¹ - تے یوشافاط دی دولت تے عزت ودھی ۔ تے اوہنے احی آب نال رشتہ کیتا ۔ ² ۔ تے تھوڑے ورھیاں مگر اوہ احی آب دے کول سامرہ وچ گیا ۔ تاں احی آب نے اوہدے لئی تے اوہناں لوکاں لئی جیہڑے اوہدے نال سن وڈی گنتی وچ بھیڈاں تے بلد کوہے ۔ تے اوہنوں راموت لعاد تے حملہ کرن لئی اُکسایا ۔ ³ ۔ تے شاہ اسرائیل احی آب نے شاہ یہودہ یو فاط نوں آکھیا ۔ کیہ توں میرے نال راموت جلعاد نوں جائیں گا ؟ تاں اوہنے جواب دتا ۔ میں تیرا ای ہاں تے میرے لوک تیرے ای لوک نیں ۔ تے اسیں لڑائی وچ تیرے نال ہوواں گے ۔ ⁴ تے یوفاط نے شاہ اسرائیل نوں آکھیا ۔ پئی اج خدا وند دا کلام ڈھونڈ ۔ ⁵ ۔ تد اسرائیل دے بادشاہ نے چار سو نبیاں نوں کٹھا کیتا تے اوہناں نوں آکھیا ۔ کیہ اسیں راموت جلعاد ول لڑائی کرن نوں جائیے یا اسیں باز رہیے ؟ اوہناں آکھیا جا ۔ کیوں جو خدا اوہنوں بادشاہ دے ہتھ وچ دے دیوے گا ۔ ⁶ ۔ تد یو شا فاط نے آکھیا ۔ کیہ ایتھے کوئی خدا وند دا نبی نہیں ؟ کہ اوہدے کولوں اسیں پچھیئے۔ ⁷ ۔ شاہ اسرائیل نے یوشا فاط نوں آکھیا ۔ پئی اک بندہ ہے جہدے راہیں اسیں خدا کولوں پچھ سکدے ہاں پر میں اوہدے کولوں نفرت کردا ہاں۔ کیوں جو اوہ میرے لئی نیکی دی نہیں سگوں ہمیشہ بدی دی پیش گوئی کردا اے۔ تے اوہ میکا یہو بن یملہ اے۔ یوشافاط نے آکھیا ۔ پئی بادشاہ انج نہ آکھے ۔ ⁸ ۔ تاں اسرائیل دے بادشاہ نے اک عہدیدار نوں سدیا تے آکھیا پئی میکا یاہ بن یملہ نوں میرے کول لیا ۔ ⁹ ۔ تاں اسرائیل دا بادشاہ تے یہودہ دا بادشاہ یوفاط اپنا شاہی لباس پائے ہوئے سامرہ دے پھاٹک دے لاہنگے نیڑے اک کھلواڑے وچ اپنے تخت تے بیٹھے ہوئے سن ۔ تے سارے انبیا اوہناں دے ساہمنے پیش گوئی کردے سن ۔ ¹⁰ ۔ تے صدقی یاہ بن کنعنہ نے اپنے لئی لوہے دے سنگ بنوائے ۔ تے کہن لگا ۔ خدا وند انج فرماندا اے ۔ کہ ایہناں نال توں ارامیاں نوں دھکیں گا ۔ جدوں تیکر اوہ فنا نہ ہو جان ۔ ¹¹ ۔ تے سارے انبیا اسی وانگ پیش گوئی کر کے آکھدے سن ۔ پئی راموت جلعاد نوں جا تے توں کامیاب ہوویں گا ۔ کیوں جو خدا نے اوہنوں بادشاہ دے ہتھ وچ دے دتا اے ۔ ¹² ۔ تے اُس قاصد نوں جیہڑا میکا یہو نوں سدن گیا سی اوہدے نال مخاطب ہو کے آکھیا ۔ پئی سارے انبیا اک منہ نال بادشاہ لئی نیکی دی گل کردے نیں ۔ سو تیرا کلام وی ایہناں دے کلام وانگ ہووے گا ۔ تے توں نیکی دی گل کرنا ۔ ¹³ ۔ میکا یہو نے آکھیا ۔ جیوندے خداوند دی قسم ۔ جو کچھ میرا خدا آکھے گا میں اوہی آکھاں گا ۔ ¹⁴ ۔ جدوں اوہ بادشاہ دے کول آیا ۔ بادشاہ نے اوہنوں آکھیا ۔ اے میکا یہو ! کیہ اسیں لڑائی کرن لئی راموت جلعاد نوں جائیے یا میں گریز کراں ؟ اوہنے آکھیا تسیں جائو تے کامیاب ہوو گے ۔ کیوں جو اوہ تہاڈے ہتھاں وچ دے دتے جان گے ۔ ¹⁵ ۔ تد بادشاہ نے اوہنوں آکھیا ۔ پئی کنی وار میں تینوں سونہہ دیاں ۔ کہ توں مینوں کچھ نہ آکھیں ۔ پر خدا دے ناں توں اوہی جیہڑا سچ اے ۔ ¹⁶ ۔ اوہنے آکھیا ۔ میں سارے اسرائیل نوں پہاڑ تے اوہناں ساریاں بھیڈاں وانگ کھلرا ہویا ویکھیا ۔ جنہاں دا کوئی آجڑی نہ ہووے ۔ تاں خدا وند نے آکھیا ۔ اوہناں دا کوئی مالک نہیں ۔ ایس لئی اوہناں وچوں ہر اک سلامتی نال مڑ کے اپنے گھر نوں جاوے ۔ ¹⁷ ۔ تد اسرائیل دے بادشاہ نے یوشافاط نوں آکھیا ۔ کیہ میں تینوں نہیں سی آکھیا ؟ پئی ایہہ میرے لئی نیکی دی نہیں سگوں برائی دی پیش گوئی کرے گا ۔ ¹⁸ ۔ تد اوہنے آکھیا ۔ توں خدا وند دا کلام سن ۔ میں خدا وند نوں اپنے تخت تے بیٹھے ہوئے ویکھیا ۔ تے اسمان دا سار الشکر اوہدے سجے تے کھبے کھلوتا سی ۔ ¹⁹ ۔ تاں خدا وند نے آکھیا ۔ پئی اے اسرائیل دے بادشاہ احی آب نوں کون بہکاوے گا ؟ تاں جو اوہ حملہ کرے ۔ تے راموت جلعاد وچ قتل کیتا جاوے ۔ تاں کسے نے کچھ تے کسے نے کچھ آکھیا ۔ ²⁰ ۔ فیر اک روح نکلی تے خدا وند دے سامنے کھلوتی ۔ تے آکھیا ۔ میں ایہنوں بہکاواں گی ۔ خدا وند نے اوہنوں آکھیا ۔ کیویں ؟ ²¹ ۔ اُس آکھیا میں جاواں گی تے سارے نبیاں دے منہ وچ جھوٹ بولن آلی روح بناں گی ۔ تاں اوہنے آکھیا توں اوہنوں بہکا لویں گی ۔ تے غالب آویں گی ۔ایس لئی توں جا ۔ ²² ۔ تےہن تیرے ایہناں ساریاں نبیاں دے منہ وچ خدا وند نے جھوٹ بولن آلی روح پائی اے تے خدا وند نے تیرے خلاف بری خبر دتی اے ۔ ²³ ۔ تد صدقی یاہ بن کنعنہ اگے آیا تے میکا یہو دی گلہہ تے چپیڑ مار کے آکھیا ۔ پئی کیہڑی راہ توں خدا وند دی روح میرے کولوں دی لنگھی پئی تیرے نال کلام کرے ۔ ²⁴ ۔ میکا یہو نے آکھیا ۔ تو اج دے دن ویکھیں گا ۔ جدوں توں دربدر چھپن لئی نسیں گا ۔ ²⁵ ۔ تد اسرائیل دے بادشاہ نے آکھیا ۔ پئی میکا یہو نوں پھڑ لو تے شہر دے رئیس آمون تے شہزادے یو آش دے حوالے کر دیو ۔ ²⁶ ۔ تے آکھو بادشاہ نے انج حکم دتا ۔ پئی ایہنوں بندی خانے وچ رکھو ۔ تے تنگی دی روٹی تے تنگی دا پانی ایہنوں دیو جدوں تیکر میں سلامتی نال مڑ کے نہ آجاواں ۔ ²⁷ ۔ تاں میکا یہو نے آکھیا ۔ جے توں سلامتی نال مڑ کے آویں ۔ تاں خدا وند نے میرے مونہوں کچھ آکھیا ای نہیں ۔ ²⁸ ۔ فیر اسرائیل دے بادشاہ تے یہودہ دے بادشاہ یوشا فاط نے راموت جلعاد تے حملہ کیتا ۔ ²⁹ ۔ تاں اسرائیل دے باد شاہ نے یوشا فاط نوں آکھیا ۔ میں بھیس وٹا کے لڑائی وچ جاندا ہاں پر توں اپنا ای لباس پائی رکھ ۔ تد اسرائیل دے بادشاہ نے بھیس وٹایا تے لڑائی وچ گیا ۔ ³⁰ ۔ تے ارام بادشاہ نے گڈیاں دے سرداراں نوں آکھیا ۔ کہ تسیں کسے نال وی کیہ نکے تے کیہ وڈے لڑائی نہ کرو ۔ بناں شاہ اسرائیل دے ۔ ³¹ ۔ جدوں گڈیاں دے سرداراں نے یوشافاط نوں ویکھیا ۔ تاں آکھیا ۔ ایہو اسرائیل دا بادشاہ اے تے اوہدے نال لڑائی کرن لئی اوہنوں گھیر لتا ۔ پر یوشا فط چیکیا ۔ تے خدا وند نے اوہدی سنی ۔ تے اوہناں نوں اوہدے توں پھرا دتا ۔ ³² ۔ کیوں جو جدوں گڈیاں دے سرداراں نے ویکھیا ۔ پئی اوہ اسرائیل دا بادشاہ نہیں ۔ تاں اوہدے کولوں مڑ گئے ۔ ³³ ۔ تے اک بندے نیں بناں ارادہ کیتے اپنی کمان توں تیر چلایا ۔ تاں اوہ شاہ اسرائیل دے جوشن دے بندیاں وچکار جا لگیا ۔ اوہنے اپنے کوچوان نوں آکھیا واگ موڑ تے مینوں لشکر توں باہر لے جا ۔ کیوں جو میں پھٹر ہو گیا ہاں ۔ ³⁴ ۔ تے اُس دن بڑی ڈاہدی لڑائی ہوئی تے شاہ اسرائیل نے ارام دے مقابلے وچ شام تیکر اپنی گڈی وچ اپنے آپ نوں سنبھال کے رکھیا ۔ تے سورج ڈبن دے نیڑے مر گیا ۔