¹ ۔ تے یہودہ دا بادشاہ یوشا فاط یروشلیم وچ اپنے گھر وچ سلامتی نال آیا ۔ ² ۔ تاں یاہو بن حنانی غیب بین اوہنوں ملن لئی باہر نکلیا ۔ تے اوہنے یوشا فاط بادشاہ نوں آکھیا ۔ پئی توں غلطیاں کرن آلیاں دی مدد کردا ایں ۔ تے خدا وند دے دشمناں نال موہ رکھدا ایں ۔ ایسے کارن توں خدا وند دے حضور وچوں قہر دی سزا پائی اے ۔ ³ ۔ پر تیرے وچ نیک کم ہیگے نیں ۔ کیوں جو توں کھمبیاں نوں دیس توں دور کیتا اے تے خدا نوں لبھن لئی اپنے دل نوں تیار کیتا اے ۔ ⁴ ۔ تے یوشا فاط یروشلیم وچ رہیا تے بیئر شابہ توں لے کے کوہ افرائیم تک فیر لوکاں کول گیا ۔ تے اوہناں نوں خدا وند اوہناں دے پیو دادے دے خدا ول پھیریا ۔ ⁵ ۔ تے اوہنے دیس وچ یہودہ دے سارے حصین شہراں وچ اک شہر توں دوجے شہر تیکر قاضیاں نوں مقرر کیتا ۔ ⁶ ۔ تے قاضیاں نوں آکھیا ۔ خبردار رہو ۔ تسیں کیہ کردے او ۔ کیوں جو تسیں بدی لئی نہیں سگوں خدا وند لئی عدالت کردے او۔ تے اوہ فتوےوچ تہاڈے نال اے ۔ ⁷ ۔ تے ہن خدا وند دا خوف تساں تے رہوے ۔ تے تسیں ساریاں دا کم دیانت داری نال کرو ۔ کیوں جو خدا وند ساڈے خدا دے حضور بے انصافی نہیں تے نہ منہ دا لحاظ اے تے نہ رشوت لینا اے ۔ ⁸ ۔ تے یوشاط نے یروشلیم وچ وی لاویاں تے کاہناں تے اسرائیل دے اوتھے رہن آلے رئیساں نوں مقرر کیتا ۔ پئی خدا وند لئی عدالت کرن تے جھگڑیاں دا فیصلہ کرن ۔تاں اوہ یروشلیم وچ رہے ۔ ⁹ ۔ تے اوہنے اوہناں نوں حکم دے کے آکھیا کہ تسیں خدا وند دے ڈر تے ایمانداری تے صاف دل نال ایویں ای کرو ۔ ¹⁰ ۔ تے جدوں کدی تہاڈے بھراواں ولوں جیہڑے اپنے شہراں وچ رہندے نیں ۔ کوئی مقدمہ تہاڈے سامنے آوے جیہڑا اک دوجے دے خون دے یا شریعت تے حکم یا قانون یا قضاواں بارے ہووے ۔ تاں تسیں اوہناں نوں خبردار کرنا پئی خدا وند دے خلاف گناہ نہ کرو۔ تاں جو اوہدا قہر تہاڈے اُتے ،تے تہاڈے بھراواں تے نہ پوے ۔ ¹¹ ۔ تے امر یاہ کاہن ساریاں معاملیاں وچ جیہڑے خدا وند نال جڑے ہون ۔ تہاڈا سردار ہووے گا ۔ تے بادشاہ بارے ساریاں گلاں وچ زبدہ یاہ بن اسماعیل بنی یہودہ دا سردار ہووے گا ۔ تے عہدہ دار لاوی تہاڈے کول نیں ۔ تاں بہادر بنو تے کم کرو ۔ تے خدا وند نیکاں دے نال ہووے ۔