¹ . ایہناں ہونیاں تے اس دینداری مگروں شاہ اشور سخیرب آیا . تے یہودہ وچ داخل ہویا . تے حصین شہراں دے سامنے ڈیرا لایا . تے اوہناں نوں فتح کرنا چاہیا ² . جدوں حزقی یاہ نے ویکھیا ۔ پئی سنحیرب یروشلیم دے خلاف لڑائی کرن دا ارادہ کر کے چڑھ آیا اے ³ . تاں اوہنے اپنے سرداروں تے بھادروں نال صلاح کیتی . پئی پانی دے سومیاں نوں جیہڑے شہر توں باہر سن بند کردیوے . تاں اوہناں نے اتفاق کیتا ⁴ . تے چوکھےلوکاں نے کٹھے ہوکے سارے سومیاں نوں تے ندی نوں جیہڑی دیس دے وچ وگدی سی بند کر دتا تے آکھیا ۔ پئی اشور دے بادشاہ کاہدے لئی آ کے بہت سارا پانی پئین ⁵ . پھر اوہنے ہمت کیتی تے ساری کندھ جتھوں ڈگی ہوئی سی بنائی تے برجا ں سنے اوہنوں پکا کیتا . تے اک دوجی کندھ باہر ول بنائی. تے داؤد دے شہر ملو نوں پکا کیتا . تے سب قسم دے ہتھیار تے ڈھا لاں بہت زیادہ بنوائیں ⁶ . تے اوہنے لوکاں تے جنگی سردار مقرر کیتے . تے اوہناں نوں شہر دے پھاٹک کول کھلی تھاں تے کٹھا کیتا . تے اوہناں دے دلاں نوں تسلی دے کے آکھیا ⁷ . ہمت بنھو۔ تے دلیری کرو۔ تے اشور دے بادشاہ دے ساہمنے تے اوہنے سارے لشکر دے سامنے جیہڑا اوہدے نال اے نہ ڈرو نہ گھبرائو ۔ کیوں جو جیہڑے ساڈے نال نیں اوہناں نالوں جیہڑے اوہناں نال نیں زیادہ نیں ⁸ . اوہدے نال بندے دا ہتھ اے۔ تے ساڈے نال خدا وند ساڈا خدا اے ۔ پئی ساڈی مدد کرے . تے ساڈیاں لڑائیاں لڑے۔ تد شاہ یہودہ حزقی یاہ دے کلام نال لوکاں نوں بہادری ملی ⁹ . ایہدے مگروں شاہ اشور سخیرب نے جیہڑا اپنے سارے لشکر دے نال لاکیش دے ساہمنے آیا سی۔ نوکراں نوں یروشلم وچ شاہ یہو دہ حرقی یاہ دے کول تے سارے یہودہ دے کول گھلیا جو یروشلم وچ سن تے آکھیا ¹⁰ . پئی اشور دا بادشاہ سنحیرب اینج آکھدا اے . پئی تسیں کس تے بھروسہ کردے او تے یروشلیم وچ اوہدے گھیرے دے ویلے بیٹھے او؟ ¹¹ ۔ کیہ حزقی یاہ نے تہانوں بھکھ تے تیہہ دی موت دے حوالے کرن لئی انج آکھ کے بہکایا نہیں پئی خدا وند ساڈا خدا سانوں اشور دے بادشاہ دے ہتھوں چھڑائے گا ¹² ۔ کیہ ایہہ حزقی یاہ اوہی نہیں ؟ جنے اوہدیاں اچیاں تھانواں تے مزبحے دور کر دتے نیں تے ساری یہودہ تے یروشلیم نال کلام کر کے آکھیا پئی اکو مزبحے دے ساہمنے تسیں سجدہ کرو تے اوہدے اتے خشبوئیاں ساڑو ¹³ ۔ کیہ تسیں نہیں جاندے پئی میں تے میرے پیو دادے نے دیساں دیاں ساریاں قوماں نال کیہ کیتا اے ؟ کیہ اوہناں دیساں دے معبوداں دی طاقت ہوئی پئی اپنی دھرتی نوں میرے ہتھوں چھڑا لین ؟ ¹⁴ ۔ جنہاں قوماں نوں میرے پیو دادے نے اُکا ہلاک کیتا . اوہناں دیاں ساریاں معبوداں وچوں کیہ کسے دی طاقت ہوئی . پئی اپنے لوکاں نوں میرے ہتھوں چھڑوائے ۔ کہ تہاڈا معبود وی تہانوں میرے ہتھوں چھڑوا سکے گا۔ ¹⁵ ۔ ایس لئی حزقی یاہ تہانوں دھوکہ نہ دیوے ۔ تے تسیں اوہدا فریب نہ کھائو ۔ تے اوہدی گل نوں سچ نہ منو ۔ کیوں جو کسے قوم یا معبود دی طاقت نہ ہوئی ۔ کہ اپنے لوکاں نوں میرے ہتھوں تے میرے پیو دادے ہتھوں چھڑوائے گا ۔ ¹⁶ ۔ تے اوہدے نوکراں نے خدا وند دے خلاف تے اوہدے بندے حزقی یاہ دے خلاف اس توں ودھ گلاں کیتیاں ۔ ¹⁷ ۔ اوہنے خدا وند اسرائیل دے خدا دی توہین کرن لئی تے اوہدے حق وچ کفر بکن واسطے اس مضمون دیاں چٹھیاں وی لکھیاں پئی جیویں دیساں دیاں قوماں دے معبوداں نے اپنے لوکاں نوں میرے ہتھوں نہ چھڑایا۔ تاں حزقی یاہ دا معبود وی اپنے لوکاں نوں میرے ہتھوں نہیں چھڑائے گا ۔ ¹⁸ ۔ تے اوہ یروشلیم دے لوکاں ول جیہڑے کندھ تے سن یہودی زبان وچ زور نال چیکے ۔ تاں جو اوہناں نوں ڈراون ۔ تے بے چین کرن ۔ تاں جو شہر نوں لے لین ۔ ¹⁹ ۔ تے اوہناں نے یروشلیم دے خدا دے خلاف اجیہاں گلاں آکھیاں جیویں دیاں اوہناں نے دیس دے لوکاں دے اوہناں معبوداں خلاف آکھیاں سن جیہڑے بندیاں دے ہتھ دی کاری گری سن ۔ ²⁰ ۔ تد حزقی یاہ بادشاہ تے اشعیا بن آموص نبی نے اُس دے لئی دعا منگی ۔ تے اسمان ول چیکے ۔ ²¹ ۔ تاں خدا وند نے اک فرشتے نوں گھلیا ۔ تے اوہنے شاہ اشور دی لشکر گاہ وچوں سارے بہادر مرداں پیشواواں تے سرداراں نوں ہلاک کیتا ۔ تد اوہ کچا ہو کے اپنے دیس نوں مڑ گیا ۔ تے جدوں اوہ اپنے معبود دے گھر وچ وڑیا ۔ تاں اوہناں نے جیہڑے اوہدی صلب وچوں نکلے سن اوہنوں تلوار نال قتل کیتا ۔ ²² ۔ تے خدا وند نے حزقی یاہ تے یروشلیم واسیاں نوں اشور دے بادشاہ سخیرب دے ہتھوں تے ساریاں دے ہتھوں خلاصی تے ہر اک پاسیوں اوہناں نوں امن بخشیا ۔ ²³ ۔ تے چوکھے لوک یروشلیم وچ خدا وند لئی نذراں تے شاہ یہودہ حزقی شاہ لئی قیمتی تحفے لیائے ۔ تے اوہدے مگروں اوہ ساریاں قوماں دیاں اکھاں وچ بزرگ ہو گیا ۔ ²⁴ ۔ تے اوہناں دناں وچ حزقی یاہ بمار ہویا ایتھے تیک کہ موت تیکر پہنچیا تاں اوہنے خدا وند توں دعا منگی ۔ تد اوہنے اوہدی سنی ۔ تے اوہنوں اک نشان دتا ۔ ²⁵ ۔ پر حزقی یاہ نے اوہناں احساناں مطابق جیہڑے اوہدے تے کیتے گئے ، شکر نہ کیتا ۔ سگوں اوہدے دل وچ گھمنڈ آ گیا ۔ تاں اسے کارن اوس اتے تے یہودہ اتے یروشلیم تے قہر ہویا ۔ ²⁶ ۔ فیر حزقی یاہ نے اپنے دل دے گھمنڈ نوں بدلیا تے یروشلیم واسیاں نے وی عاجزی کیتی ۔ تاں حزقی یاہ دے دناں وچ خدا وند دا قہر اوہناں تے نہ لتھا ۔ ²⁷ ۔ تے حزقی یاہ دی دولت تے شان بہت سی ۔ اوہنے چاندی تے سونے تے قیمتی پتھراں تے خوشبواں تے ڈھالاں تے سارے ودھیا بھانڈیاں لئی خزانے بنوائے ۔ ²⁸ ۔ تے اناج تے تیل تے مے لئی گودام تے زیادہ ڈنگراں لئی اصطبل تے بھیڈا ں بکریاں لئی واڑے بنوائے ۔ ²⁹ ۔ تے اوہنے بھیڈاں بکریاں تے گاواں بلداں لئی اجڑ ودھائے ۔ کیوں جو خدا وند نے اوہنوں بہت وڈی جائیداد دتی ۔ ³⁰ ۔ تے حزقی یاہ نے ای جیحون دے پانی دے اُتے منبعے نوں بند کیتا ۔ تے دائود دے شہر دے لہندے ول اوہنوں چلایا ۔ تے حزقی یاہ اپنے ساریاں کماں وچ کامیاب ہویا ۔ ³¹ ۔ پر بابل دے امیراں دے قاصداں بارے جیہڑے اوہدے کول گھلے گئے ۔ تاں جو اُس نشان بارے جیہڑا اُس دیس وچ سی اُس کولوں پچھن ۔ خدا نے اوہدے امتحان لئی اوہنوں چھڈ دتا ۔ تاں جو جو کچھ وی اوہدے دل وچ سی اوہ سامنے آجائے ۔ ³² ۔ تے حزقی یاہ دا باقی حال تے اوہدے نیک کم اشعیا بن آموص نبی دی رویا وچ تے شاہان یہودہ تے اسرائیل دی کتاب وچ لکھے ہوئے نیں ۔ ³³ ۔ تے حزقی یاہ اپنے پیو دادا نال سوں گیا ۔ تے بنی دائود دی قبراں دی چڑھائی تے دفن کیتا گیا ۔ تے سارے یہودہ تے یروشلیم واسیاں نے اوہدی موت تے اوہدی تعظیم کیتی ۔ تے اوہدا پتر منسے اوہدی تھاں بادشاہ بنیا ۔