¹ ۔ جدوں حزقی یاہ بادشاہ بنیا ۔ اوہدی عمر پنجھی ورہے سی ۔ تے اوہنے یروشلیم وچ انتی ورھے بادشاہی کیتی ۔ تے اوہدی ماں دا ناں اب یاہ سی ۔ جیہڑی زکریاہ دی دھی سی ۔ ² ۔ تے اوہنے جو کچھ خدا وند دی نظر وچ ٹھیک ہے اوہی کیتا ۔ سب جو کچھ اُس طرح جیویں اوہدے پیو دائود نے کیتا سی ۔ ³ ۔ اوہنے اپنی بادشاہی دے پہلے ورھے دے پہلے مہینے وچ خدا دے گھر دے بوہیاں نوں کھولیا ۔ تے اوہناں دی مرمت کیتی ۔ ⁴ ۔ تے اوہ کاہناں تے لاویاں نوں اندر لیایا ۔ تے اوہناں نوں چڑھدے دے کھلی تھاں تے کٹھا کیتا ⁵ ۔ تے اوہناں نوں آکھیا ۔ اے لاویو ! میری سنو ۔ ہن تسیں اپنے آپ نوں پاک کرو ۔ تے خدا وند اپنے پیو دادے دے خدا دے گھر نوں پاک کرو ۔ تے مقدس توں سارا گند باہر کڈھ دیو ۔ ⁶ ۔ کیوں جو ساڈے پیو دادا نے بے وفائی کیتی ۔ تے خدا وند ساڈے خدا دی نگاہ وچ شرارت کیتی ۔ تے اوہنوں چھڈ دتا ۔ تے اپنے منہ خدا وند دے ٹھکانے ولوں پھیر لتے ۔ تے اپنی کنڈ موڑی ۔ ⁷ ۔ تے برانڈے دے دروازیاں نوں بند کیتا ۔ تے چراغاں نوں بجھایا ۔ تے بخور نہ جلایا ۔ تے اسرائیل دے خدا لئی مقدس وچ سوختنی قربانی نہ چاڑھی ۔ ⁸ ۔ ایس کارن خدا وند دا قہر یہودہ تے یروشلیم تے پیا ۔ تے اوہنے اوہنوں مصیبت تے دہشت تے حیرانی حوالے کیتا ۔ جیویں کہ تسیں اپنی اکھاں نال ویکھدے او۔ ⁹ ۔ تے ویکھو اسے کارن ساڈے پیو دادا تلوار نال ڈھے گئے ۔ تے ساڈے پتر تے ساڈیاں دھیاں تے ساڈیاں زنانیاں بندی وان بنائیاں گیاں ۔ ¹⁰ ۔ تے ایس ویلے میرے دل وچ ہے ۔ پئی خدا وند اسرائیل دے خدا نال عہد بنھاں تاں جو اوہدا قہر ساڈے کولوں دور ہو جاوے ۔ ¹¹ ۔ اے میرے پترو ! ہن تسیں غافل نہ ہوو کیوں جو خدا نے تہانوں چن لتا اے ۔ تاں جو تسیں اوہدے سامنے کھلوو۔ اوہدی سیوا کرو ۔ اوہدی عبادت کرو ۔ تے اوہدے لئی مشکاں ساڑو ۔ ¹² ۔ تد لاوی اُٹھے بنی قہات توں مہت بن عماسائی تے یوئیل بن عزریاہ ۔ تے بنی مراری توں کیش بن عبدی تے عزریاہ بن یہلل ایل تے جیرشونیاں توں یو آح بن یمہ تے عادن بن یوآح ۔ ¹³ ۔ تے بنی الی صافان توں شمری تے یعی ایل تے بنی آساف توں زکریاہ تے متن یاہ ۔ ¹⁴ ۔ تے بنی ہیمان توں یحی ایل تے شمعی تے بنی یدو تون توں شمع یاہ تے عزی ایل ۔ ¹⁵ ۔ تے اوہناں اپنے بھراواں نوں کٹھا کیتا ۔ تے پاک ہوئے ۔ تے بادشاہ دے حکم تے خداوند دے کلام دے مطابق اندر گئے ۔ تاں جو خدا وند دے گھر نوں پاک کرن ۔ ¹⁶ ۔ تے کاہن خدا وند دے اندرلے حصے ول گئے تاں جو اوہنوں پاک کرن تے اوہ ساری گندگی جیہڑی اوہناں خدا وند دی ہیکل وچ ویکھی ۔ خدا ون دے گھر دے ویہڑے وچ لیائے تاں لاویاں نے اوہنوں لتا ۔ تاں جو اوہنوں چک کے باہر وادی قدرون چ لے جاون ۔ ¹⁷ ۔ تے پہلے مہینے دے پہلے دن اوہناں نے تقدیس دا کم شروع کیتا ۔ تے مہینے دن اٹھویں دن خدا وند دے برانڈے تیکر آئے ۔ تے اوہناں نے اٹھاں دناں وچ خدا وند دے گھر نوں پاک کیتا تے پہلے مہینے دے سولہویں دن اوہ کم توں ویہلے ہوئے ۔ ¹⁸ ۔ تد اوہ حزقی یاہ بادشاہ دے حضور پیش ہوئے تے آکھیا ۔ پئی اساں خدا وند دے سارے گھر نوں تے سوختی قربانی دے مذبح تے ساریاں بھانڈیاں تے نذر دی روٹیاں دے میز نوں سنے اوہدے سارے بھانڈیاں دے پاک کیتا اے ۔ ¹⁹ ۔ تے سارے بھانڈیاں نوں جنہاں نوں احاز بادشاہ نے اپنی بادشاہی وچ جدوں اوہ بے وفائی کردا سی ناپاک کیتا ۔ اساں اوہناں نوں سجایا تے پاک کردتا اے ۔ تے ویکھ اوہ خدا وند دے مذبح دے اگے نیں ۔ ²⁰ ۔ تد حزفی یاہ بادشاہ سویرے اٹھیا تے شہر دے رئیساں نوں کٹھا کیتا تے خدا وند دے گھر نوں گیا ۔ ²¹ ۔ تاں اوہ ست بلد تے ست بھیڈو تے ست برے تے ست بکرے شاہی گھرانے تے مقدس تے یہودہ دی بُھل دی قربانی لئی لیائے ۔ تاں اوہنے کاہناں بنی ہارون نوں حکم دتا ۔ پئی اوہ خدا وند دے مذبح تے چڑھائے جان ۔ ²² ۔ تد اوہناں بلداں نوں کوہیا ۔ تے کاہناں نے خون لے کے مذبح تے چھڑکیا۔ ²³ ۔ فیر اوہ بُھل دی قربانی دے بکریاں نوں بادشاہ تے جماعت دے اگے لیائے ۔ تے اوہناں اپنے ہتھ اوہناں تے رکھے ۔ ²⁴ ۔ کاہناں نے اوہناں نوں کوہیا ۔ تے مذبح نوں اوہناں دے خون نال پاک کیتا ۔ تاں جو سارے اسرائیل لئی کفارہ ہووے ۔ کیوں جو بادشاہ نے سارے اسرائیل لئی سوختنی قربانی دے خطا دے ذبیحے دا حکم دتا سی ۔ ²⁵ ۔ تے اوہنے دائود تے بادشاہ دے غیب بین جاد تے ناتان نبی دی رسم دے مطابق خدا دے گھر وچ لاویاں نوں جھانجراں ونجھلیاں تے بربطاں نال مقرر کیتا ۔ کیوں جو خدا وند نے اپنے نبیاں دی زبان توں حکم فرمایا سی ۔ ²⁶ ۔ تد لاوی دائود دے سازاں تے کاہن نرسنگیاں نال کھلوتے ۔ ²⁷ ۔ تے حزقی یاہ نے حکم دتا ۔ پئی مذبح تے سوختنی قربانی چاڑھی جاوے ۔ تے سوختنی قربانی دے شروع وچ خدا وند دا گیت نرسنگیاں تے شاہ اسرائیل دائود دے سازاں نال شروع ہویا ۔ ²⁸ ۔ تد ساری جماعت نے سجدہ کیتا ۔ تے گاون آلے گاندے رہے ۔ تے سارے نرسنگے وجان آلے وجاندے رہے ۔ جدوں تیکر کے سوختنی قربانی مُک نہ گئی ۔ ²⁹ ۔ تے جدوں اوہ سوختنی قربانی توں ویہلے ہوئے ۔ تاں بادشاہ تے سارے جیہڑے اوہدے نال سن زمین تے ڈگے ۔ تے سجدہ کیتا ۔ ³⁰ ۔ تے حزقی یاہ بادشاہ تے لاویاں نوں حکم دتا ۔ کہ دائود تے آساف رویابین دے کلام نال خدا وند دی حمد کرن ۔ تاں اوہناں کوشی نال حمد کیتی تے زمین تے ڈگے تے سجد ہ کیتا ۔ ³¹ ۔ تد حزقی یاہ نے تقریر کر کے آکھیا ۔ ایس ویلے تساں اپنے ہتھاں نوں خدا وند لئی پاک کیتا اے ۔ ایس لئی اگے جائو ۔ تے ذبحیے تے شُکر دیاں قربانیاں خدا وند دے گھر چاڑھو ۔ تد جماعت نے ذبیحے تے شُکر دیاں قربانیاں چاڑھیاں ۔ تے جنے کھلے دل دے سن اوہناں نے سوختی قربانیاں چڑھائیاں ۔ ³² ۔ تے سوختنی قربانیاں دی گنتری جیہڑیاں جماعت نے چاڑھیاں ایہہ سی ۔ ستر بلد تے سو میمنے تے دو سو برے ۔ ایہہ سارے خدا وند لئی سوختنی قربانی دے طور تے چاڑھے گئے ۔ ³³ ۔ تے پاک کیتیاں گیاں شیواں چھ سو بلد تے تن ہزار بھیڈاں سن ۔ ³⁴ ۔ پر کاہن تھوڑے سن ۔ تے اوہ ساریاں سوختی قربانیاں دی کھل نہ لاہ سکے ۔ تد اوہناں دے بھراواں لاویاں نے اوہناں دی مدد کیتی ۔ جدوں تیکر کہ کم نہ مکیا ۔ تے کاہناں نے اپنے آپ نوں پاک نہ کر لتا . کیوں جو لاوی اپنے آپ نوں پاک کرن وچ کاہناں دی نسبت زیادہ سدھے دل آلے سن ۔ ³⁵ ۔ تے سوختنی قربانی تے سلامتی دے ذبیحاں دی چربی تے سوختنی قربانیاں دے تپاون چوکھے سن سو خدا وند دے گھر دی خدمت فیر شروع کیتی گئی۔ ³⁶ تے حزقیاؔہ تے سارے لوک خوش ہوئے ایس لئی کہ خدا نے لوکاں لئی اوہنوں بحال کیتا ۔ کیوں جو ایہہ کم بڑا ای چھیتی کیتا گیا۔