¹ ۔ تے جیہڑے ویلے امص یاہ بادشاہ بنیا ۔ اوہدی عمر پنجھی ورھے سی ۔ تے اوہنے یرو شلیم وچ اُنتّی ورھے بادشاہی کیتی ۔ تے اوہدی ماں دا ناں یو عدان سی ۔ جیہڑی یروشلیم دی سی ۔ ² ۔ تے اوہنے سارا کجہ جیہڑا خدا وند دی نطر وچ ٹھیک سی کیتا پر پورے دل نال نہیں ۔ ³ ۔ جدوں اوہدی بادشاہی بنی تاں اوہنے اوہناں درباریاں نوں قتل کیتا ۔ جنہاں اوہدے پیو بادشاہ نوں ماریا سی ۔ ⁴ ۔ پر اوہدے پتراں نوں اوہنے قتل نہ کیتا ۔ اوہدے مطابق جو موسیٰ دی شریعت وچ لکھیا اے ۔ جتھے خدا وند نے حکم دے کے فرمایا ۔ پئی پتراں دے بدلے پیو نہ مارے جان گے پر ہر اک بندہ اپنے ای گناہ توں مارا جاوے گا ۔ ⁵ ۔ تے امص یاہ نے یہودہ نوں کٹھا کیتا ۔ تے سارے یہودہ تے بنیامین وچ اوہناں نوں اپنے پیو دادا دے گھرانیاں مطابق ہزاراں دے سردار تے سیکڑیاں دے سردارمقرر کیتے ۔ تے ویہہ ورھیاں توں لے کے ایہدے توں ودھ عمر آلیاں دی گنتری کیتی ۔ تاں اوہ تن لکھ منتخب بندے سن جیہڑے لڑائی وچ جان دے لائق تے نیزہ ڈھال چکدے سن ۔ ⁶ ۔ تے اوہنے اسرائیل وچوں اک لکھ بہادر دلیر مرد اک سو قنطار چاندی دی اجرت تے رکھے ۔ ⁷ ۔ تد اک مرد خدا نے اوہدے کول آکے آکھیا ۔اے بادشاہ اسرائیل دا لشکر تیرے نال نہ جاوے ۔ کیوں جو خدا وند اسرائیل دے نال نہیں ۔ تے سارے بنی افرائیم دے نال اے ۔ ⁸ ۔ تے جے توں جاویں تاں لڑائی لئی پکا ہو کیوں جو خدا تینوں تیرے دشمن دے سامنے ڈھا دیوے گا ۔ کیوں جو مدد کرنا تے ڈھا دینا خدا دے ای اختیار وچ اے ۔ ⁹ ۔ تد امص یاہ نے مرد خدا نوں آکھیا ۔ تاں اُس سو قنظار لئی جیہڑے میں اسرائیلی فوج نوں دتے نیں میں کیہ کراں ؟مرد خدا نے جواب دتا ۔ پئی خدا وند تینوں اوہدے نالوں بہت ودھیک دیوے گا ۔ ¹⁰ ۔ تد امص یاہ نے اُس لشکر نوں جیہڑا افرائیم توں آیا سی وکھرا کیتا تاں جو اپنے گھر نوں جاون ۔ پر اوہد اغصہ یہودہ تے بھڑکیا ۔ تے اوہ اپنے دیس نوں مڑ گئے پر بڑے غصے وچ سن ۔ ¹¹ ۔ تے امص یاہ نے بہادری کیتی ۔ تے اپنے بندیاں نوں لے کے نمک دی ترائی تیکر گیا ۔ تے بنی سعیر وچوں دس ہزار نوں ماریا ۔ ¹² ۔ تے بنی یہودہ نے دس ہزار نوں جیوندا پھڑیا تے اوہناں نوں صالح دی چوٹی تے لیائے ۔ تے صالح دی چوٹی توں اوہناں نوں تھلے سٹ دتا ۔ تاں اوہ سارے دے سارے ٹوٹے ٹوٹے ہو گئے۔ ¹³ ۔ پر اوہدے لشکر دے بندے جنہاں نوں امص یاہ نے موڑ دتا سی ۔ پئی اوہدے نال لڑائی وچ نہ جاون یہودہ دے شہراں وچ سامرہ توں لے کے بیت حورون تیکر کھلر گئے تے تن ہزار بندیاں نوں قتل کر کے لٹ دا بہت سارا مال لے گئے ۔ ¹⁴ ۔ ایہدے مگروں انج ہویا ۔ کہ جدوں امص یاہ دو بندیاں نوں قتل کر مڑیا ۔ تاں اوہ بنی سعیر دے معبود لیایا ۔ تے اوہناں نوں اپنا معبود بنا کے کھلاریا۔ تے اوہناں اگے سجدہ کیتا ۔ تے اوہناں لئی مشک ساڑی ۔ ¹⁵ ۔ تد خدا وند امص یاہ توں ناراض ہویا ۔ تے اوہدے کول اک بنی نوں گھل کے آکھیا ۔ پئی قوماں دے معبوداں دا جیہڑے اپنے ای لوکاں نوں تیرے ہتھوں نہ چھڑا سکے توں کیوں چاہوان ایں ؟ ¹⁶ ۔ تے جدوں اوہ اوہدے نال گلاں کردا سی تاں اوہنے اوہنوں آکھیا۔ کیہ اساں تینوں بادشاہ دا مشیر بنایا اے ۔؟ چپ رہ ۔ توں کیوں مار کھائیں ۔ تاں اُس نبی نے جاندے ہوئے آکھیا ۔ مینوں پتہ اے ۔ پئی خدا دا ارادہ تینوں ہلاک کرن دا اے ۔ کیوں جو توں ایہہ کیتا ۔ تے میری صلاح نہ منی ۔ ¹⁷ ۔ فیر شاہ یہودا امص یاہ نے صلاح کیتی تے اسرائیل دے بادشاہ یو آش بن یو آحاز بن یاہو کول ایلچی گھل کے آکھیا ۔ پئی توں آ تاں جو اسیں اک دوجے نوں آمنے ساہمنے ویکھیے ۔ ¹⁸ ۔ شاہ اسرائیل یو آش نے شاہ یہودہ دے کول سنہیا گھل کے آکھیا پئی اک جھاڑی نے جیہڑی لبنان وچ سی اک دیودار جیہڑا لبنان وچ سی سنیہا گھل کے آکھیا ۔ پئی اپنی دھی دا میرے پتر نال ویاہ کر دے ۔ تد لبنان دا اک جنگلی درندہ لنگھیا تے اوہنے جھاڑی نوں لتاڑ دتا ۔ ¹⁹ ۔ توں اپنے دل وچ آکھیا ۔ پئی میں ادومیاں نوں مارا اے ۔ تاں تیرا دل پُھنڈ گیا اے ۔ کہ توں وڈیائی کریں ۔ ہن اپنے گھر وچ ای پیا رہ ۔ توں اپنے خلاف برائی لئی کیوں غصہ دواندا ایں ۔ تاں جو توں تے تیرے نال یہودہ وی ڈھے جاوے ۔ ²⁰ ۔ پر امص یاہ نے اوہدی گل نہ سنی کیوں جو ایہہ خدا ولوں سی ۔ کہ اوہناں نوں اوہناں ہتھ وچ حوالے کرے ۔ کیوں جو اوہناں نے ادوم دے معبوداں دی پیروی کیتی سی ۔ ²¹ ۔ تد شاہ اسرائیل یو آش نے چڑھائی کیتی ۔ تے اوہ شاہ یہودا امص یاہ یہودہ دے بیت شمس وچ اک دوجے دے ساہمنے آئے ۔ ²² ۔ تے یہودہ نے اسرائیل کولوں شکست کھادی ۔ تے ہر کوئی اپنے تنبو نوں نسیا ۔ ²³ ۔ پر شاہ یہودا امص یاہ بن یو آش بن احز یاہ نوں شاہ اسرائیل یو آش نے بیت شمس وچ پھڑ لیا تے اوہنوں یروشلیم وچ لیایا ۔ تے یروشلیم دی کندھ نوں افرائیم دے پھاٹک توں لے کے گُٹھ دے پھاٹک تیکر چار سو ہتھ تیک ڈھا دتا ۔ ²⁴ ۔ تے سارا سونا چاندی تے سارے بھانڈے جیہڑے خدا دے گھر وچ عوبیدا دوم دے کول تے بادشاہ دے گھر دے خزانیاں وچ سن لے گئے ۔ تے یرغمال پھڑے تے سامرہ نوں مڑ گیا ۔ ²⁵ ۔ تے شاہ یہودا امص یاہ بن یو آش شاہ اسرائیل یو آش بن یو آحازدے مرن مگروں پندرھاں ورھے جیوندا رہیا ۔ ²⁶ ۔ تے امص یاہ دا باقی حال پہلا تے پچھلا کیہ اوہ یہودہ تے اسرائیل دے بادشاہواں دی کتاب وچ لکھیا ہویا نہیں؟ ²⁷ ۔ تے جیہڑے ویلے امص یاہ خدا وند دی پیروی کرن توں پھریا ۔ یروشلیم وچ اوہدے خلاف سازش کیتی گئی ۔ تاں اوہ لاکیش ول نس گیا ۔ تاں اوہناں نے اوہدے پچھے بندے گھلے ۔ تاں اوہناں نے اوہنوں اوتھے قتل کیتا ۔ ²⁸ ۔ تے اوہ اوہنوں گھوڑیاں تے پا کے لیا ئے ۔ تے دائود دے شہر وچ اوہدے پیو دادے نال اوہنوں دفن کیتا۔