¹ ۔ جس ویلے احاز بادشاہ بنیا ۔ اوہدی عمر ویہہ ورھے سی ۔ تے اوہنے یروشلیم وچ سولہ ورھے بادشاہی کیتی ۔ تے جو خدا وند دی نظر وچ ٹھیک اے اوہنے نہیں کیتا ۔ جویں کہ اوہد پیو داوئود کردا سی ۔ ² ۔ سگوں اوہ اسرائیل دے بادشاہواں دی راہ تے تُریا ۔ تے اوہنے بعلیم لئی ڈھالیاں ہویاں مورتیاں بنایاں ۔ ³ ۔ تے اوہنے بن ہنوم دی ترائی وچ مشکا ں ساڑیاں ۔ تے اپنے پتراں نوں اگ وچ ساڑیا ۔ اوہناں قوماں دی مکروہات وانگ جنہاں نوں خدا وند نے اسرائیل دے ساہمنیوں کڈھ دتا سی ۔ ⁴ ۔ تے اوہنے اچیاں تھانواں تے پہاڑاں اُتے تے ہر اک ساوے رکھ دے ہیٹھ قربانی کیتی تے مشکاں ساڑیاں ۔ ⁵ ۔ تد خدا وند اوہدے خدا نے اوہنوں ارامیاں دے بادشاہ دے ہتھ وچ دے دتا ۔ تاں اوہناں نے اوہنوں ماریا تے تے اوہناں وچوں اک وڈے اکٹھ نوں بندی وان بنایا ۔ تے اوہناں نوں دمشق وچ لیائے ۔ تے اوہ اسرائیل دے ہتھ وچ وی دے دتا ۔ جہاں نیں بڑا خون خرابہ کرکے اوہنوں دکھ دتا ۔ ⁶ ۔ تے فاقح بن رمل یاہ نے یہودہ وچوں اک ای دن اک لکھ ویہہ ہزار بہادر مرداں نوں قتل کیتا ۔ کیوں جو اوہناں نے خدا وند اپنے پیو دادا دے خدا نوں چھڈ دتا ۔ ⁷ ۔ تے افرائیم دے اک پہلوان زکری نے بادشاہ دے پتر معسے یاہ تے اوہدے محل دے مختار عزری قام نوں تے القانہ نوں جیہڑا رتبے وچ بادشاہ توں دوجا سی قتل کیا ۔ ⁸ ۔ تے بنی اسرائیل اپنے بھراواں وچوں دو لکھ زنانیاں پتراں تے دھیاں نوں بندی وان بنا کے لے گئے ۔ تے اوہناں دا بہت سارا سامان وی لٹ لتا ۔ تے اوہنوں غنیمت نوں لے کے سامرہ وچ آئے ۔ ⁹ ۔ تے اوتھے اک نبی سی جیہدا ناں عودید سی ۔ تے جدوں اوہ لشکر نوں ملن لئی سامرہ جا رہے سن تاں اوہ باہر نکلیا۔ تے اوہناں نوں آکھیا ۔ ویکھو پئی خدا وند تہاڈے پیو داداے دے خدا نے یہودہ توں نراض ہو کے اوہناں نوں تہاڈے ہتھ وچ دے دتا ۔ تے تساں اوہناں نوں اجہے ظلم نال قتل کیتا جیہڑا اسمان تے پہنچیا اے ۔ ¹⁰ ۔ تے ہن تسیں ارادہ کردے او۔ پئی بنی یہودہ تے یروشلیم نوں پست کر کے اوہناں نوں اپنا غلام تے لونڈیاں بنائو ۔ تاں کیہ خدا وند تہاڈے خدا دے ساہمنے ایہہ تہاڈا گناہ نہیں ہووے گا ۔ ¹¹ ۔ تاں ایس ویلے تسیں میری سنو تے ایہناں بندی واناں نوں جیہڑے تسیں اپنے بھراواں وچوں بندی وان بنا کے لیائے موڑ کے گھلو ۔ کیوں جو خدا وند دا قہر تہاڈے تے بھڑکن آلا اے ۔ ¹² ۔ تد افرائیم دے بعضے سردار یعنی عزریاہ بن یوحانان تے بارک یاہ بن مشلیموت تے یحزقی یاہ بن شلوم تے عماسا بن بدلائی اوہناں دے خلاف جیہڑے لڑائی توں آئے سن کھلوئے ۔ ¹³ ۔ تے اوہناں نوں آکھیا تسیں بندی واناں نوں ایتھے اندر نہ لیائو ۔ کیوں جو خدا وند دے ساہمنے ساڈے تے گناہ اے تے تسیں ارادہ کر دے او ۔ پئی ساڈیاں بھلاں تے ساڈے گناہواں نوں ودھائو ۔ کیوں جو ساڈا گناہ وڈا اے ۔ تے اسرائیل تے قہر بھڑکن آلا اے ۔ ¹⁴ ۔ تاں ساڈے ہتھیار بند لوکاں نے قیدیاں تے لٹ نوں ساریاں دے ساہمنے چھڈ دتا ۔ ¹⁵ ۔ تے اوہ بندے جنہاں دے نانواں دا ذکر ہویا اے ۔ اٹھے تے قیدیاں نوں لتا ۔ تے اوہناں دے وچ جیہڑے ننگے سن اوہناں نوں لٹ وچوں لیڑے پوائے ۔ تے اوہناں نوں سنواریا تے اوہناں نوں جتیاں پوائیاں۔ تے اوہناں نوں کھوایا تے اوہناں نوں پوایا ۔ تے اوہناں اُتے تیل ملیا ۔ تے اوہناں وچوں سارے کمزوراں نوں کھوتیاں تے بٹھایا ۔ تے اوہناں نوں اوہناں دے بھراواں دے کول کھجوراں دے شہر یریحو وچ لیائے ۔ تد اوہ سامرہ نوں مڑ کئے ۔ ¹⁶ ۔اوس ویلے احاز بادشاہ نے اشور دے بادشاہواں نوں اکھوا گھلیا پئی اوہدی مدد کرن ۔ ¹⁷ ۔ کیوں جو ادومی چڑھ آئے سن تے اوہناں نے یہودہ نوں ماریا تے بندی واناں نوں لے گئے ۔ ¹⁸ ۔ تے فلسطینی وی شفیلہ دے شہراں تے یہودہ دے نجیہ وچ کھنڈ گئے ۔ تے بیت شمس تے ایا لون تے جدیروت نوں تے سوکو تے اوہدے پنڈاں نوں لے لتا ۔ تے اوہناں وچ رہن لگ پئے ۔ ¹⁹ ۔ کیوں جو خدا وند نے شاہ یہودا آحاز دے کارن یہودہ نوں ہرایا ۔ ایس لئی کہ اُس نے یہودہ وچ بے حیائی کیتی تے خدا وند دے خلاف سخت وفائی کیتی ۔ ²⁰ ۔ تے اوہ اشور دے بادشاہ تجلت فل آسرا نوں اوہدے خلاف لیایا ۔ جہنے اوہنوں تنگ کیتا تے بناں کجہہ آکھیاں اوہنوں لٹیا ۔ ²¹ ۔ جدوں آحاز نے خدا وند دے گھر توں تے بادشاہ دے گھر توں تے سرداراں دا مال لے کے اشور دے بادشاہواں نوں دتا ۔ تاں وی اوہدے نال کوئی فیدہ نہ ہویا ۔ ²² ۔ تے اپنی تنگی ویلے آحاز بادشاہ نے خدا وند دے خلاف زیادہ بے وفائی کیتی ۔ ²³ ۔ تے اوہناں نے دمشق دے معبوداں دے اگے جنہاں اوہنوں ماریا قربانی چاڑھی ۔ تے آکھیا کہ کیوؐ جو ارام دے بادشاہواں دیاں معبوداں نے اوہناں دی مدد کیتی اے تاں میں اوہناں لئی قربانی کراں گا ۔ تاں جو اوہ میری مدد کرن ۔ پر اوہ اوہدی تے سارے اسرائیل دی بربادی دا کارن بنے ۔ ²⁴ ۔ تے آحاز نے خدا وند دے گھر دے بھانڈیاں نوں کٹھا کیتا ۔ تے اوہناں نوں تروڑیا تے خدا وند دے گھر دے دروازیاں نوں بند کیتا ۔ تے یروشلم وچ اپنے لئی ہر اک گٹھ وچ مزبح خانے بنائے ۔ ²⁵ ۔ تے اوہنے یہودہ دے ہر اک شہر وچ اپنیاں تھانواں بنوائیاں تاں جو اجنبی معبوداں لئی مشک ساڑی جاوے ۔ تے خدا وند اپنے پیو دادا دے خدا نوں غصہ دوایا ۔ ²⁶ ۔ تے اوہدا باقی حال تے اوہدے سارے اعمال پہلے تے پچھلے یہودہ تے اسرائیل دے بادشاہواں دی کتاب وچ لکھے ہوئے نیں ۔ ²⁷ ۔ تے آ حاز اپنے پیو داداے نال سوں گیا ۔ تے اوہناں نے اوہنوں یروشلیم وچ دائود دے شہر وچ دفن کیتا ۔ تے اوہنوں اسرائیل دے بادشاہ دے قبرستان دے اندر نہ لیائے ۔ تے اوہدا وڈا پتر حزقی یاہ اوہدی تھاں بادشاہ بنیا ۔