¹ ۔ تے یہودہ دے ساریاں بندیاں نے عزی یاہ نوں جیہڑا سولہ ورھیاں دا سی ۔اوہدے پیو امص یاہ دی تھاں بادشاہ بنایا۔ ² ۔ اوہنے ایلت شہر بنایا ۔ تے اوہدے پچھوں پئی بادشاہ اپنے پیو دادا نال سوں گیا ۔ اوہنوں یہودہ لئی بحال کیتا ۔ ³ ۔ جدوں عزی یاہ بادشاہ بنیا ۔ اوہدی عمر سولہ ورھے سی ۔ تے اوہنے یروشلیم وچ بوّنجا ورھے بادشاہی کیتی ۔ تے اوہدی ماں دا ناں یکل یاہ سی جیہڑی یروشلیم دی سی ۔ ⁴ ۔ تے اوہنے جو کچھ خدا وند دی نظر وچ ٹھیک سی ۔ اوہی کیتا ۔ اُسے وانگ جیویں اوہدے پیو امص یاہ نے کیتا سی ۔ ⁵ ۔ تے اوہنے زکریاہ دے دناں وچ جیہڑا اوہنوں خدا دے خوف سکھاندا سی خدا نوں ڈھونڈا ۔ تے جنہاں دناں وچ اوہنے خدا نوں لبھیا خدا نے اوہنوں کامیاب کیتا ۔ ⁶ ۔ تے اوہنے نکل کے فلسطینیاں نال لڑائی کیتی تے جت دی کندھ نوں تے یبنہ دی کندھ نوں تے اشدود دی کندھ نوں ڈھادتا ۔ تے اشدود تے فلسطین دی زویں تے شہر وسائے ۔ ⁷ ۔ تے خدا نے فلسطیناں تے عربیاں دے خلاف جیہڑے جور بعل وچ رہندے سن ۔ تے معونیاں دے خلاف اوہدی مدد کیتی ۔ ⁸ ۔ تے عمونیاں نے عزی یاہ نوں خراج دتا ۔ تے اوہدا ناں مصر دے بوہے تیکر پہنچ گیا ۔ کیوں جو اوہ بہت طاقت ور ہویا ۔ ⁹ ۔ تے عزی یاہ نے یروشلیم وچ کونے دے پھاٹک تے کونے تے گنبد بنوائے ۔ تے اوہناں نوں پکا کیتا ۔ ¹⁰ ۔ تے اوہنے اجاڑ وچ وی گنبد بنوائے ۔ تے بہت سارے کھوہ کھٹوائے کیوں جو شفیلہ تے میدان وچ اوہدے بہت سارے ڈنگر سن ۔ تے پہاڑاں تے وتر آلیاں زویاں وچ کھیت مزدور تے انگور لان آلے سن ۔ کیوں جو اوہ کاشت کاری نوں پسند کردا سی ۔ ¹¹ ۔ تے عزی یاہ کول جنگی مرداں دا لشکر سی جیہڑا یعی ایل کاتب تے معسے یاہ ناظم دی گنتری مطابق جتھا جتھا بن کے بادشاہ دے اک رئیس حنن یاہ دے تلے لڑائی لئی نکلدے سن ۔ ¹² ۔ تے بہادراں وچوں سارے آبائی سرداراں دی گنتری دو ہزار چھ سو سی۔ ¹³ ۔ تے اوہناں تھلے تن لکھ ست ہزار پنج سو دا فوجی لشکر سی ۔ جیہڑا بڑی بہادی نال دشمن دے خلاف بادشاہ دی مدد کرن لئی لڑائی کردا سی ۔ ¹⁴ ۔ تے عزی یاہ نے اوہناں لئی تے سارے لشکر لئی ڈھالاں تے نیزے تے خوداں تے زراں تے کماناں تے فلاخناں دے پتھر تیار کیتے ۔ ¹⁵ ۔ تے اوہنے یروشلیم وچ کلاں لائیاں جنہاں نوں ہنر مند بندیاں نے بنایا ۔ تاں جو اوہناں نال گنبداں تے گُٹھاں توں تیر تے وڈے وڈے پتھر واہے جا ن تے اوہدا ناں دور تک کھنڈ گیا ۔ کیوں جو خدا وند نے قوت تے مضبوطی وچ اوہدی عجیب طرح مدد کیتی ۔ ¹⁶ ۔ تے جدوں اوہ طاقت ور ہو گیا اوہد ا دل شرارت کرن تے خدا وند اپنے خدا دی بے وفائی کرن لئی پُھل گیا تے اوہ خدا وند دی ہیکل اند وڑا ۔ تاں جو بخور دے مذبحے تے مشک ساڑے ۔ ¹⁷ ۔ تد عزریاہ کاہن اوہدے پچھے اندر آیا تے اوہدے نال خدا وند دے اسّی کاہن سن جیہڑے دلیر مرد سن ۔ ¹⁸ ۔ اوہ عزی یاہ بادشاہ سامنے آئے تے آکھیا ۔ اے عزی یاہ ایہہ تیرا کم نہیں ۔ پئی توں خدا وند لئی مشک ساڑیں ۔ سگوں کاہناں یعنی بنی ہارون دا کم اے ۔ جیہڑے مشک ساڑن لئی متھے گئے نیں ۔ توں مقدس توں باہر نکل جا ۔ کیوں جو توں بے وفائی کیتی اے ۔ تے خدا وند خدا دے ساہمنے تیری عزت نہیں ۔ ¹⁹ ۔ تد عزی یاہ غصے ہویا تے اوہدے ہتھ وچ مشک ساڑن لئی بخور سوز سی ۔ تے جدوں اوہ کاہناں تے خفا ہو رہیا سی ۔ تاں خدا دے گھر وچ کاہناں دے ساہمنے اوہدے متھے تے کوڑھ پھُٹ پیا۔ اودوں اوہ بخور دے مذبحہ تے سی ۔ ²⁰ ۔ تے سردار کاہن عزریاہ تے باقی کاہناں نے اوہنوں ویکھیا ۔ تاں ویکھو اوہدے متھے تے کوڑھ سی ۔ تاں اوہناں چھیتی نال اوہنوں اوتھوں باہر دھکیا ۔ تے اوہنے وی ڈر کے نکل جان لئی جلدی کیتی ۔ کیوں جو خدا وند نے اوہنوں مارا ۔ ²¹ ۔ تے عزی یاہ بادشاہ اپنی موت تیکر کوڑھا رہیا ۔ تے کوڑھا ہون کر کے وکھرے گھر وچ رہیا ۔ کیوں جو اسے کارن اوہ خدا دے گھروں کڈھیا گیا سی ۔ تے اوہدا پتر یوتام جیہڑا بادشاہ دے گھر دا مختار سی ۔ دیس دے لوکاں دا انصاف کردا سی ۔ ²² ۔ تے عزی یاہ دا باقی حال پہلا تے پچھلا اشعیا بن آموس نبی نے لکھیا اے ۔ ²³ ۔ تے غزی یاہ اپنے پیو دادے نال سوں گیا ۔ تے اوہناں نے اوہنوں قبرستان دی پیلی وچ جیہڑا بادشاہواں لئی سے دفن کیتا ۔ کیوں جو اوہناں نے آکھیا ۔ اوہ کوہڑا اے ۔ تے اوہدی تھاں اوہدا پتر یوتام بادشاہ بنیا ۔