُھچاں کٹ دتیاں۔تے اوہناں وچوں سو رتھاں لئی گھوڑے بچا لئے۔
5
. فیر دمشق دے ارامی ضوباہ دے بادشاہ ہدد عزر بن دی مدد نوں آئے۔ تے داود نے ارامیاں دے ۲۲ ہزار بندے قتل کیتے۔
6
. تے داود نے ارام دمشق چ ناظم مقرر کیتے۔تے ارامی وی داود دے محصول دین والے بنے۔تے جتھے کتے وی داو د گیا خداوند نے اوہدی حفاظت کیتی۔
7
. داود نے ہدد عزر دے نوکراں دیاں سونے دیا ں دھالاں کھو لیاں تے اوہناں نوں یروشلم چ لے آیا۔
8
. تے داود بادشاہ ہدد عزر دے شہراں بطاہ تے بیروتی چوں بہت سارا پتل لے آیا۔
9
. تے حمات دے بادشاہ تُوغی نے سُنیا پئی داود نے ہدد عزر دے سارے لشکر نوں ماریا اے۔
10
. فیر طوغی نے اہنے پُتر یورام نوں داود بادشاہ کول گھلیا پئی اوہنوں سلام آکھے تے مبارک باد دیوے پئی اوہنے ہدد عزر نال جنگ کیتی تے اوہنوں ہرایا ایس لئی پئی ہدد عزر طوغی نال لڑائیاں کردا رہندا سی ۔ تے یورام چاندی تے سونے ،تے پتل دے پانڈے اپنے نال لیایا۔
11
. تے داود بادشاہ نے ایہناں نوں وی خداوند لئی مخصوص کیتا۔ اینج ای اوس چاندی تے سونے نوں جیہڑا اوس نے جتیاں قوماں توں لیاندا سی مخصوص کیتا۔
12
. یعنی ادومی تے موابی تے بنی عمون تے فلستی تے عمالیقی تے ضوباہ دے بادشاہ ہدد عزر بن رحوب دی لٹ مار نوں مخصوص کیتا۔
13
. تے داودنے وڈا ناں پایا جدوں اوہ نمک دی وادی وچوں ارامیاں دے اٹھاراں ہزار بندے مار کے واپس آیا۔
14
. تے اوہنے ادوم وچ ناظم مقرر کیتے۔تے سارے ادوم چ چوکیاں قائم کیتیاں۔ تے سارے ادومی داود دے خادم بنے۔ تے داود جتھے وی گیا، خداوند نے اوہدی حفاظت کیتی۔
15
. تے داود نے سارے اسرائیل تے بادشاہی کیتی۔ تے داود اپنی ساری قوم نال انصاف تے عدالت نال پیش آیا ۔
16
. تے ضرویاہ دا پتر یواب لشکر دا سردار سی۔ تے اخیلود دا پتر یہوسفظ کاتب سی۔
17
. تے اخیطوب دا پترصدوق تے ابیاتر دا پتر اخیملک کاہن سن۔تے شرایاہ منشی سی۔
18
. تے یہویدع دا پتر بنایاہ کریتییاں تے فلتیاں دا سردار سی۔ تے داود دےپتر مشیر سن۔