¹ ۔ تے اوہدے مگروں انج ہویا ۔ پئی بنی مو آب تے بنی عمون تے اوہناں دے نال معونی یوشا فاط نال جنگ کرن آئے ۔ ² ۔ تاں بعضے لوکاں نے آکے یوشا فاط نوں خبر دتی تے آکھیا پئی سمندر پاروں ادوم توں تیرے خلاف اک وڈا اکٹھ نکل کے آیا اے ۔ تے ویکھ اوہ حصصون تامار وچ نیں جیہڑا عین جیدی اے۔ ³ ۔ تد یو شا فاط ڈریا ۔ تے خدا وند کولوں دعا منگن لگا ۔ تے سارے یہودہ وچ روزہ رکھن دی منادی کروائی ۔ ⁴ ۔ تد بنی یہودہ خدا وند کولوں دعا منگن لئی کٹھے ہوئے ۔ اوہ یہودہ دے سارے شہراں وچوں خدا وند دی منت کرن آئے ۔ ⁵ ۔ تے یوشا فاط یہودہ تے یروشلیم دی جماعت دے دوران خدا وند دے گھر وچ نویں ویہڑے دے اگے کھلویا ۔ ⁶ ۔ تے آکھیا ۔ اے خدا وند ساڈے پیو دادے دے خدا ! کیہ اسمان وچ توں ای خدا نہیں ؟ تے کیہ توں غیر قوماں دی ساری بادشاہیاں تے بادشاہی نہیں کردا ایں ؟ تے زور تے طاقت تیرے ای ہتھ وچ اے ۔ تے کوئی تیرے سامنے ٹھہر نہیں سکدا ۔ ⁷ ۔ کیہ توں ای ساڈا خدا نہیں ؟جہنے اُس دیس دیاں واسیاں نوں اپنے لوکاں اسرائیل دے ساہمنیوں کڈھ دتا تے اپنے خلیل ابراہیم دی نسل نوں اوہنوں سدا لئی عطا کیتا ۔ ⁸ ۔ تے اوہ اوہدے وچ رہن لگے ۔ تے اوہناں نے اوہدے وچ تیرے ناں لئی اک مقدس گھر بنایا ۔ ایہہ آکھ کے ۔ ⁹ ۔ کہ جدوں تلوار نال یا موت نال یا وبا یا کال نال اساں تے کوئی مصیبت بنے ۔ تے اسیں اُس گھر دے اگے تے تیرے اگے کھلوئیے۔ کیوں جو تیرا ناں اُس گھر وچ اے ۔ تے اپنے دکھ وچ تیرے کول فریاد کرئیے ۔ تاں توں سن لویں گا تے رہائی دیویں گا ۔ ¹⁰ ۔ تے اس ویلے ایہہ بنی عمون تے مو آبی کوہ سعیر دے لوک جنہاں وچوں توں اسرائیل نوں لنگھن نہ دتا۔ تاں اوہ اوہناں کولوں اک پاسے گئے تے اوہناں نوں ہلاک نہ کیتا ۔ ¹¹ ۔ ویکھ اوہ آکے سانوں ایہہ بدلہ دیندے نیں کہ سانوں تیری اُس میراث توں کڈھ دین جس دا توں سانوں وارث بنایا اے ۔ ¹² ۔ اے ساڈے خدا ! کیہ توں اوہناں نوں سزا نہیں دیویں گا ؟ کیوں جو اُس وڈے اکٹھ دے اگے جیہڑا ساڈے خلاف آیا اے ۔ ساڈی کچھ طاقت نہیں ۔ تے اسیں نہیں جاندے پئی اسیں کیہ کرئیے ۔ تے ساڈیاں اکھاں تیرے ول نیں۔ ¹³ ۔ تے سارا یہودہ اپنے بچیاں تے زنانیاں تے اپنے منڈیاں دے نال خدا وند دے سامنے کھلوتے ۔ ¹⁴ ۔ تد یجزی ایل بن زکریاہ بن بنایاہ بن یعی ایل بن متن یاہ لاوی تے جیہڑا بنی آساف وچوں سی ، جماعت دے وچکار خدا وند دی روح لتھی ۔ ¹⁵ ۔ تاں اوہنے آکھیا ۔ سنو تسیں یہودہ تے یروشلیم واسیو تے توں اے بادشاہ یوشا فاط ! خدا تہانوں انج فرماندا اے ۔ کہ تسیں نہ ڈرو ۔ تے اُس وڈے اکٹھ کولوں نہ گھبرائو ۔ کیوں جو لڑائی تہاڈی نہیں سگوں خدا دی اے ۔ ¹⁶ ۔ کل دے دن تسیں اوہناں دے خلاف جائو ۔ کیوں جو اوہ صیص دی چڑھائی چڑہن گے ۔ تے دشت یروئیل دے ساہمنے نالے دے سرے تے تسیں اوہناں نوں پائو گے ۔ ¹⁷ ۔ تہانوں لڑائی کرن دی حاجت نہیں۔ تسیں کھلوتے رہو تے قائم رہو ۔ تے تسیں خدا وند دی مدد نوں اپنے نال ویکھو گے ۔ اے یہودہ تے یرو شلیم تسیں نہ ڈرو تے نہ گھبرائو ۔ کل تسیں اوہناں دے خلاف نکلو گے تے خدا وند تہاڈے نال ہووے گا ۔ ¹⁸ ۔ تد یوشا فاط منہ بھرنے زویں تے ڈگیا تے سارے یہودہ تے یروشلیم واسی خدا وند نوں سجدہ کرن لئی خدا وند دے اگے ڈگے۔ ¹⁹ ۔ تے بنی کہات تے بنی قورح وچوں لاوی اٹھ کھڑوتے تاں جو بہت ای اُچی واج وچ خدا وند اسرائیل دے خدا دی حمد کرن ۔ ²⁰ ۔ فیر سویرنوں اوہ سوقتے اُٹھے تے دشت تقوع ول باہر نکلے۔ تے اوہناں دے باہر نکلن ویلے یو شا فاط کھلوتا تے بولیا ۔ اے یہودہ تےیرو شلیم واسیو میری گل سنو ۔ خداوند اپنے خدا تے ایمان لیائو۔ تاں تسیں چین نال رہوو گے ۔ تے اوہدے انبیا دی گل منو تاں تسیں کامیاب ہووو گے ۔ ²¹ ۔ تے اُس نے لوکاں نال صلاح کیتی تے خدا وند لئی گان آلیاں تے پاک سجاوٹ نال اوہدی حمد کرن آلیاں نوں مقرر کیتا ۔ جیہڑے فوج دے اگے اگے چلدے ہوئے آکھن ۔ خدا وند دی ستائش کرو ۔ کیوں جو اوہدی رحمت ابد تیکر اے ۔ـ ²² ۔ تے جدوں اوہناں نے گانا تے حمد کرنا شروع کیتا تاں خدا وند نے کمین والیاں نوں بنی عمون تے مو آبیاں تے کوہ سعیر دے اوہناں واسیاں دے خلاف بٹھا دتا جنہاں نے یہودہ تے چڑھائی کیتی سی ۔ ایس لئی اوہ مارے گئے ۔ ²³ ۔ کیوں جو بنی عمون تے مو آبی کوہ سعیر واسیاں دے خلاف اُٹھے ۔ تاں جو اوہناں نوں مار دین تے ہلاک کرن ۔ تے جدوں اوہ سعیر دے بندیاں دا کم پورا کر چکے تاں اک دوجے نوں ہلاک کرن لگے ۔ ²⁴ ۔ تے جدوں یہودہ اک اجہی تھاں تیکر پہنچیا جتھوں اُجاڑ نظر آوندا سی ۔ تاں اوہناں اکٹھ ول ویکھیا ۔ تاں ویکھو لاشاں ای لاشاں زویں تے پیاں ہویاں سن ۔ تے اوہناں وچوں کوئی نہیں سی بچیا ۔ ²⁵ ۔ تد یو شافاط تے اوہدے لوک اوہناں نوں لٹن لئی اگے آئے ۔ تے لاشاں وچ اوہناں نوں چوکھے ڈنگر مال تے لیڑے لبھے ۔ تاں اوہناں نے اوہناں نوں اپنے لئی لے لتا تے اوہ سارے اوہناں دے چک لے جان دی سوچ توں ودھیک سن ۔ تے اوہ تن دن تیکرغنیمت نوں کٹھا کردے رہے ۔ کیوں جو اوہ چو کھی سی ۔ ²⁶ ۔ تے چوتھے دن اوہ براکہ دی ترائی وچ کٹھے ہوئے ۔ کیوں جو اوتھے اوہناں نے خدا وند نوں مبارک آکھیا ۔ تاں اُس ویلے توں اوہ تھاں اج دے دن تیکر وادی براکہ اکھوائی ۔ ²⁷ ۔ فیر یہودہ تے یروشلیم دے سارے لوک واپس پھرے۔ تے یوشا فاط اوہناں دے اگے اگے سی ۔ اوہ خوشی نال یروشلم نوں پرتے ۔ کیوں جو خدا وند نے اوہناں نوں دشمن تے فتح بخشی ۔ ²⁸ ۔ تے ونجھلیاں تے بربطاں تے نر سنگیاں نال خدا وند دے گھر ول یروشلیم وچ وڑے ²⁹ ۔ تے خدا دا ڈر اوہناں دیساں دیاں ساریاں بادشاہیاں تے چھا گیا ۔ جدوں اوہناں نے سنیا پئی اسرائیل دے دشمناں نال خدا وند نے لڑائی کیتی ۔ ³⁰ ۔ تے یوشافاط دی بادشاہی وچ امن رہیا ۔ کیوں جو خدا نے اوہنوں ہر پاسیوں آرام دتا ۔ ³¹ ۔ تے یوشا فاط یہودہ تے بادشاہی کردا رہیا ۔ جس ویلے اوہ بادشاہ بنیا اُس ویلے اوہدی عمر پینتی ورھے سی ۔ تے اوہنے یروشلیم وچ پنجھی ورہے بادشاہی کیتی ۔ تے اوہدی ماں دا ناں عزوبہ سی جیہڑی شلحی دی دھی سی ۔ ³² ۔ تے اوہ اپنے پیو آسا دیاں راہواں تے تریا تے اوہناں توں اگے نہ ودھیا ۔ تے جو کچھ خدا دی نظراں وچ سدھا سی اوہو کیتا ۔ ³³ ۔ پر اچیاں تھانواں نہ ڈھائیاں گیاں ۔ تے لوکاں دے دل وی اوہناں دے پیو دادے دے خدا ول مائل نہ ہوئے سن ۔ ³⁴ ۔ تے یوشافاط دے پہلے تے پچھلے باقی کم یاحو بن حنانی دی تاریخ وچ لکھے ہوئے نیں ۔ جیہڑی اسرائیل دے بادشاہواں دی کتاب وچ شامل اے ۔ ³⁵ ۔ ایہدے مگروں یہودہ دے بادشاہ یوشا فاط نے اسرائیل دے بادشاہ حزیاہ نال اتحاد کیتاجیہڑا بھیڑے کم کردا سی۔ ³⁶ ۔ تے اوہنے اوہدے نال ایکا کیتا، تاں جو جہاز بنا کے ترشیش نوں گھلن ۔ ایس لئی اوہناں عصیون جابر وچ جہاز بنوائے ۔ ³⁷ ۔ تد الی عازربن دودیاہ نے جیہڑا مرشیہ دا سی یو شافاط دے خلاف پیش گوئی کر کے آکھیا ۔ کیوں جو توں اخز یاہ نال اتحاد کیتا ۔ خدا وند تیرے کماں نوں وگاڑ دے گا ۔ سو اوہ جہاز ٹٹ گئے ۔ تے اوہناں دا ترشیش نوں جانا رہ گیا ۔