1
۔ تے یروشلیم واسیاں نے اوہدے نکے پتر احزیاہ نوں اوہدی تھاں بادشاہ بنایا ۔ کیوں جو عرب دے ڈاکو جیہڑے خیمہ گاہ تے آئے سن ۔ اوہناں نے اوہناں دے سارے بھراواں نوں قتل کر چھڈیا سی ۔ تاں شاہ یہودہ یورام دا پتر احز یاہ بادشاہ ہویا ۔
2
۔ جس ویلے احز یاہ بادشاہ ہویا ۔ اوہ باوی ورھیاں دی عمر دا سی ۔ تے اوہنے یرو شلیم وچ اک ورھے بادشاہی کیتی ۔ اوہدی ماں دا ناں عتل یاہ سی جیہڑی عمری دی دھی سی ۔
3
۔ تے اوہ وی احی آب دے گھرانے دیاں راہواں تے تریا ۔ کیوں جو اوہدی ماں اوہنوں برائی کرن دی صلاح دیندی سی ۔
4
۔ تے اوہنے احی آب دے گھرانے وانگوں خدا وند دی نظر وچ برائی کیتی ۔ کیوں جو اوہ اوہنوں اوہدے پیو دی موت مگروں اوہدی ہلاکت دی صلاح دیندے سن ۔
5
۔ اوہ اوہناں دی صلاح مطابق چلیا تے شاہ اسرائیل یورام بن احی آب دے نال شاہ ارام حرائیل نال جنگ کرن لئی راموت جلعاد تے چڑھا ۔ تاں ارامیاں نے یورام نوں پھٹر کیتا ۔
6
۔ تد اوہ یزری عیل وچ اوہناں پھٹاں دے علاج لئی گیا ۔ جیہڑے اوہنے راموت وچ شاہ ارام حرائیل نال جنگ کردیاں ہویاں کھادے سن ۔ تے یہودہ دا بادشاہ احزیاہ بن یورام گیا ۔ تاں جو یزری ایل وچ یورام بن احی آب دی بماری بارے پچھے ۔
7
۔ تے یورام دے کول آن تے احز یاہ دی ہلاکت خدا ولوں ہوئی ۔ کیوں جو جدوں اوہ آیا تاں اوہ یورام نال یاہو بن نمشی دے استقبال نوں باہر نکلیا ۔ جنہوں خدا وند نے مسح کیتا سی تاں جو احی آب دے خاندان نوں تباہ کرے ۔
8
۔ تاں انج ہویا ۔ پئی جس ویلے یاہو احی آب دے گھرانے توں بدلہ لے رہیا سی ۔ تاں اوہنے یہودہ دے رئیساں تے احز یاہ دے بھراواں دے اوہناں پتراں نوں ویکھیا جیہڑے احز یاہ دی سیوا کیتا کردے سن ۔ تے اوہناں نوں قتل کر دتا ۔
9
۔ اُس نے احز یاہ نوں ڈھونڈیا ۔ تاں اوہناں نے اوہنوں پھڑیا ۔ جدوں اوہ سامرہ وچ چھپیا ہویا سی تے اوہنوں یاہو دے کول لیائے ۔ تاں اوہناں نے اوہنوں قتل کیتا تے دفن کیتا ۔ کیوں جو اوہناں نے آکھیا کہ اوہ یوشا فاط دا پتر اے ۔ جنہے خدا وند نوں اپنے سارے دل نال ڈھونڈا ۔
10
۔ سو احزیاہ دے گھرانے وچوں کوئی نہ بچیا جیہڑا بادشاہی کر سکے ۔ جدوں احز یاہ دے ماں عتل یاہ نے ویکھیا پئی اوہدا پتر مر گیا تاں اوہ اٹھی تے یہودہ دے گھرانے وچوں ساری شاہی نسل نوں ہلاک کیتا ۔
11
۔ تد بادشاہ دی دھی یوشبعت نے یو آش بن احزیاہ نوں لتا ۔ تے اوہنوں بادشاہ دے پتراں وچوں چھپایا جیہڑے قتل کر دتے گئے سن ۔ تے اوہنوں تے اوہدی دائی نوں شبستان وچ رکھیا ۔ تے اُس یوشبعت شاہ یورام دی دھی نے جیہڑی یویا داع کاہن دی بیوی سی ۔ اوہنوں عتل شاہ دے ساہمنیوں لکایا کیوں جو اوہ احزیاہ دی بھین سی ۔ تاں اوہنے اوہنوں قتل نہ کیتا ۔
12
۔ تے اوہ اوہناں دے نال خدا دے گھر وچ چھ ورہے لکیا رہیا ۔ تے عتل یاہ دیس تے بادشاہی کردی رہی ۔