¹ . ۔ تےایہدے بعد اینج ہویا پئی بنی عمون دا بادشاہ مر گیا تے اوہدا پتر حنون اوہدی تھاں تے بادشاہی کرن لگ پیا۔ ² . ۔ فیر داود نے کہیا پئی میں نا حس دے پتر حنون نال اونج ای مہربانی کراں گا جیویں اوہدے پیو نے میرے نال کیتی سی۔ تے داود نے اوہدے پیو بارے اوہنوں تسلی دین لئی اپنے خادم گھلا ئے۔ داود دے خادم بنی عمون دے دیس چہ اپڑ گئے۔ ³ . ۔ بنی عمون دے سردار اپنے مالک حنون نوں کہن لگے، پئی تیرا کیہ خیال اے داود نے تیرے پیو دی عزت چ تسلی دین والے گھلائے نیں؟ کیہ اوس اپنے خادم ایس ماریاں نیں گھلےپئی ایس شہر دا حال دریافت کرن ، تے ایہدی جسوسی کرن تے ایہنوں مار مکان۔ ⁴ . ۔ حنون نے داود دے خادماں نوں پھڑیا ۔ اوہناں دی ادھی داڑھی مُن دتی تے اوہناں دے لیڑے پٹھ تیک ر ادھ وچکاروں پھاڑ دتے تے اوہناں نوں واپس موڑ دتا۔ ⁵ . ۔ جدوں اوہناں نین داود نوں ایہہ خبر دتی، اوہنے اوہناں نوں جی آیاں نوں کہن لئی لوکی گھلے کیونجو اوہ بندے بڑے شرمندے سن۔ تے بادشاہ نے فرمایا، اپنیاں داڑیاں دے وڈے ہون تک تساں یریحو چ ای رہناایں۔ تے فیر آ جانا۔ ⁶ . ۔ جدوں بنی عمون نے ویکھیا پئی اوہ داود لئی نفرت جوگ ہو گئے نیں، بنی عمون نے لوکی گھلے تے بیت رحوب تے ضوباہ دے ارامیاں چوں ہزار سپاہی، معکہ دے بادشاہ نوں اک ہزار سپاہیاں نال ،تے طوب دے بارہ ہزار بندیاں نوں کرائے تےسدھیا۔ ⁷ . ۔ جدوں داود نوں ایہہ خبر ملی ، اوہنے یواب نوں تے بہادراں دے سارے لشکر نوں گھلیا۔ ⁸ . ۔ فیر بنی عمون نکلے تے اوہناں نیں پھاٹک دے کول ای لڑائی واسطے صف بندی کیتی۔ پر ضوباہ تے رحوب دے ارامی، تےطوب تے معکہ دے لوکی میدان چ ہور پاسے جا کھلوتے۔ ⁹ . ۔ جدوں یواب نے ویکھیا پئی اوہدے اگے تے پچھے دونواں پاسیوں لڑائی لئی صف بنی گئی اے۔ اوہنے بنی اسرائیل دے خاص لوکاں نوں چُن لیا تے ارامیاں دے خلاف صف بنی۔ ¹⁰ . ۔ باقی لوکاں نوں اوہنے اپنے بھرا ابیشے دے حوالے کر دتا، تے اوہنے بنی امون دے مقابلے چ اوہناں دے خلاف صف بندی کیتی۔ ¹¹ . ۔ یوآب نے آکھیا، جے ارامی میرے تے بھارے ہون لگن تے توں میری مدد نوں آ جائیں ۔تے جے بنی عمون تیرے تے بھارے ہون فیر میں تیری مدد نوں آ جاواں گا۔ ¹² . ۔ایس لئی توں حوصلہ رکھ تے اسیں سارے اپنی قوم تے اپنے خدا دے شہراں لئی لڑاں گے۔ تے جو خداوند نوں چنگا لگے اوہ کرے۔ ¹³ . ۔ فیر یوآب تے اوہدے لوکی جیہڑے اوہدے نال سن ارامیاں نال جنگ کرن لئی اگے ودھے۔ تے اوہ اگوں نس کھلوتے۔ ¹⁴ . ۔ جدوں بنی عمون نے ویکھیا پئی ارامی نس کھلوتے نیں تے اوہ وی ابیشے دے اگوں نس کے شہر چ جا وڑے۔ سو یوآب بنی عمون دے مقابلے توں مڑ کے یروشلم چ آگیا۔ ¹⁵ . ۔ جدوں ارامیاں نے ویکھیا پئی اوہ اسرایلیاں توں ہار گئے نیں تے اوہ سارے کٹھے ہوئے۔ ¹⁶ . ۔ تے ہدد عزر نے بندے گھلائے تے ارامیاں نوں جہیڑے دریاوں پار بیٹھے سن منگوایا ۔ اوہ حلام چ آئے تے ہدد عزر دی فوج دا سردار سوبک اوہناں دے اگے اگے ٹریا۔ ¹⁷ . ۔ جدوں داود نوں پتہ لگیا ،اوہنے سارے اسرائیل دے لوکاں نوں کٹھا کیتا تے یردن توں پار ہو کے حلام چ آئے۔ فیر ارامیاں نیں داود دے مقابلے چ صف بنی تے اوہناں نال لڑائی کیتی۔ ¹⁸ . ۔ ارامی اسرایئلیاں دے اگوں نس پئے تے داود نے ارامیاں دے ست سو رتھاں دے بندے تے چالی ہزار سوار قتل کر دتے۔ تے اوہناں دی فوج دے سرادار سوبک تے اجہیا وار کیتا پئی اوہ تھاں تے ای مر گیا۔ ¹⁹ . ۔ جدوں سارے بادشاہواں نے جہیڑے ہدد عزر دے خادم سن ویکھیا پئی اوہ اسرائیل توں ہار بیٹھے نیں، اوہناں نیں اسرائیل نال صلح کر لئی تے اہوناں دی خدمت کرن لگ پئے۔ اوہدے بعد ارامی بنی عمون دی فیر توں مدد کرن توں ڈردے سن۔