¹ ۔ تے یوشی یاہ نے یروشلیم وچ خدا وند لئی فصح کیتا ۔ تے اوہناں پہلے مہینے دی چودھویں دن فصح کوہیا ۔ ² ۔ تے اوہنے کاہناں نوں اوہناں دیاں خدمتاں تے مقرر کیتا۔ تے خدا وند دے گھر دی خدمت لئی اوہناں نوں نصیحت کیتی ۔ ³ ۔ تے اوہنے لاویاں نوں جیہڑے سارے اسرائیل نوں تعلیم دیندے سن تے جیہڑے خدا وند لئی متھے ہوئے سن ۔ آکھیا ۔ پئی مقدس صندوق نوں اوہدے گھر وچ رکھو جیہرا شاہ اسرائیل سلیمان بن دائود نے بنایا ۔ تے فیر تسیں اوہنوں موڈھیاں تے نہیں چکو گے ۔ تے ہن تسیں خدا وند اپنے خدا دی تے اوہدی قوم اسرائیل دی خدمت کرو ۔ ⁴ ۔ تے اپنے آبائی گھرانیاں دے مطابق تے واریاں دے جیہڑیاں شاہ اسرائیل دائود نے لائیاں تے جویں اوہدے پتر سلیمان نے لکھیا ۔ تسیں اپنے آپ نوں تیار کرو ۔ ⁵ ۔ تے تسیں قوم دیاں پتراں یعنی اپنے بھراواں دے آبائی گھرانیاں دیاں واریاں تے لاویاں دے آبائی گھرانیاں دی تقسیم دے مطابق مقدس وچ کھلوو۔ ⁶ ۔ تے فصح ذبح کرو ۔تے پاک ہوو۔ تے اوہنوں اپنے بھراواں لئی تیار کرو ۔ پئی جو کچھ خدا نے موسیٰ دی زبان توں فرمایا سی اوہدے مطابق کرن ۔ ⁷ ۔ تے یوشی یاہ نے لاکاں لئی براں تے ھلواناں دے اجڑ اوہناں ساریاں نوں جیہڑے موجود ن فصح کرن لئی دتے ۔ جیہڑے گنتری وچ تیہہ ہزار سن ۔ تے تن ہزار بلد سن ۔ ایہہ سارے بادشاہ دی ملکیت وچ سن ۔ ⁸ ۔ تے سرداراں نے وی خوشی نال لوکاں تے کاہناں تے لاویاں لئی دتے ۔ تاں خدا دے گھر دے سرداراں حلقی یاہ تے زکریا تے یحی ایل نے کاہناں نوں فصح لئی دو ہزار چھ سو بھیڈاں بکریاں تے تن سو گاواں بلد دتے ۔ ⁹ ۔ تے کنن یاہ تے شمع یاہ تے نتن ایل اوہدے بھرا تے حسب یاہ تے یعی ایل تے یوزا باد لاویاں دے رئیساں نے لاویاں نوں فصح لئی پنج ہزار بھڈاں بکریاں تے پنج سو گاواں بلد دتے ۔ ¹⁰ ۔ تاں عبادت دا سامان تیار ہویا ۔ تے بادشاہ دے حکم مطابق کاہن اپنی تھانواں تے لاوی اپنی واریاں تے کھلوتے ۔ ¹¹ ۔ تے اوہناں فصح کوہیا ۔ تے کاہناں نے اوہناں دے ہتھاں وچوں خون لے کے ترونکیا ۔ تے لاوی کھل لاہندے سن ۔ ¹² ۔ تے اوہناں سوختنی قربانی وکھری کیتی ۔ تاں جو قوم دیاں پتراں نوں اوہناں دے آبائی گھرانیاں دے مطابق تقسیم کرن پئی خدا وند دے حضور چڑھاون جیویں کہ موسیٰ دی کتاب وچ لکھیا اے۔ ¹³ ۔ اوہناں دستور دے مطابق فصح نوں اگ وچ بھنیا ۔ پر پاک نذراں نوں دیگاں تے ہانڈیاں تے کڑاہیاں وچ پکایا ۔ تے چھیتی نال لوکائی نوں ونڈ چھڈیا ۔ ¹⁴ ۔ اوہدے مگرو اوہناں نے اپنے لئی تے کاہناں لئی تیار کیتا ۔ کیوں جو کاہن یعنی بنی ہارون سوختنی قربانیاں تے چربی چڑھاون وچ رات تیکر مصروف رہے تاں لادیاں نے اپنے لئی تے کاہناں یعنی بنی ہارون لئی تیار کیتا ۔ ¹⁵ ۔ تے گاون آلے بنی آساف ۔ دائود تے بادشاہ دے رویا بیناں آساف تے ہیمان تے یدو تون دے حکم دے مطابق اپنی تھانوں تے کھلوتے تے دربان ہر اک بوہے تے اپنی سیوا توں غیر حاضر نہیں سن ہوندے ۔ ایس لئی اوہناں دے بھراواں لاویاں نے اوہناں لئی تیار کیتا ۔ ¹⁶ ۔ تے یوشی یاہ بادشاہ دے حکم مطابق فصح کرن لئی تے خدا وند دے مذبح تے سوختنی قربانیاں چڑھاون لئی خدا وند دی ساری خدمت دی تیاری ہوئی ۔ ¹⁷ ۔ تے بنی اسرائیل وچوں ہر اک جیہڑا موجود سی اُس ویلے عید فصح تے ست دناں تیکر عید فطیر کیتی ۔ ¹⁸ ۔ تے سموئیل نبی دے دناں توں اسرائیل وچ اجہی فصح نہیں ہوئی سی ۔ تے نہ اسرائیل دے سارے بادشاہواں نے اجہی فصح کدی کیتی جیہو جہی یوشی یاہ تے کاہناں تے لاویاں تے سارے یہودہ نے تے اسرائیل وچوں ہر اک نے جیہڑا موجود سی تے یروشلیم واسیاں نے کیتی ۔ ¹⁹ ۔ شاہ یوشی یاہ دی بادشاہی دے اٹھارویں ورھے وچ ایہہ فصح کیتی گئی ۔ ²⁰ ۔ ایس سارے کچھ دے مگروں جدوں یوشی یاہ ہیکل نوں تیار کر چکیا ۔ مصر دے بادشاہ نکو نے حملہ کر دتا ۔ تاں جو کر کمیس وچ جیہڑا فرات دے کول اے لڑائی کرے ۔ تد یوشی یاہ اوہدے مقابل وچ نکلیا ۔ ²¹ ۔ تاں اوہنے اوہدے کول ایلچی گھل کے آکھیا ۔ پئی اے یہودہ ! مینوں تے تینوں کیہ ؟ میں اج تیرے خلاف نہیں آیا پر اُس گھر دے خلاف آیا ہاں جہدے نال میری لڑائی اے ۔ کیوں جو خدا نے مینوں چھیتی کرن دا حکم دتا اے ۔ ایس لئی توں خدا دا جو میرے نال اے مقابلہ کرنا چھڈ دے ۔ تاں جو اوہ تینوں ہلاک نہ کرے ۔ ²² ۔ پر یوشی یاہ نے اوہدے کولوں اپنا منہ نہ موڑیا سگوں اوہدے نال لڑن لئی تیار ہویا ۔ تے نکو دیاں گلاں نوں جیہڑیاں خدا دے منہ توں سن ، نہ سنیا تے وادی مجدو وچ جنگ کرن لئی آیا ۔ ²³ ۔ تد تیر اندازاں نے یوشی یاہ بادشاہ ول تیر چلائے ۔ تاں بادشاہ نے اپنے نوکراں نوں آکھیا ۔ پئی مینوں باہر لے جائو کیوں جو میں ڈاہڈا پھٹر ہو گیا ہاں ۔ ²⁴ ۔ تاں اوہدے نوکراں نے اوہنوں گڈی توں لاہ کے دوجی گڈی وچ پایا جیہڑی اوہدی سی ۔ تے اوہنوں یروشلیم نوں لیائے تے اوہ مر گیا ۔ تے اپنے پیو دادے دے مزاراں وچ دبیا گیا ۔ تے سارے یہودہ تے یروشلیم نے یوشی یاہ دا ماتم کیتا ۔ ²⁵ ۔ تے ارمیا نے یوشی یاہ تے مرثیہ آکھیا ۔ تے سارے گاون آلے تے گاون آلیاں اج دے دن تیکر یوشی یاہ تے اپنے مرثیاں راہیں ماتم کردے نیں تے ویکھو ۔ اوہ مرثیاں وچ لکھے گئے نیں ۔ ²⁶ ۔ تے یوشی یاہ دا باقی حال تے اوہدے نیک کم اوہدے مطابق جیہدا خدا وند دی شریعت وچ حکم دتا گیا اے ۔ ²⁷ ۔ تے اوہدا پہلا تے پچھلا حال اسرائیل تے یہودہ دے بادشاہواں دی کتاب وچ لکھیا ہویا اے ۔ ²⁶ ۔ تے یوشی یاہ دا باقی حال تے اوہدے نیک کم اوہدے مطابق جیہدا خدا وند دی شریعت وچ حکم دتا گیا اے ۔ ²⁷ ۔ تے اوہدا پہلا تے پچھلا حال اسرائیل تے یہودہ دے بادشاہواں دی کتاب وچ لکھیا ہویا اے ۔