¹ ۔ تے جس ویلے یوآش بادشاہ بنیا ۔ اوہدی عمر ست ورھے سی ۔ تے اوہنے یروشلیم وچ چالہی ورھے بادشاہی کیتی ۔ اوہدی ماں دا ناں صبیہ سی جیہڑی بئیر شابہ توں سی ۔ ² ۔ تے یویا داع کاہن دے سارے دناں وچ یو آش نے اوہی کم کیتا جیہڑا خدا وند دی نظر وچ راس سی ۔ ³ ۔ تے یویا داع نے اوہدے لئی دو بیویاں لتیاں ۔ جنہاں وچوں پتر تے دھیاں جمیاں ۔ ⁴ ۔ اوہدے مگروں انج ہویا ۔ پئی یو آش نے خدا وند دے گھر دی مرمت کرن دا ارادہ کیتا ۔ ⁵ ۔ تاں اوہنے کاہناں تے لاویاں نوں کٹھا کر کے اوہناں نوں آکھیا۔ پئی یہودہ دے شہراں وچ جائو تے ہر سال سارے اسرائیل توں اپنے خدا دے گھر دی مرمت لئی پیسے کٹھے کرو ۔ تے ایہہ کم تسیں چھیتی کرو ۔ پر لاویاں نےچھیتی نہ کیتی ۔ ⁶ ۔ تد بادشاہ نے یویا داع سردار نوں بلایا تے اوہنوں آکھیا ۔ پئی توں لاویاں نوں کیوں مجبور نہ کیتا ۔ پئی اوہ شہادت دے تنبو لئی جیہڑے پیسے خدا وند دے بندے موسیٰ نے اسرائیل دی جماعت نوں آکھے ، یہودہ تے یروشلیم توں لین ۔ ⁷ ۔ کیوں جو شریر عورت یتل یاہ تے اوہدے پتراں نے خدا دے گھر نوں برباد کیتا ۔ تے خدا وند دے گھر دیاں ساریاں مقدس شیواں بعلیم دے کم وچ لیائے ۔ ⁸ ۔ تے بادشاہ نے حکم دتا تاں اوہناں اک صندوق بنایا ۔ تے اوہنوں خدا وند دے گھر دے پھاٹک دے کول باہرلے پاسے رکھیا ۔ ⁹ ۔ تے اوہناں نے یہودہ تےیروشلیم وچ منادی کروائی ۔ پئی ہر اک خدا وند لئی اوہ پیسے دیوے جیہڑی خدا دے بندے موسیٰ نے بیابان وچ اسرائیل لئی رکھی ۔ ¹⁰ ۔ تد سارے سردار تے سارے لوک خوش ہوئے ۔ تے اوہناں نے اندر جا کے صندوق وچ نقدی پائی ۔ ایتھے تیکر کہ اوہ بھریا گیا ۔ ¹¹ ۔ تے انج ہویا جدوں اوہ صندوق لاویاں دے ہتھوں بادشاہ دے دیوان کول لیایا گیا ۔ تے اوہناں نے ویکھیا کہ اوہدے وچ چوکھے پیسے نیں ۔ تاں بادشاہ دا محرر تے سردار کاہن دا مدد گار اندر آئے ۔ تے اوہناں نے صندوق نوں خالی کیتا ۔ فیر اوہنوں لے جا کے اوہدی تھاں تے رکھ چھڈیا ۔ تے اوہ ایویں ای نت کردے سن ۔ تاں بہت سارے پیسے کٹھے ہو گئے ۔ ¹² ۔ تاں بادشاہ تے یویا داع نے خدادے گھر دی خدمت دے کم مختاراں نوں دتے ۔ تے اوہناں وٹےگھڑن آلے تے ترکھان مزوری تے لائے ۔ تاں جو خدا وند دا گھر بحال کرن تے لوہے تے پتل دے گاری گراں نوں وی تاں جو خدا وند دے گھر دی مرمت کرن ۔ ¹³ ۔ تاں کاریگراں نے اپنا اپنا کم کیتا ۔ تے ٹٹ بھج اوہناں دے ہتھوں ٹھیک کروائی گئی ۔ تے اوہناں خدا دے گھر نوں اوہدی پہلی حالت وچ لیاندا ۔ تے اوہنوں پکا کیتا ۔ ¹⁴ ۔ جدوں سارے کم کر چکے تاں بچے ہوئے پیسیاں نوں اوہ بادشاہ تے یویا داع دے کول لیائے ۔ تاں اوہنے اوہدے نال خدا وند دے گھر لئی بھانڈے یعنی سیوا دے برتن تے قربانی چاڑھن دے بھانڈے تے طاس تے سونے تے چاندی دے بھانڈے بنائے تاں یویا داع دے سارے دناں وچ اوہ خدا وند دے گھر وچ ہمیشہ قربانیاں چاڑھدے رہے ۔ ¹⁵ ۔ تے یویا داع بڈھا تے دناں نال رجیا تے مر گیا ۔ تے جدوں اوہ مریا اوہدی عمر اک سو تیہہ ورھے سی ۔ ¹⁶ ۔ تے اوہناں نے اوہنوں دائود دے شہر وچ بادشاہواں نال دفن کیتا ۔ کیوں جو اوہنے اسرائیل وچ خدا لئی تے اوہدے گھر لئی نیک کم کیتے سن ۔ ¹⁷ ۔ تے یویا داع دی موت مگروں یہودہ دے بادشاہ آئے تے بادشاہ نوں سجدہ کیتا ۔ تے بادشاہ نے اوہناں دی نہ سنی ۔ ¹⁸ ۔ تد اوہناں نیں خدا وند اپنے پیو دادے دے گھر نوں چھڈیا ۔ تے کھمبیاں تے بُتاں دی پرستش کیتی ۔ تاں اُس غلطی کارن یہودہ تے یروشلم تے قہر نازل ہویا۔ ¹⁹ ۔ تے اوہنے اوہناں کول انبیا گھلے تاں جو اوہ اوہناں نوں خدا ول پھیرن ۔ تے اوہناں نے اوہناں تے گواہی دتی ۔ پر اوہناں نہیں سنیا ۔ ²⁰ ۔ تد خدا وند دی روح زکریاہ بن یویا داع کاہن تے لتھی ۔ تاں اوہ لوکاں دے اگے کھلوتا تے اوہناں نوں آکھیا ۔ خدا انج فرماندا اے ۔ پئی تسیں خدا وند دے حکماں دی کیوں نافرمانی کردے او۔ پئی تسیں کامیاب نہیں ہوو گے ۔ کیوں جو تساں خدا نوں چھڈیا ۔ تاں اوہنے وی تہانوں چھڈ دتا ۔ ²¹ ۔ تاں اوہناں نے اوہدے خلاف سازش کیتی ۔ تے بادشاہ دے حکم نال خدا وند دے گھر دے ویہڑے وچ اوہنوں سنگسار کیتا ۔ ²² ۔ تے یو آش بادشاہ اُس مہربانی نوں جیہڑی اوہدے پیو یوشا داع نے اُس تے کیتی سی ۔ یاد نہ رکھی ۔ سگوں اوہدے پتر نوں قتل کیتا ۔ جہنے موت ویلے آکھیا ۔ خدا وند ویکھے تے انصاف کرے ۔ ²³ ۔ تے ورھے دے اخیر تے انج ہویا ۔ پئی ارام دا لشکر اوہدے تے چڑھ آیا ۔ تے اوہ یہودہ تے یروشلیم وچ آئے ۔ تے لوکاں دے سارے رئیساں نوں ہلاک کیتا ۔ تے اپنی لٹ دا سار امال دمشق دے بادشاہ نوں گھلیا ۔ ²⁴ ۔ بھانویں کہ ارام دے لشکر وچوں بندیاں دا نکا جہیا جتھا آیا تاں وی خدا وند نے اک وڈے لشکر نوں اوہناں دے ہتھاں وچ دے دتا ۔ کیوں جو اوہناں نے خدا وند اپنے پیو دادے دے خدا نوں چھڈ دتا سی ۔ تے اوہناں نے یو آش نوں اوہدے کیتا دا بدلہ پورا کیتا ۔ ²⁵ ۔ جدوں اوہ اوہدے کولوں چلے گئے تاں اوہناں نے اوہنوں بڑیاں بماریاں وچ چھڈیا تے اوہدے خادماں نے یویا داع کاہن دے پتر دے خون پاروں اوہدے خلاف سازش کیتی ۔ تے اوہنوں اوہدے پلنگ تے قتل کیتا ۔ تاں اوہ مر گیا ۔ تے دائود دے شہر وچ دبیا گیا ۔ پر اوہناں نے اوہنوں بادشاہواں دیاں قبراں وچ نہ دفنایا ۔ ²⁶ ۔ تے جنہاں نے اوہدے خلاف سازش کیتی سی اوہنوں وچوں زباد بن شمعات عمونی تے یوزا باد بن شمریت مو آبی سن ۔ ²⁷ ۔ تے اوہدے پتراں دا حال تے زر دی رقم جیہڑی اوہدے ماتحت جمع کیتی گئی ۔ تے خدا دے گھر دی مرمت ۔ تاں ویکھو ایہہ بادشاہواں دی کتاب دی تفسیر وچ لکھے ہوئے نیں تے اوہد اپتر امص یاہ اوہدی تھاں بادشاہ بنیا ۔