¹ ۔ جدوں یوتام بادشاہ بنیا ۔ اوہدی عمرپنجھی سال سی ۔ تے اوہنے یروشلیم وچ سولہ ورھے بادشاہی کیتی ۔ تے اوہدی ماں دا ناں یروشہ سی جیہڑی صادوق دی دھی سی ۔ ² ۔ تے اوہنے خدا وند دی نظر وچ جو ٹھیک سی کیتا ۔ اُس سارے وانگ جیہڑا اوہدے پیو عزی یاہ نے کیتا سی ۔ سوائے ایس دے کہ خدا وند دی ہیکل دے اندر نہ وڑیا ۔ تے لوک شرارت ای کردے رہے ۔ ³ ۔ تے اوہنے خدا وند دے گھر دا اُچا پھاٹک بنوایا تے عوفل دی کندھ تے بہت کچھ بنایا۔ ⁴ ۔ تے اوہنے یہودہ دے شہر پہاڑ تے بنوائے تے اوہنے جنگلاں وچ کوٹ (قلعے ) تے گنبد بنوائے ۔ ⁵ ۔ تے اوہنے بنی عمون دے بادشاہ نال لڑائی کیتی تے اوہدے اُتے غالب ہویا ۔ تاں اُس ورھے بنی عمون نے اوہنوں اک سو قنطار چاندی تے دس ہزار کُر کنک تے دس ہزار کُر جوں تے انج ای بنی عمون نے اوہنوں دوجے تے تیجے ورھے وی دتا ۔ ⁶ ۔ تے یوتام طاقت ور ہو گیا ۔ کیوں جو اوہنیں اپنیاں راہواں خدا وند اپنے خدا دے ساہمنے سدھیاں رکھیاں ۔ ⁷ ۔ تے یوتام دا باقی حال تے لڑائیاں تے اوہدے کم اسرائیل تے یہودہ دے بادشاہواں دی کتاب وچ لکھے ہوئے نیں ۔ ⁸ ۔ جدوں اوہ بادشاہ بنیا ۔ اوہدے عمر پنجھی ورہے سی ۔ تے اوہنے یروشلیم وچ سولہ ورھے بادشاہی کیتی ۔ ⁹ ۔ تے یوتام اپنے پیو دادا نال سوں گیا ۔ تے دائود دے شہر وچ دفن کیتا گیا ۔ تے اوہدا پتر احاز اوہدی تھاں بادشاہ بنیا ۔