¹ ۔ جدوں منسے بادشاہ بنیا ۔ اوہدی عمر بارہ ورھے سی ۔ تے اوہنے یروشلیم وچ پچونجا ورھے بادشاہی کیتی ۔ ² ۔ اوہنے خدا وند دی نظراں وچ شرارت کیتی اوہناں قوماں دی مکروہات مطابق جنہاں نوں خدا وند نے بنی اسرائیل دے ساہمنویں کڈھ دتا سی ۔ ³ ۔ تے اوہنے اوہناں اچیاں تھانواں نوں جنہاں نوں اوہدے پیو حزقی یاہ نے ڈھا چھڈیا سی فیر بنایا ۔ تے نعلیم لئی مذبحے بنائے ۔ تے کھمبے لائے تے سارے اسمانی لشکر نوں سجدہ کیتا تے اوہدی پرستش کیتی ۔ ⁴ ۔ تے اوہنے خدا وند دے گھر وچ جہدی بابت خدا وند نے آکھیا سی پئی یروشلیم وچ میرا ناں ابد تیکر ہووے گا ۔ ⁵ ۔ تے اوہدے خدا وند دے دو گھراں دے ویہڑیاں وچ اسمان دے سارے لشکر لئی مذبحے بنائے ۔ ⁶ ۔ تے وادی بن ہنوم وچ اپنے پتر نوں اگ دی وچوں ٹروایا ۔ تے ساعتاں نوں منیا تے فال کڈھی تے جادو کیتا ۔ تے جادوگراں تے فسوں گراں کولوں خدمت لتی ۔ تے اوہنے خدا وند دی نظر وچ اوہنوں غصہ دوان لئی شرات دے بہتے کم کیتے ۔ ⁷ ۔ تے اوہنے اک گھڑی ہوئی مورت جیہڑی اوہنے بنائی خدا دے گھر وچ رکھی ۔ جہدی بابت خدا نے دائود تے اوہدے پتر سلیمان نوں فرمایا سی ۔ پئی ایس گھر وچ تے یروشلیم وچ جہنوں میں اسرائیل دے سارے قبیلیاں وچوں چن لتا ۔ میں اپنا ناں ابد تیکر رکھاں گا ۔ ⁸ ۔ تے میں اسرائیل دے قدم نوں اُس ملک توں ہٹن نہیں دیاں گا ۔ جیہڑا میں اوہناں دے پیو دادے لئی ٹھہرایا ۔ بشریطیکہ اوہ میرے سارے حکماں نوں جیہڑے میں موسیٰ دی زبانی دتے سن ۔ ساری شریعت تے فرضاں تے قانوناں نوں منن تے اوہناں تے عمل کرن ۔ ⁹ ۔ تے منسے نے یہودہ تے یروشلیم واسیاں نوں کراہے پایا ۔ تاں اوہناں نے ان قوماں دی شرارت توں جنہاں نوں خدا وند نے بنی ارائیل دے ساہمنیوں مٹا دتا ، برے کم کیتے ۔ ¹⁰ ۔ تے خدا وند نے منسے تے اوہدے لوکاں نال کلام کیتا ۔ پر اوہناں نہ سنیا ۔ ¹¹ ۔ تد خدا وند نے اوہناں تے شاہ اشور دے لشکر دے سپہ سالاراں نوں لیایا ۔ اوہناں منسے نوں سنگلاں نال جکڑیا تے بیڑیاں پا کے بابل نوں لے گئے ۔ ¹² ۔ جدوں اوہنوں دکھ ہویا اوہنے خدا وند دے منہ نوں ڈھونڈیا ۔ تے اپنے پیو دادے دے خدا دے اگے بڑی عاجزی کیتی ۔ ¹³ ۔ تے اوہنے دعا منگی ۔ تے اوہدی دعا قبول ہوئی ۔ تے اوہدی زاری سنی گئی تے اوہنوں یروشلیم وچ اوہدہ بادشاہی وچ فیر لیایا ۔ تد منسے نے جانیا ۔ پئی خدا وند ای خدا اے ۔ ¹⁴ ۔ اوہدے مگروں اوہنے دائود دے شہر دے باہر جیحون دے لہندے دی ترائی وچ مچھی پھاٹک دے دروازے تیکر اک کندھ بنائی ۔ تے عوفل نوں کندھ نال گھیریا ۔ تے اوہنوں بہت اُچا کیتا ۔ تے یہودہ دے سارے حصین شہراں وچ لشکر دے سردار مقرر کیتے ۔ ¹⁵ ۔ تے اوہنے اوپرے معبودان نوں تے اُس بت نوں جیہڑا خدا وند دے گھر وچ سی تے سارے مذبحیاں نوں جیہڑے اوہنے خدا وند دے گھر دے پہاڑ وچ تے یروشلیم دے وچ بنائے سن دفع کیتا ۔ تے ساریاں نوں شہر دے باہر سٹوایا ۔ ¹⁶ ۔ تے اوہنے خدا وند دے مذبحے دی مرمت کیتی تے اوہدی اُتے سلامتی تے شکر گزاری دے ذبیحے چڑھائے ۔ تے یہودہ نوں حکم دتا کہ خدا وند اسرائیل دے خدا دی عبادت کرن ۔ ¹⁷ ۔ تاں ووی لوک اُچی تھاں تے قربانی چڑھاندے رہے ۔ پر خالی خدا وند اپنے خدا لئی ۔ ¹⁸ ۔ تے منسے دا باقی دا حال تے خدا وند کولوں اوہدی دعا تے رویا بیناں دا کلام جیہڑا اوہناں نے خدا وند اسرائیل دے خدا دے ناں نال اوہنوں آکھیا ۔ اوہ اسرائیل دے بادشاہواں دی تاریخ وچ اے ۔. ¹⁹ ۔ تے اوہدی دعا تے اوہدا قبول ہونا تے اوہدیاں ساریاں بھلاں تے اوہدی بے ایمانی تے اوہ تھانواں جتھے اوہنے اچیاں تھانواں اساریاں تے کھمبے تے تھم لائے ۔ ایس توں پہلوں کہ اوہنے عاجزی کیتی حوزائی دی تاریخ وچ لکھیاں ہویاں نیں ۔ ²⁰ ۔ تے منسے اپنے پیو دادے دے نال سوں گیا ۔ تے اپنے گھر وچ دفن کیتا گیا ۔ تے اوہدا پتر آمون اوہدی تھاں بادشاہ بنیا ۔ ²¹ ۔ تے جس ویلے آمون بادشاہ بنیا ۔اوہ باوی ورھے دی عمر دا سی ۔ تے اوہنے یروشلیم وچ دو ورھے بادشاہی کیتی ۔ ²² ۔ تے اوہنے خدا وند دی نظر وچ برائی کیتی ۔ جیویں کہ اوہدے پیو منسے نے کیتی سی ۔ تے آمون نے ساریاں گھڑیاں ہویاں مورتیاں دے اگے جیہڑیاں اوہدے پیو منسے نے بنایاں سن قربانیاں چڑھائیاں ۔ تے اوہناں دی پرستش کیتی ۔ ²³ ۔ تے اوہنے خدا وند دے سامنے عاجزی نہ کیتی ۔جیویں کہ اوہدے پیو منسے نے کیتی سی ۔ سگوں آمون نے برائی تے برائی کیتی ۔ ²⁴ ۔ تد اوہدے خادماں نے اوہدے خلاف سازش کیتی ۔ تے اوہدے گھر دے اندر اوہنوں قتل کیتا ۔ تے دیس دے لاکوں نے اوہدے پتر یوشی یاہ نوں اوہدی تھاں بادشاہ بنایا ۔ ²⁵ ۔ تد دیس دیاں لوکاں نے اوہناں ساریاں نوں جنہاں آمون بادشاہ دے خلاف سازش کیتی سی قتل کیتا ۔ تے دیس دے لوکاں نے اوہدے پتر یوشی یاہ نوں اوہدی تھاں بادشاہ بنایا۔