1
۔ تے یوشا فاط اپنے پیو دادا دے نال سوں گیا ۔ تے دائود دے شہر وچ اپنے پیو دادے نال دبیا گیا ۔ تے اوہدا پتر یورام اوہدی تھاں بادشاہ ہویا ۔
2
۔ تے بنی یوشا فاط وچوں ایہہ اوہدے بھرا سن ۔ عزریاہ تے میکائیل تے یحی ایل تے زکریا تے عزریاہو تے شفط یاہ ۔ ایہہ سارے شاہ یہودا یوشافاط دے پتر سن ۔
3
۔ تے اوہناں دے پیو نے اوہناں نوں اوہناں حصین شہراں سنے جیہڑے یہودہ وچ سن چاندی تے سونے تے مہنگیاں شیواں دے وڈے وڈے عطیے دتے پر بادشاہی اوہنے یورام نوں دتی ۔ کیوں جو اوہد ا پلیٹھی دا سی ۔
4
۔ تے جیہڑے ویلے یورام بادشاہ ہویا ۔ تے اوہنے زور پھڑیا تاں اوہنے سارے بھراواں نوں اسرائیل دے کئی رئیساں سنے تلوار نال قتل کیتا ۔
5
۔ تے جدوں یورام بادشاہ بنیا اوہدی عمر بتی ورھے سی ۔ تے اوہنے یروشلیم تے اٹھ ورھے بادشاہی کیتی ۔
6
۔ تے اوہ اسرائیل دے بادشاہواں دی راہ تے تریا ۔ اوہدے مطابق جو احی آب دے گھرانے نے کیتا سی ۔ کیوں جو اوہنے احی آب دی دھی نوں ویاہ لتا سی ۔ تے خدا وند دی نگاہ وچ برائی کیتی۔
7
۔ پر خدا وند نے اُس عہد دی خاطر جیہڑا اوہنے دائود نال بنھیا سی ۔ دائود دے خاندان نوں تباہ نہ کرنا چاہیا ۔ کیوں جو اُس نے اُس نوں آکھیا سی ۔ پئی میں تیرے لئی تےتیرے پتراں لئی اک چراغ ہمیشہ لئی دیاں گا ۔
8
۔ تے اوہدے دناں وچ ادومی یہودہ دی ماتحتی توں نکل گئے تے اوہناں اپنے لئی اک بادشاہ بنایا ۔
9
۔ تد یورام سنے اپنیاں سرداراں تے ساریاں گڈیاں دے پار گیا ۔ تے رات نوں اُٹھ کے اوہناں بندیاں نوں ماریا ۔ جیہڑے اوہنوں تے گڈیاں دے سرداراں نوں گھیرے ہوئے سن ۔
10
۔ پر ادومی یہودہ دی ماتحتی توں اج دے دن تیکر باہر ای رہے ۔ تے اوسے ویلے لبنہ وی اوہدے ہتھوں چلا گیا ۔ کیوں جو اوہنے خدا وند اپنے پیو دادا دے خدا چھڈیا ۔
11
۔ تے اوہنے یہودہ دے پہاڑاں تے اچیاں تھانواں بنایاں ۔ تے یروشلیم واسیاں نوں زنا کاری دا جزبہ دتا ۔ جیویں کے احی آب دے گھرانے نے زنا کاری کیتی ۔ تے یہودہ نوں بہکایا ۔
12
۔ تد اوہدے کول الیاس نبی توں اک چھٹی پہنچی ۔ جس وچ لکھیا سی پئی خدا وند تیرے پیو دائود دا خدا انج فرماندا اے ۔ ایس لئی کہ توں اپنے یوشا فاط دیاں راہواں اُتے تے شاہ یہودا آسا دی راہ تے نہیں چلیا۔
13
۔ سگوں توں اسرائیل دے بادشاہواں دیاں راہواں تے چلیا ایں ۔ تے یہودہ تے یروشلیم دے واسیاں نوں زنا کاری دا جوش دتا۔ جس طرح پئی احی آب دے گھرانے نے زنا کاری کیتی ، تے توں اپنے پیو دے گھرانے دے اپنے اوہناں بھراواں نوں قتل کیتا جیہڑے تیرے نالوں چنگے سن۔
14
۔ تاں ویکھ! خدا وند تیرے لوکاں نوں تے تیرے پتراں نوں تے تیریاں بیویاں نوں تے تیری ساری جائیداد نوں بڑی مصیبت نال مارے گا ۔
15
۔ تے اوہ تینوں آندھراں دی ڈاہڈی بماری لاوے گا ۔ ایتھے تیک پئی بماری کارن ہر روز تیریا ں آندھراں باہر نکلدیاں رہن گیاں ۔
16
۔ تے خدا وند نے یورام دے خلاف فلسطینیاں تے کوشیاں دے نیڑے رہن آلے عربیاں دل دل نوں ابھاریا ۔
17
۔ تاں اوہناں نے یہودہ تے چڑھائی کیتی ۔ تے اوہنوں اُجاڑ کیتا ۔ تے بادشاہ دے گھروں جیہڑا مال ملیا لٹ لتا تے اوہدے پتراں تے اوہدیاں دھیاں نوں بندی وان بنایا ۔ تاں اوہدا کوئی پتر باقی نہ بچیا ۔ سوائے یوحاز دے جیہڑا ساریاں نالوں نکا سی ۔
18
۔ تے ساریاں مگروں خدا وند نے اوہنوں ماریا ۔ پئی اوہدیاں آندراں وچ اک لاعلاج بماری ہو گئی ۔
19
۔ تے دنو دنی ویلا لنگھدا گیا ۔ ایتھے تیکر کہ دوورھے لنگھن مگروں بیماری کارن اوہدیاں آندراں باہر نکل آیاں ۔ توں اوہ بہت بھیڑی بماری نال مر گیا ۔ تے اوہدے لوکاں اوہدے لئی مشکاں نہ ساڑیاں جیویں کہ اوہدے پیو دادے لئی ساڑیاں گیاں سن ۔
20
۔ جس ویلے اوہ بادشاہ ہویا اُس ویلے اوہدی عمر بتی ورھے سی ۔ تے اوہنے یروشلیم وچ اٹھ سال بادشاہی کیتی ۔ تے بناں ماتم وداع ہویا ۔ تے اوہ دفن تاں دائود دے شہر وچ کیتا گیا ۔ پر بادشاہواں دیاں قبراں وچ نہیں ۔