¹ ۔ فیرحزقی یاہ نے سارے اسرائیل تےیہودہ کول اکھوا گھلیا۔ تے افرائیم تے منسے نوں چھٹیاں لکھیاں۔ پئی یروشلم وچ خدا دے گھر نوں آئو ۔ کہ خدا وند اسرائیل دے خدا لئی فصح کرو ۔ ² ۔ تے بادشاہ نے ساریاں سرداراں تے باقی جماعت دے نال یروشلیم وچ صلاح کیتی کہ دوجے مہینے وچ فصح کرو۔ ³ ۔ کیوں جو اوہ متھے ہوئے ویلے تے اوہنوں نہیں کر سکے ۔ ایس لئی کاہناں وچوں اتنیاں نے اپنے آپ نوں پاک نہ کیتا کہ اوہ کافی ہوون ۔ تے نہ لوک یروشلیم وچ کٹھے ہوئے سن ۔ ⁴ ۔ تاں ایہہ گل بادشاہ دی نگاہ وچ تے ساری جماعت دی نظر وچ چنگی لگی ۔ ⁵ سو اوہناں نے حکم دتا ۔ کہ سارے اسرائیل وچ بیئر شابع توں لے کے دان تیکر منادی کیتی جاوے پئی اوہ خدا وند اسرائیل دے خدا دی فصح مناون لئی یروشلیم وچ آون کیوں جو چوکھے چر توں اوہناں نے شریعت دے مطابق فصح نہیں سی منائی۔ ⁶ ۔ سو ہرکارے بادشاہ دےہتھوں سرداراں توں چھٹیاں لے کے بادشاہ دے حکم مطابق سارے اسرائیل تے یہودہ ول روانہ ہوئے تے بولے ۔ اے بنی اسرائیل دے خدا وند ابراہیم تے اسحاق تے اسرائیل دے خدا ول رجوع کرو تاں اوہ تساں وچوں اوہناں باقی لوکاں ول جیہڑے اشور دے بادشاہواں دے ہتھوں بچ گئے نیں رجوع کرے گا۔ ⁷ ۔ تے تسیں اپنے پیو دادا تے اپنے بھراواں وانگ نہ ہووو ۔ جنہاں خدا وند اپنے پیو دادے دے خدا نال بے وفائی کیتی ۔ تے اوہنے اوہناں نوں ہلاکت دے ہتھ دتا ۔ جیویں کہ تسیں ویکھدے او۔ ⁸ ۔ تے ہن اپنے پیو دادے وانگ اپنیاں دھوناں نوں نہ اکڑائو سگوں خدا وند دے سامنے عاجز بنو تے اوہدے مقدس ول آئو جنہوں اوہنے ابد تیکر پاک کیتا اے ۔ تے خدا وند اپنے خدا دی عبادت کرو تاں جو اوہدے قہر دی تیزی تہاڈے کول دور ہو جاوے ۔ ⁹ ۔ کیوں جے تسیں خدا وند ول رجوع کرو گے تے تہاڈے بھرا تے تہاڈے پتر اپنے بندی وان بنان والیاں دی مہربانی پاون گے ۔ تے ایس زویں ول مڑ مڑ کے آون گے ۔ کیوں جو خدا وند تہاڈا خدا بڑا مہربان تے رحم کرن آلا اے ۔ تے جے تسیں اوہدے ول رجوع کرو گے تاں اوہ اپنا منہ تہاڈے ولوں نہیں موڑے گا ۔ ¹⁰ ۔ تے ڈاکیے افرائیم تے منسے دے دیس وچ شہروں شہر ہوندے ہوئے زبلون تیکر گئے تاں اوہ اوہناں تے ہسے تے اوہناں نال ٹھٹھہ کیتا ۔ ¹¹ ۔ پر آشیر تے منسے تے زبلون وچوں کئی اک نے عاجزی کیتی تے یروشلیم وچ آئے ۔ ¹² ۔ پر یہودہ دے درمیان خدا وند دا ہتھ سی تے اُس نے اوہناں نوں اک دلی بخشی ۔ تاں جو بادشاہ تے سرداراں دے حکم تے خدا وند دے کلام دے مطابق عمل کرن ۔ ¹³ ۔ ایس لئی یروشلیم وچ چوکھے لوک کٹھے ہوئے ۔ تاں جو دوجے مہینے عید فطیر کرن ۔ اوہ اک بہت وڈا کٹھ سی ۔ ¹⁴ ۔ تے اوہ اُٹھے تے سارے مذبحیاں نوں جیہڑے یروشلم وچ سن ڈھا دتا ۔ تے مشک ساڑن دے سارے بھانڈیاں نوں دور کیتا ۔ تے اوہناں وادی قدرون وچ سٹیا ۔ ¹⁵ ۔ تے دوجے مہینے دی چودھویں تاریخ نوں فصح کوہیا تے کاہناں تے لاویاں نے شرمندہ ہو کے اپنے آپ نوں پاک کیتا ۔ تے خدا وند دے گھر وچ سوختنی قربانیاں چاڑھیاں ۔ ¹⁶ ۔ تے اپنی ترتیب وچ مرد خدا موسیٰ دی شریعت موافق اپنی اپنی تھانواں تے کھلوتے تے کاہن لاویاں دے ہتھوں خون لے کے ترونکدے سن ۔ ¹⁷ ۔ کیوں جو جماعت وچ چوکھے سن جنہاں نے اپنے آپ نوں پاک نہ کیتا ۔ ایس لئی لاوی ہر اک لئی جیہڑا ناپاک ہوون کارن خدا وند لئی قربانی نہ چڑھا سکیا فصح کوہن وچ لگیا ہویا سی ۔ تاں جو اوہ خدا وند لئی مخصوص ہوون ۔ ¹⁸ ۔ تے لوکاں وچوں اک وڈا کٹھ افرائیم تے منسے تے یساکر تے زبلون وچوں پاک نہیں سی ۔ فیر وی اوہناں لکھے ہوئے دے خلاف فصح کھا لتی ۔ تاں اوہناں لئی حزقی یاہ نے دعا منگی تے آکھیا ۔ ¹⁹ ۔ خدا وند جیہڑا نیک اے ہر اک نوں معاف کرے ۔ جس نے خدا وند اپنے پیو دادا دے خدا دے لبھن لئی اپنا دل لایا۔ بھانویں مقدس دی پاکیزگی دے مطابق پاک نہ ہووے ۔ ²⁰ ۔ تے خدا وند نے حزقی یاہ دی سنی تے لوکاں نوں معاف کیتا ۔ ²¹ ۔ سو بنی اسرائیل نے جیہڑے یروشلم وچ سن ۔ ست دناں تیکر بڑی خوشی نال عید فطیر منائی تے کاہن تے لاوی دنو دنی حمد دے سازاں نال خدا وند دی تعریف کردے سن ۔ ²² ۔ تے حزقی یاہ نے ساریاں لاویاں توں جنہاں نوں خدا وند دی بابت نیک سمجھ سی دل نوں چنگیاں لگن آلیاں گلاں کیتیاں ۔ تے اوہ عید دے ستویں دن تیکر کھاندے تے سلامتی دے ذبیحے کوہندے تے خدا وند اپنے پیو دادے دے خدا دی حمد کردے رہے ۔ ²³ ۔ فیر ساری جماعت نے صلاح کیتی پئی ہور ست دن عید منائیے ۔ تاں ہور ست دن اوہ خوشی نال منادے رہے ۔ ²⁴ ۔ کیوں جو شاہ یہودہ حزقی یاہ نے جماعت لئی اک ہزار بلد تے ست ہزار بھیڈاں دتیاں تے سرداراں نے جماعت لئی اک ہزار بلد تے دس ہزار بھیڈاں دتیاں ۔ تے بہت سارے کاہناں نے اپنے آپ نوں پاک کیتا۔ ²⁵ ۔ تے یہودہ دی ساری جماعت سنے کاہناں تے لاویاں دے تے باقی جماعت جیہڑی اسرائیل وچوں آئی سی ۔ تے پردیسی وی جیہڑے اسرائیل دے دیس توں آئے ہوئے سن تے اوہ وی جیہڑے یہودہ وچ رہندے سن خوشی نال بھرے ہوئے سن ۔ ²⁶ ۔ سو یروشلیم وچ بہت وڈی خوشی ہوئی ۔ پئی شاہ اسرائیل سلیمان بن دائود دے دناں توں یروشلیم وچ اُس وانگ نہیں سی ہوئی ۔ ²⁷ ۔ پھر کاہن بنی لاوی اُٹھے ۔ تے اوہناں نے لوکاں نوں برکت دتی ۔ تاں اوہناں دی اواز سنی گئی تے اوہناں دی دعا اسمان وچ اوہدے مقدس ٹھکانے تیکر اُتے پہنچی ۔